ମାଞ୍ଚେଷ୍ଟର: ଇଂଲଣ୍ଡ ଓ ପାକିସ୍ଥାନ ମଧ୍ୟରେ ମାଞ୍ଚେଷ୍ଟରରେ ହୋଇଥିବା ପ୍ରଥମ ଟେଷ୍ଟ ମ୍ୟାଚରେ ଇଂଲଣ୍ଡ ବିଜୟୀ ହୋଇଛି । ଏହା ସହିତ ଘରୋଇ ଦଳ ଟେଷ୍ଟ ସିରିଜରେ ୧-୦ରେ ଅଗ୍ରଣୀ ହାସଲ କରିଛି । ଦ୍ବିତୀୟ ଟେଷ୍ଟ ଆସନ୍ତା ୧୩ ତାରିଖରେ ଖେଳାଯିବ । ଦ୍ବିତୀୟ ଇନିଂସରେ ଜୋସ ବଟଲର୍ ୭୫ ଓ କ୍ରିସ ଭୋକ୍ସ ଅପରାଜିତ ୮୪ ରନ କରି ଦଳର ବିଜୟ ରାସ୍ତା ପରିଷ୍କାର କରିଛନ୍ତି । ଜୋସ ବଟଲର ଓ କ୍ରିସ ଷଷ୍ଠ ୱିକେଟ୍ ନିମନ୍ତେ ୧୩୯ ରନ୍ ସଂଗ୍ରହ କରିଥିଲେ, ଯାହା ଅତ୍ୟନ୍ତ ଗୁରୁତ୍ଵପୂର୍ଣ୍ଣ ଥିଲା । କ୍ରିସ୍ ଭୋକ୍ସଙ୍କୁ ମ୍ୟାନ ଅଫ୍ ଦି ମ୍ୟାଚ ପୁରସ୍କାର ମିଳିଛି ।
୧୧୭ ରନରେ ୫ଟି ୱିକେଟ ପତନ ପରେ ଇଂଲଣ୍ଡ ସଙ୍କଟଜନକ ସ୍ଥିତିରେ ପହଞ୍ଚି ଯାଇଥିଲା । ମାତ୍ର ବଟଲର୍ ଓ ଭୋକ୍ସ କ୍ରିଜକୁଆସିବା ପରେ ପରିସ୍ଥିତି ବଦଳି ଯାଇଥିଲା । ଉଭୟ ପାକ୍ ବୋଲରମାନଙ୍କୁ କୌଣସି ସୁଯୋଗ ଦେଇ ନ ଥିଲେ । ଶେଷରେ ପାକ୍ ସ୍ପିନର ୟାସିର ଶାହା ବଟଲରଙ୍କୁ ଆଉଟ କରିବା ପରେ ଏହି ଯୋଡ଼ି ଭାଙ୍ଗିଥିଲା । ବଟଲର୍ ୧୦୧ ବଲ୍ ସମ୍ମୁଖୀନ ହୋଇ ୭ଟି ଚୌକା ଓ ଗୋଟିଏ ଛକ୍କା ମାରିଥିଲେ । ବଟଲର ଆଉଟ ହେବା ବେଳକୁ ବିଜୟ ପାଇଁ ଇଂଲଣ୍ଡକୁ ଆଉ ୨୧ ରନ୍ ଆବଶ୍ୟକ ଥିଲା ଓ ଏହାକୁ ଅନ୍ୟ ଖେଳାଳିମାନେ ହାସଲ କରି ନେଇଥିଲେ ।
ଏହି ଟେଷ୍ଟରେ ପ୍ରଥମେ ବ୍ୟାଟିଂ କରି ପାକିସ୍ଥାନ ୩୨୬ ରନ୍ ସଂଗ୍ରହ କରିଥିଲା ଓ ପ୍ରଥମ ଇନିଂସରେ ଇଂଲଣ୍ଡ ମାତ୍ର ୨୧୯ ରନ୍ କରି ଅଲ ଆଉଟ ହୋଇଥିଲା । ପ୍ରଥମ ଇଂନିସରେ ପଛୁଆ ଥିବା ଇଂଲଣ୍ଡ ପାକିସ୍ଥାନର ଦ୍ବିତୀୟ ଇଂନିସକୁ ମାତ୍ର ୧୬୯ ରନରେ ସୀମିତ ରଖିବାକୁ ସକ୍ଷମ ହୋଇଥିଲା । ବିଜୟ ପାଇଁ ଆବଶ୍ୟକ ୨୭୭ ରନ୍ ନିଜର ଦ୍ବିତୀୟ ପାଳିରେ ଇଂଲଣ୍ଡ ୭ ୱିକେଟ ହରାଇ ସଂଗ୍ରହ କରିଥିଲା ।
