ଭୁବନେଶ୍ୱର: ପଞ୍ଜାବର ପାଟିିଆଲାରେ ଚାଲିଥିବା ଇଣ୍ଡିଆନ ଗ୍ରାଁ ପ୍ରି-୧ ରେ ଓଡ଼ିଶା ପ୍ରତିଯୋଗୀ ପ୍ରଥମ ଦିନରେ ଗୋଟିଏ ସ୍ୱର୍ଣ୍ଣ ଓ ଗୋଟିଏ ବ୍ରୋଞ୍ଜ ପଦକ ହାସଲ କରିଛନ୍ତି। ମହିଳା ୧୦୦ ମିଟର ଦୌଡ଼ରେ ଦୁତି ଚାନ୍ଦ ସ୍ୱର୍ଣ୍ଣ ପଦକ ହାସଲ କରିଛନ୍ତି। ଦୁତି ୧୦୦ମିଟର ଦୌଡ଼କୁ ୧୧.୫୭ ସେକେଣ୍ଡରେ ଅତିକ୍ରମ କରିଥିଲେ। ତେବେ ସ୍ୱର୍ଣ୍ଣପଦକ ଜିତିବା ସତ୍ତ୍ୱେ ଦୁତି ଚାନ୍ଦ ଗୋଲ୍ଡକୋଷ୍ଟ ରାଜ୍ୟଗୋଷ୍ଠୀ କ୍ରୀଡ଼ା ଲାଗି ଯୋଗ୍ୟତା ଅର୍ଜନ କରି ପାରିନାହାନ୍ତି। ମହିଳା ୧୦୦ ମିଟର ଦୌଡ଼ରେ ରାଜ୍ୟଗୋଷ୍ଠୀ କ୍ରୀଡ଼ା ଲାଗି ଯୋଗ୍ୟତା ଟାଇମିଂ ୧୧.୧୬ ସେକେଣ୍ଡ ଥିବା ବେଳେ ଦୁତି ମାତ୍ର ୧୧.୫୭ ସେକେଣ୍ଡରେ ଫିନିସ୍ ଲାଇନ୍ ପାର କରିଥିଲେ।
ସେହିପରି ମହିଳା ଲଙ୍ଗଜମ୍ପରେ ପୂର୍ଣ୍ଣିମା ହେମ୍ବ୍ରମ ବ୍ରୋଞ୍ଜ ପଦକ ହାସଲ କରିଛନ୍ତି। ପୂର୍ଣ୍ଣିମା ୫.୯୯ ମିଟର ଦୂରତା ଡେଇଁ ତୃତୀୟ ସ୍ଥାନ ହାସଲ କରିଥିଲେ। ଅନ୍ୟପକ୍ଷରେ ଓଡ଼ିଆ ଧାବକ ଅମୀୟ ମଲ୍ଲିକ ୧୦୦ମିଟର ଦୌଡ଼ରେ ବିଫଳ ହୋଇଥିଲେ। ଅମୀୟ ଫାଇନାଲ ରାଉଣ୍ଡକୁ ଉନ୍ନୀତ ହୋଇଥିଲେ ମଧ୍ୟ ୧୦.୯୬ ସେକେଣ୍ଡରେ ଦୂରତା ଅତିକ୍ରମ କରି ଷଷ୍ଠ ସ୍ଥାନରେ ରହିଥିଲେ। ରାଜ୍ୟଗୋଷ୍ଠୀ କ୍ରୀଡ଼ା ନିମନ୍ତେ ଯୋଗ୍ୟତା ହାସରେ ମଧ୍ୟ ଅମିୟ ବିଫଳ ହୋଇଛନ୍ତି। ଆମେରିକୀୟ ପ୍ରଶିକ୍ଷକ ତାଇୱା ଆରିଓଙ୍କ ନିକଟରୁ ୩ ସପ୍ତାହ ଧରି ପ୍ରଶିକ୍ଷଣ ହାସଲ କରିଥିବା ଅମିୟ ୧୦୦ମିଟର ଦୌଡ଼ରେ ବିଫଳ ହୋଇଥିବା ବେଳେ ୨୦୦ ମିଟର ଦୌଡ଼ରେ ଅଂଶଗ୍ରହଣ କରିବେ। ଅନ୍ୟପକ୍ଷରେ ପ୍ରଥମଦିନରେ ଜାଭେଲିନ୍ ଥ୍ରୋଅର ନୀରଜ ଚୋପ୍ରା, ଲଙ୍ଗ୍ଜମ୍ପର ନୟନା ଜେମ୍ସ ଓ ମହିଳା ଡିସ୍କସ ଥ୍ରୋଅର ନବନୀତ କୌର ଧିଲୋଁ ସେମାନଙ୍କ ଇଭେଣ୍ଟରେ ସ୍ୱର୍ଣ୍ଣପଦକ ଜିତିବା ସହ ରାଜ୍ୟଗୋଷ୍ଠୀ କ୍ରୀଡ଼ା ପାଇଁ ଯୋଗ୍ୟତା ହାସଲ କରି ପାରିଛନ୍ତି।
ଇଣ୍ଡିଆନ୍ ଗ୍ରାଁ ପ୍ରି-୧ ଦୌଡ଼କୁଦ: ଦୁତିଙ୍କୁ ସ୍ୱର୍ଣ୍ଣ ଓ ପୂର୍ଣ୍ଣିମାଙ୍କୁ ବ୍ରୋଞ୍ଜ୍
Popular Categories
Previous article
Next article