ଓ୍ବାଶିଂଟନ୍: ୪ ଭାରତୀୟ କମ୍ପାନୀ ଉପରେ ପ୍ରତିବନ୍ଧକ ଲଗାଇଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଇରାନର ପେଟ୍ରୋଲିୟମ ଓ ପେଟ୍ରୋକେମିକାଲ୍ ଶିଳ୍ପ ସହ ଜଡ଼ିତ ମୋଟ୍ ୧୬ଟି କମ୍ପାନୀ ଉପରେ ଆମେରିକା ପ୍ରତିବନ୍ଧକ ଲଗାଇଛି, ଯେଉଁଥିରେ ୪ଟି ଭାରତୀୟ କମ୍ପାନୀ ମଧ୍ୟ ସାମିଲ ଅଛି। ଏହି କାର୍ଯ୍ୟାନୁଷ୍ଠାନ ଆମେରିକା ପ୍ରଶାସନର ଇରାନ ଉପରେ ଲାଗିଥିବା ପ୍ରତିବନ୍ଧକକୁ ଆହୁରି କଡ଼ାକଡ଼ି କରିବା ଅଭିଯାନର ଏକ ଅଂଶ।
ଆମେରିକାର ଅର୍ଥ ବିଭାଗ ପକ୍ଷରୁ ଜାରି ବୟାନ ଅନୁସାରେ, ପ୍ରତିବନ୍ଧକ ଲାଗିଥିବା ୪ ଭାରତୀୟ କମ୍ପାନୀ ହେଉଛି, ଅଷ୍ଟିନସିପ୍ ମ୍ୟାନେଜମେଣ୍ଟ ପ୍ରାଇଭେଟ୍ ଲିମିଟେଡ୍, ବିଏସ୍ଏମ୍ ମେରାଇନ୍ ଏଲଏଲପି, କସ୍ମୋସ୍ ଲାଇନ୍ସ ଇନକ୍ ଏବଂ ଫ୍ଲକ୍ସ ମେରିଟାଇମ୍ ଏଲଏଲପି। ତେବେ ଏହି ପ୍ରତିବନ୍ଧକକୁ ନେଇ ଭାରତ ପକ୍ଷରୁ ଏପର୍ଯ୍ୟନ୍ତ କୌଣସି ବିଧିବଦ୍ଧ ପ୍ରତିକ୍ରିୟା ଆସିନାହିଁ। ଉଭୟ ଇରାନ ଏବଂ ଆମେରିକା ସହିତ ଭାରତର ଭଲ ସମ୍ପର୍କ ରହିଛି, କିନ୍ତୁ ଏହି ପଦକ୍ଷେପ ଦ୍ଵାରା ଭାରତୀୟ କମ୍ପାନୀଗୁଡ଼ିକର କ୍ଷତି ହୋଇପାରେ।
ଆମେରିକାର ବୈଦେଶିକ ବିଭାଗ କହିଛି ଯେ, ଇରାନର ପେଟ୍ରୋଲିୟମ ଏବଂ ପେଟ୍ରୋକେମିକାଲ୍ ଶିଳ୍ପ ସହିତ ବ୍ୟବସାୟିକ ସମ୍ପର୍କ ଥିବାରୁ ଏହି କମ୍ପାନୀଗୁଡ଼ିକ ଉପରେ ପ୍ରତିବନ୍ଧକ ଲଗାଯାଇଛି। ଆମେରିକା କହିଛି ଯେ, ସେ ଇରାନର ବେଆଇନ ପରିବହନ ନେଟୱର୍କକୁ ଭାଙ୍ଗିବାକୁ ଚେଷ୍ଟା କରୁଛି, ଯାହା ଏସିଆର ବିଭିନ୍ନ ଦେଶକୁ ଇରାନ ତେଲ ବିକ୍ରି କରିବାରେ ସକ୍ରିୟ ଅଛି। ଇରାନର ଅର୍ଥନୈତିକ କାର୍ଯ୍ୟକଳାପ ଉପରେ କଟକଣା ଲଗାଇବା ଏବଂ ଆତଙ୍କବାଦକୁ ଆର୍ଥିକ ସହାୟତା ରୋକିବା ପାଇଁ ଆମେରିକା ପ୍ରଶାସନ ପକ୍ଷରୁ ଏହି ପଦକ୍ଷେପ ଗ୍ରହଣ କରାଯାଇଥିବା କୁହାଯାଇଛି।
