ଭୁବନେଶ୍ୱର: ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତି ବିଦ୍ୟା ଉପଦେଷ୍ଟା ଅନୁଭବ ପଟ୍ଟନାୟକ ଆଜି ଦୁଇଦିନିଆ ବାଲେଶ୍ୱର ଗସ୍ତରେ ଯାଇ ଜିଲାର ବିଭିନ୍ନ ଅନୁଷ୍ଠାନ ଏବଂ କାର୍ୟ୍ୟାଳୟ ବୁଲି ଇଣ୍ଟରନେଟ ଓ ପ୍ରଯୁକ୍ତିବିଦ୍ୟାର ବ୍ୟବହାର ନେଇ ତଦାରଖ କରିଛନ୍ତି।
ପ୍ରଥମେ ଶ୍ରୀ ପଟ୍ଟନାୟକ ବାଲେଶ୍ୱର ଜିଲା ରେମୁଣା ବ୍ଲକ ଅନ୍ତର୍ଗତ ବରୁଣସିଂ ପଞ୍ଚାୟତ କାର୍ୟ୍ୟାଳୟ ଠାରେ ପହଞ୍ଚି ସେଠାକାର ଇଣ୍ଟରନେଟ ସେବା ଏବଂ କମ୍ପ୍ୟୁଟରର ଉପଯୋଗ କିଭଳି ହେଉଛି ତାହା ଦେଖିଵା ସହ ରାଜ୍ୟ ସରକାରଙ୍କ ଦ୍ୱାରା ଉପଲବ୍ଧ ସୁବିଧା ଗୁଡିକର ସଦୁପଯୋଗ ପାଇଁ ସରପଞ୍ଚ, ସମିତିସଭ୍ୟା ଏବଂ କର୍ମଚାରୀଙ୍କୁ ପରାମର୍ଶ ଦେଇଥିଲେ। ଏଥିସହ ସେ ମୋ ସେବା କେନ୍ଦ୍ର ଯାଇ ଲୋକଙ୍କୁ ମିଳୁଥିବା ସେବା ଏବଂ ଇଣ୍ଟରନେଟ ଯୋଗାଯୋଗ ବ୍ୟବସ୍ଥା ବିଷୟରେ ଆଲୋଚନା କରିଥିଲେ।
ଏହାପରେ ନୀଳଗିରି ରୋଡ ୫-ଟି ସ୍କୁଲ ପରିଦର୍ଶନରେ ଯାଇ ଅତ୍ୟାଧୁନିକ ଶିକ୍ଷା ବ୍ୟବସ୍ଥା ଆଦିକୁ ବୁଲି ଦେଖିବା ସହ ସ୍ମାର୍ଟ ବୋର୍ଡର ଉପଯୋଗ ଛାତ୍ରଛାତ୍ରୀଙ୍କ ଶିକ୍ଷା ଗ୍ରହଣରେ ପରିବର୍ତ୍ତନ ଆଣିପାରିଛି ବୋଲି କହିଥିଲେ। ଏହା ଛାତ୍ରଛାତ୍ରୀଙ୍କ ଉଜ୍ଜଳ ଭବିଷ୍ୟତ ଗଢିବାରେ ସହାୟକ ହୋଇପାରିଛି ବୋଲି କହିଥିଲେ।
ଏହାପରେ ନୂଆଗାଁ, ରଣସାହି ପଞ୍ଚାୟତ ସହ ରେମୁଣା ଓ ସଦର ବ୍ଲକ ଯାଇ ସମସ୍ତ ଇ ସେବାର ବହୁଳ ଉପଯୋଗ ତଥା ଜନସାଧାରଣଙ୍କୁ ସମସ୍ତ ସୁବିଧା ଯୋଗାଇବା ନେଇ ଉପସ୍ଥିତ ଅଧିକାରୀମାନଙ୍କୁ ପରାମର୍ଶ ଦେଇଥିଲେ। ଏହି ଗସ୍ତ ଅବସରରେ ରେମୁଣା ବିଧାୟକ ସୁଧାଂଶୁ ଶେଖର ପରିଡା, ବାଲେଶ୍ୱର ବ୍ଲକ ଅଧକ୍ଷ, ଜିଲା ଡିଇଜିଏମ, ଜିଲା ଶିକ୍ଷା ଅଧିକାରୀ, ବ୍ଲକ ପ୍ରଶାସନ ଅଧିକାରୀ, ସ୍ଥାନୀୟ ସରପଞ୍ଚ ଉପସ୍ଥିତ ଥିଲେ।
