ପାଟଣା: ପାଟଣା ବନାଞ୍ଚଳ ଅନ୍ତର୍ଗତ ସରାସକୋଲା ପଞ୍ଚାୟତ ତୁଳସୀପୁର ଗ୍ରାମର ପ୍ରାକୃତିକ ପରିବେଶରେ ଗଢି ଉଠିଥିବା ହରିହରାନନ୍ଦ ଆଶ୍ରମ ପରିସରରେ ୨୯ ଟିକିଆ ହାତୀପଲ ସୋମବାର ଭଙ୍ଗାରୁଜା କରିଛନ୍ତି। ହାତୀ ଉପଦ୍ରବ ଯୋଗୁ ଆଶ୍ରମର ପ୍ରାକୃତିକ ପରିବେଶ ନଷ୍ଟ ହୋଇଯାଇଛି। ଏହି ହାତୀପଲରୁ ସୋମବାର ଦିନ ତମାମ ୮ଟି ହାତୀ ଆଶ୍ରମ ପରିସର ଛାଡ଼ି କୁଆଡ଼େ ଯାଇ ନ ଥିଲେ। ହାତୀପଲ ଆଶ୍ରମ ପରିସର କଦଳୀ ବଗିଚା ନଷ୍ଟ କରିବା ସହ ୨ଟି ନଡ଼ିଆ ଗଛ ଉପାଡି ଦେବା ପରେ ଆଶ୍ରମ ଘରର ୨ଟି ସିମେଣ୍ଟ ଖୁଣ୍ଟ ଭାଙ୍ଗି ଦେଇଛନ୍ତି।
ଏହା ଛଡ଼ା ଗ୍ରାମ ସଂଲଗ୍ନ ଜିଆଣିସାହିରେ ୨ଟି ଘର ଭାଙ୍ଗି ହାତୀପଲ ଧାନ ଚାଉଳ ଖାଇବା ସହ ତୁଳସୀପୁର ଅଙ୍ଗନବାଡି କେନ୍ଦ୍ର ଝରକା ଭାଙ୍ଗି ପିଲାମାନଙ୍କ ପାଇଁ ଗଚ୍ଛିତ ଥିବା ଖାଦ୍ୟ ସାମଗ୍ରୀ ଖାଇ ଦେଇଛନ୍ତି। ଏହି ହାତୀପଲ ସପ୍ତାହେ ହେଲା ବନାଞ୍ଚଳରେ ଉପଦ୍ରବ ଜାରି ରଖି ୪୦ ରୁ ଅଧିକ ଘର ଆଂଶିକ ଭାଙ୍ଗି ସାରିଲେଣି। ଏହାଛଡା ଗୋଟିଏ ଗୋଠ ଛଡା ଦନ୍ତା ଏହି ଦଳରେ ସାମିଲ ହେବା ପରେ ଦଳରେ ହାତୀ ସଂଖ୍ୟା ୩୦ରେ ପହଞ୍ଚି ଥିବାବେଳେ ଏହି ବନାଞ୍ଚଳ ଅନ୍ତର୍ଗତ ବଣମହୁଲଡିହା ଜଙ୍ଗଲରେ ୯ ଟିକିଆ ହାତୀପଲ ଡେରା ପକାଇଥିବା ଜଣାପଡିଛି।
