ରାଜଗାଙ୍ଗପୁର: ସତ୍ୟର ଅନୁସନ୍ଧାନ ହିଁ ବିଜ୍ଞାନ। ବିଜ୍ଞାନ ମାଧ୍ୟମରେ ସମାଜର ବିକାଶ ସାଧିତ ହୋଇଥାଏ। ବିଜ୍ଞାନକୁ ବିନାଶରେ ନୁହେଁ ବିକାଶରେ ବ୍ୟବହାର କରାଯିବା ଉଚିତ। ଧ୍ୱଂସ ପାଇଁ ମିସାଇଲ ତିଆରି କରିବା ପରିବର୍ତ୍ତେ ବିକାଶ ମିସାଇଲ ତିଆରି କରିବା ଦରକାର। ଏହା କେବଳ ଭାରତ ହିଁ କରି ପାରିବ ବୋଲି ରାଜ୍ୟପାଳ ପ୍ରଫେସର ଗଣେଶୀ ଲାଲ ପ୍ରକାଶ କରିଛନ୍ତି।
ଡ. ନୀଳାଞ୍ଚଳ ସାହୁଙ୍କର ପ୍ରଥମ ଶ୍ରଦ୍ଧାଞ୍ଜଳି ସଭାରେ ମୁଖ୍ୟ ଅତିଥି ଭାବରେ ଯୋଗ ଦେଇ ରାଜ୍ୟପାଳ ପ୍ରଫେସର ଗଣେଶୀ ଲାଲ କହିଛନ୍ତି ଯେ ସ୍ୱର୍ଗୀୟ ଡକ୍ଟର ନୀଳାଚଳ ସାହୁ ଏକ ବିରଳ ବ୍ୟକ୍ତିତ୍ୟର ଅଧିକାରୀ, ଯିଏ ବିଜ୍ଞାନକୁ ଦେଶର ବିକାଶ ପାଇଁ ବ୍ୟବ୍ୟହାର କରୁଥିଲେ। ବିଜ୍ଞାନ ଓ ପ୍ରଯୁକ୍ତି ବିଦ୍ୟା ଆମର ଜୀବନକୁ ସୁରକ୍ଷିତ ରଖିଥାଏ। ଏହାସହିତ ବିଜ୍ଞାନ ଆମ ଜୀବନକୁ ଦୀର୍ଘଜୀବୀ ରଖିବାରେ ସହାୟକ ହୋଇଥାଏ। ବିଜ୍ଞାନକୁ ସାମାଜିକ ଓ ଅର୍ଥନୈତିକ କ୍ଷେତ୍ରରେ ସଂପ୍ରସାରିତ କରି ଏକ ସୁସ୍ଥ ସମୃଦ୍ଧଶାଳୀ ସମାଜ ଗଠନ କରିବାକୁ ରାଜ୍ୟପାଳ ଆହ୍ବାନ ଦେଇଥିଲେ।
