ନୂଆଦିଲ୍ଲୀ: କର୍ଣ୍ଣାଟକର କଂଗ୍ରେସ-ଜେଡିଏସ ସରକାର ଭାଙ୍ଗିବାରେ ମଙ୍ଗ ଧରି ଅଯୋଗ୍ୟ ଘୋଷିତ ହୋଇଥିବା ୧୭ ବିଧାୟକଙ୍କ ମଧ୍ୟରୁ ୧୬ ଜଣ ଶେଷରେ ବିଜେପିରେ ସାମିଲ ହୋଇଛନ୍ତି। ବୁଧବାର ସେମାନେ ବିଜେପିରେ ମିଶିଥିବାବେଳେ ଗୁରୁବାର ସେମାନଙ୍କ ମଧ୍ୟରୁ ୧୩ ଜଣଙ୍କୁ ଉପନିର୍ବାଚନ ପାଇଁ ଟିକେଟ ଦିଆଯାଇଛି।
ଆସନ୍ତା ଡିସେମ୍ବର ୫ରେ ଉପନିର୍ବାଚନ ଅନୁଷ୍ଠିତ ହେବ। ଏହା ପୂର୍ବରୁ କଂଗ୍ରେସ ଏବଂ ଜେଡିଏସର ଏହି ବିଦ୍ରୋହୀ ବିଧାୟକମାନେ ବିଜେପିରେ ଯୋଗଦେଇଛନ୍ତି। ବୁଧବାର ସକାଳେ ମୁଖ୍ୟମନ୍ତ୍ରୀ ବି.ଏସ. ୟେଦୁରପ୍ପା ସେମାନଙ୍କୁ ଦଳକୁ ସ୍ବାଗତ କରିଛନ୍ତି। ଏହି ବିଧାୟକମାନେ ଭବିଷ୍ୟତର ବିଧାୟକ ଏବଂ ମନ୍ତ୍ରୀ ବୋଲି ଏହି ଅବସରରେ ୟେଦୁରପ୍ପା କହିଛନ୍ତି। ୧୭ ବିଦ୍ରୋହୀ ବିଧାୟକଙ୍କ ତ୍ୟାଗ ଏବଂ ସେମାନେ ବିଧାୟକ ଓ ମନ୍ତ୍ରୀ ପଦ ଛାଡ଼ିବାରୁ ମୁଁ ମୁଖ୍ୟମନ୍ତ୍ରୀ ଭାବେ ଶପଥ ନେବାରେ ସକ୍ଷମ ହୋଇଛି ବୋଲି ୟେଦୁରପ୍ପା କହିଛନ୍ତି।
ବିଜେପିରେ ସାମିଲ ହୋଇ ଉପନିର୍ବାଚନ ଟିକେଟ ପାଇଥିବା କଂଗ୍ରେସର ଅଯୋଗ୍ୟ ବିଧାୟକମାନେ ହେଲେ ମହେଶ କୁମାତାଲି, ଶ୍ରୀମନ୍ଥଗୌଡ଼ ପାଟିଲ, ରମେଶ ଜରକିହୋଲି, ଶିବରାମ ହେବର, ବି.ସି. ପାଟିଲ, ଆନନ୍ଦ ସିଂହ, କେ. ସୁଧାକର, ବାଇରାତି ବସୱାରାଜ, ଏସ. ଟି. ଶୋମସେକର ଏବଂ ଏମଟିବି ନାଗରାଜ। ସେହିପରି ବିଜେପିରୁ ଟିକେଟ ପାଇଥିବା ଜେଡିଏସର ବିଦ୍ରୋହୀ ବିଧାୟକମାନେ ହେଲେ କେ. ଗୋପାଲାୟା, ଏ.ଏଚ. ବିଶ୍ଵନାଥ ଏବଂ କେ. ସି. ନାରାୟଣ ଗୌଡ଼ା।
