ହୀରାକୁଦ : ଗତ ୧୭ ତାରିଖରୁ ସମ୍ବଲପୁର ଜିଲା ହୀରାକୁଦରେ ଝାଡ଼ାବାନ୍ତି ବ୍ୟାପିଥିଲା। ପୂର୍ବରୁ ୨ଜଣଙ୍କ ମୃତ୍ୟୁ ଘଟିଥିବା ବେଳେ ବୁଧବାର ରାତିରେ ପୁଣି ଜଣେ ଆକ୍ରାନ୍ତଙ୍କର ମୃତ୍ୟୁ ଘଟିଛି। ଯମୁନା ବେହେରା ଚିକିତ୍ସାଧୀନ ଅବସ୍ଥାରେ ବୁର୍ଲା ବଡ଼ଡାକ୍ତରଖାନାରେ ମୃତ୍ୟୁବରଣ କରିଛନ୍ତି। ତେବେ ସ୍ବାସ୍ଥ୍ୟ ବିଭାଗ ଓ ଜନସ୍ବାସ୍ଥ୍ୟ ବିଭାଗର ମିଳିତ ଉଦ୍ୟମରେ ଆକ୍ରାନ୍ତ ସଂଖ୍ୟା ନିୟନ୍ତ୍ରଣରେ ରହିଛି। ବୁଧବାରଠାରୁ ବିଶୋଧନାଗାରରେ କ୍ଲୋରିନ ମାତ୍ରା ବଢାଇବା ପରେ ଆକ୍ରାନ୍ତ ସଂଖ୍ୟା କମିଥିବା ବିଭାଗ ପକ୍ଷରୁ କୁହାଯାଇଛି। ସେହିପରି ସହରରେ ଫାଟିଥିବା ଜଳଯୋଗାଣ ପାଇପର ମରାମତି ଚାଲିଛି। ହୀରାକୁଦ ଡାକ୍ତରଖାନାରେ ମାତ୍ର ଜଣେ ଆକ୍ରାନ୍ତ ଚିକିତ୍ସା ହେଉଛନ୍ତି। ୱାଟ୍କୋର ଚିଫ୍ ଅପରେଟିଂ ଅଧିକାରୀ ଶରତ ଚନ୍ଦ୍ର ମିଶ୍ରଙ୍କ କହିବାନୁସାରେ, ହୀରାକୁଦ ଜୟଗୁରୁ ମନ୍ଦିର ସମ୍ମୁଖରେ ଜଳଯୋଗାଣ ପାଇପ ଫାଟିଥିଲା, ତା’ର ମରାମତି କରାଯାଇଛି। ୱାଟ୍କୋ ପକ୍ଷରୁ ସହରର ଗଳିକନ୍ଦିରେ ନାଳ ଭିତରେ ଯାଇଥିବା ପାଣିପାଇପର ସଂଯୋଗ କରାଯାଇଛି । ଏବଂ ଅନ୍ୟ ସମସ୍ତ ଫଟା ପାଇପର ମରାମତି କରାଯାଉଛି। ଡାକବାଜି ଯନ୍ତ୍ର ସହାୟତାରେ ଲୋକଙ୍କୁ ସଚେତନ କରାଯାଇଛି। ଡାକ୍ତରଖାନାରେ ଚିକିତ୍ସାଧୀନ ଥିବା ୧୧ ରୋଗୀ ସୁସ୍ଥ ହେବାପରେ ଛାଡି ଦିଆଯାଇଛି। ୱାଟ୍କୋର ୪୧ ଜଣିଆ ଦଳ ବିଭିନ୍ନ ନାଳ ଭିତରେ ଯାଇଥିବା ପାଣିପାଇପ ବାହାର କରି ସେଠାରେ ନୂତନ ପାଇବ ବିଛାଯିବ ବୋଲି କୁହାଯାଇଛି। ଅନ୍ୟଏକ ସୂତ୍ରରୁ ଜଣାପଡିଛି, ହୀରାକୁଦ ଆଖପାଖ ଗ୍ରାମାଞ୍ଚଳରେ ଝାଡ଼ାବାନ୍ତି ବ୍ୟାପୁଛି। ଆକ୍ରାନ୍ତମାନେ କ୍ୱାକ୍ଙ୍କ ଦ୍ୱାରା ଚିକିତ୍ସା କରାଉଛନ୍ତି। ଅନେକ ଗ୍ରାମାଞ୍ଚଳକୁ ଡାକ୍ତରୀ ଦଳ ପହଞ୍ଚି ପାରିନାହାନ୍ତି। ଯମୁନାଙ୍କ ପରିବାର ଲୋକେ ତାଙ୍କ ମୃତ୍ୟୁ ପାଇଁ ଚିକିତ୍ସାକୁ ଦାୟୀ କରିଛନ୍ତି। ଗତ ୨୨ ତାରିଖ ଜରୁରୀ ପରିସ୍ଥିତିରେ ଯମୁନାଙ୍କୁ ହୀରାକୁଦ ଡାକ୍ତରଖାନାକୁ ଆଣିଥିଲେ। କିନ୍ତୁ ଶଯ୍ୟା ଅଭାବରୁ ତାଙ୍କୁ ସମ୍ବଲପୁର ଜିଲାମୁଖ୍ୟ ଚିକିତ୍ସାଳୟକୁ ନେଇଥିଲେ। ସେଠାରେ ଅବସ୍ଥା ଗୁରୁତର ହେବାରୁ ତାଙ୍କୁ ବୁର୍ଲା ବଡଡାକ୍ତରଖାନା ନିଆଯାଇଥିଲା। ସେଠାରେ ଚିକିତ୍ସାଧୀନ ଅବସ୍ଥାରେ ଯମୁନାଙ୍କର ମୃତ୍ୟୁ ଘଟିଛି ।
Comments are closed.