ସମ୍ବଲପୁର : ସମ୍ବଲପୁର ଦେଇ ନିୟମିତ ରାଜ୍ୟ ବାହାରକୁ ବେଆଇନ ଗଞ୍ଜେଇ ଚାଲାଣ କରାଯାଉଥିବାରୁ ଅବକାରୀ ବିଭାଗ ପାଟ୍ରୋଲିଂ ଓ ଚେକିଂ କରୁଛି। ଏହି କ୍ରମରେ ସୋମବାର ଅଇଁଠାପାଲି ଥାନା ସମ୍ମୁଖ ଦେଇ ଚାଲାଣ ହେଉଥିବା ଗଞ୍ଜେଇ ସମେତ ବୋଲେରୋ ଗାଡିକୁ ଅବକାରୀ ଦଳ ଧରିଛି। ଏଥିସହ ୩ ଜଣଙ୍କୁ ଗିରଫ କରାଯାଇଛି।
ଅବକାରୀ ଦଳ ଅଇଁଠପାଲି ଥାନା ନିକଟରେ ଥିବା ବାଟ ମଙ୍ଗଳା ମନ୍ଦିର ସମ୍ମୁଖରେ ଗାଡିକୁ ଅଟକାଇଥିଲେ। ଯାଞ୍ଚ ସମୟରେ ଲୁକ୍କାୟିତ ଭାବରେ ୨ଟି ଜରି ବସ୍ତାରେ ରଖାଯାଇଥିବା ୪୨ କିଗ୍ରା ଅବୈଧ ଗଞ୍ଜେଇକୁ ଜବତ କରାଯାଇଥିଲା। ଏହି ଗଞ୍ଜେଇକୁ ସୋନପୁର ଜିଲାରୁ ଛତିଶଗଡ଼ ରାଜ୍ୟକୁ ଚାଲାଣ କରାଯାଉଥିବା ତଦନ୍ତ ସମୟରେ ଜଣାପଡ଼ିଛି। ଗାଡିରେ ଗଞ୍ଜେଇ ଚାଲାଣ କରୁଥିବା ଅଭିଯୋଗରେ ଅବକାରୀ ପୁଲିସ ବିହାର ରାଜ୍ୟ ଭୋଜପୁର ଜିଲା ନିବାସୀ ବିନୋଦ କୁମାର(୪୪), ବଲାଙ୍ଗୀର ଜିଲା ନିବାସୀ ଦତ୍ତରାମ ଭୋଇ(୪୦) ଏବଂ ଫଗୁଣ ବଘାର(୪୬)ଙ୍କୁ ଗିରଫ କରିଛି। ଏକ ମାମଲା ରୁଜୁ କରି ଅବକାରୀ ବିଭାଗ ଅଭିଯୁକ୍ତମାନଙ୍କୁ ଅଦାଲତକୁ ଚାଲାଣ କରିଛି। ଏହି ଘଟଣାରେ ଜବତ ହୋଇଥିବା ଗଞ୍ଜେଇ ଓ ଗାଡିର ଆନୁମାନିକ ମୂଲ୍ୟ ୯ ଲକ୍ଷ ଟଙ୍କା ହେବ ଏବଂ ନିଶା ଉପରେ ଚଢ଼ଉ ଅଭିଯାନ ଆଗକୁ ମଧ୍ୟ ଜାରି ରହିବ ବୋଲି ଅବକାରୀ ଡେପୁଟି କମିଶନର ରାଜେନ୍ଦ୍ର ଭୋତ୍ରା କହିଛନ୍ତି।
