ନୂଆଦିଲ୍ଲୀ : ତ୍ରିପୁରା, ନାଗାଲାଣ୍ଡ ଓ ମେଘାଳୟ ବିଧାନସଭା ନିର୍ବାଚନ ପାଇଁ ମତଦାନ ଶେଷ ହୋଇଥିବାବେଳେ ଏହାର ଏକଜିଟ ପୋଲ ସର୍ଭେ ରିପୋର୍ଟ ପ୍ରକାଶ ପାଇଛି। ମଙ୍ଗଳବାର ପ୍ରକାଶିତ ଏକଜିଟ୍ ପୋଲ (ବୁଥ ଫେରନ୍ତା ଜନମତ) ସର୍ଭେ ଅନୁଯାୟୀ ତ୍ରିପୁରାରେ ବିଜେପି ସରକାର ଗଠନ କରିବ। ଏଠାରେ ୨୫ବର୍ଷ ଧରି ଚାଲିଥିବା ବାମପନ୍ଥୀ ସରକାରର ପତନ ହେବ। ନ୍ୟୁଜ୍ ଏକ୍ସର ସର୍ଭେ ଅନୁଯାୟୀ ୬୦ ଆସନ ବିଶିଷ୍ଟ ତ୍ରିପୁରା ବିଧାନସଭାରେ ବିଜେପି ଓ ଏହାର ସହଯୋଗୀ ଆଇପିଏଫଟି ୩୫ରୁ ୪୫ଟି ଆସନରେ ବିଜୟୀ ହେବ। ବର୍ତ୍ତମାନର ଶାସକ ଦଳ ସିପିଆଇ(ଏମ୍) ୧୨ରୁ ୨୩ଟି ଆସନ ପାଇବ। ଆକ୍ସିସ ମାଇଁ ଇଣ୍ଡିଆର ସର୍ଭେ ଅନୁଯାୟୀ ବିଜେପି ମେଣ୍ଟ ଏଠାରେ ୪୫ରୁ ୫୦ଟି ଆସନ ପାଇବ ଓ ବାମଦଳ ୯ରୁ ୧୦ଟି ଆସନ ପାଇବ।
ତେବେ ନାଗାଲାଣ୍ଡ ଓ ମେଘାଳୟରେ କିଏ ସରକାର ଗଠନ କରିବ ତାର ସ୍ପଷ୍ଟ ସଙ୍କେତ ମିଳିପାରି ନାହିଁ। ତେବେ ମେଘାଳୟରେ କଂଗ୍ରେସ ସରକାରର ପତନ ହେବାର ଆଶଙ୍କା ରହିଛି। ଆକ୍ସିସ ମାଇଁ ଇଣ୍ଡିଆର ସର୍ଭେ ଅନୁଯାୟୀ ୬୦ ଆସନ ବିଶିଷ୍ଟ ମେଘାଳୟରେ ବିଜେପିକୁ ୩୦ଟି ଆସନ ମିଳିବ, କଂଗ୍ରେସକୁ ୨୦, ପିଡିଏଫକୁ ୨ ଓ ଅନ୍ୟାନ୍ୟ ଦଳକୁ ୪ଟି ଆସନ ମିଳିବ। ତେବେ ନ୍ୟୁଜ୍ ଏକ୍ସର ସର୍ଭେ ଅନୁଯାୟୀ ବିଜେପିରୁ ୮ରୁ ୧୨ଟି ଆସନ, କଂଗ୍ରେସକୁ ୧୩ରୁ ୧୭ ଆସନ ଓ କନରାଡ ସାଙ୍ଗମାଙ୍କ ନେତୃତ୍ୱ ନ୍ୟାସନାଲ ପିପୁଲ୍ସ ପାର୍ଟିକୁ ୨୩ରୁ ୨୭ ଆସନ ମିଳିବ।
ନାଗାଲାଣ୍ଡରେ ସରକାର ଗଠନ ନେଇ ଅସ୍ପଷ୍ଟ ସୂଚନା ମିଳିଛି। ନ୍ୟୁଜ୍ ଏକ୍ସର ସର୍ଭେ ଅନୁଯାୟୀ ୬୦ ଆସନ ବିଶିଷ୍ଟ ନାଗାଲାଣ୍ଡରେ ବିଜେପି ଓ ଏହାର ସହଯୋଗୀ ଦଳକୁ ୨୭ରୁ ୩୨ଟି ଆସନ ମିଳିବ। ଶାସକ ନାଗାଲାଣ୍ଡ ପିପୁଲ୍ସ ଫ୍ରଣ୍ଟକୁ ୨୦ରୁ ୨୫ ଆସନ ଓ କଂଗ୍ରେସକୁ ୨ଟି ଆସନ ମିଳିବ।
ଫେବୃଆରୀ ୧୮ରେ ତ୍ରିପୁରା ବିଧାନସଭା ପାଇଁ ଭୋଟ ଗ୍ରହଣ ହୋଇଥିବାବେଳେ ଫେବୃଆରୀ ୨୭ରେ ମେଘାଳୟ ଓ ନାଗାଲାଣ୍ଡରେ ଭୋଟ ଗ୍ରହଣ ହୋଇଥିଲା। ମାର୍ଚ୍ଚ ୩ରେ ଏହି ସବୁ ନିର୍ବାଚନର ଭୋଟ ଗଣତି ହେବ। ଭୋଟ ଗଣତି ପରେ ବାସ୍ତବ ଫଳ ମିଳିବ।
