ନିଆରା ଢଙ୍ଗରେ ଦେବାଂଶୀଙ୍କ ଜନ୍ମଦିନ ପାଳିତ; ୨୫୦ ଚାରା ରୋପଣ ସହ ରକ୍ଷଣାବେକ୍ଷଣ ଦାୟିତ୍ୱ ନେଲେ ବାପା

ଧାମରା: ଧାମରାରେ ଏକ ନିଆରା ଢଙ୍ଗରେ କନ୍ୟାରତ୍ନଙ୍କ ଜନ୍ମ ଦିନ ପାଳିତ ହୋଇଛି । ଜନ୍ମ ଦିନରେ କନ୍ୟାର ପିତା ୨୫୦ ଚାରା ବଣ୍ଟନ କରିବା ସହ ସେହି ଚାରା ଗଛ ଗୁଡିକର ରୋପଣ ଏବଂ ତାହାର ରକ୍ଷଣାବେକ୍ଷଣ ଦାୟିତ୍ୱ ନେବେ ବୋଲି ପ୍ରତିଶ୍ରୁତି ଦେଇଛନ୍ତି । ଖବରରୁ ପ୍ରକାଶ ଗତକାଲି ନରସିଂହପୁର ଗ୍ରାମର ଦେବାଶିକ୍ଷ ନାୟକଙ୍କ କନ୍ୟା ଦେବାଂଶୀଙ୍କ ଜନ୍ମ ଦିନ ପାଳନ ଅବସରରେ ସମାଜସେବୀ ଦିଗମ୍ବର ଦାସ, ସୁରେଶ ମାହୁନ୍ତ, ଗୌରହରି ନାୟକ, ନରହରି ମଲିକ, ଧାମରା ଥାନାଧିକାରୀ ଶ୍ରୀକାନ୍ତ ପତି ଏବଂ ଅଂଚଳର ଜଣାଶୁଣା ପରମ ବୈଷ୍ଣବ ପ୍ରେମାନନ୍ଦ ଦାସ ବାବାଜୀ ମହାରାଜ, ପ୍ରକୃତିବନ୍ଧୁ ଶରତ ଦଳେଇ, ମାନ ଗୋବିନ୍ଦ ପରିଡା ପ୍ରମୁଖ ଉପସ୍ଥିତ ଥିଲେ ।

ଏହି ଜନ୍ମ ଦିନ ଅବସରରେ ଦେବାଶିଷ ନାୟକ ୨୫୦ରୁ ଊର୍ଦ୍ଧ୍ଵ ଆମ୍ବ, ପଣସ, ପିଜୁଳି, ସଫେଦା ସମେତ ବହୁ ପ୍ରକାରର ଫଳ ଗଛ ଚାରା ବଣ୍ଟନ କରିଥିଲେ । ଏହି ଚାରା ରୋପଣ ଏବଂ ରକ୍ଷଣାବେକ୍ଷଣ ପାଇଁ ଜାଲ ବାଉଁଶ  ଆଦି ମଧ୍ୟ ଦାନ କରିଥିଲେ । ଆଗାମୀ ଦିନରେ ସେ ନିଜେ ଏହି ଚାରା ଗୁଡିକର ରକ୍ଷଣାବେକ୍ଷଣ ପାଇଁ ଦାୟିତ୍ୱ ନେବେ ବୋଲି ମଧ୍ୟ ପ୍ରତିଶ୍ରୁତି ଦେଇଥିଲେ । ତାଙ୍କର ଏହି କାର୍ଯ୍ୟକୁ ଅଂଚଳବାସୀ ପ୍ରଶଂସା କରିଥିବା ବେଳେ ଆଗାମୀ ଦିନରେ ସେ ବ୍ୟାପକ ଚାରା ରୋପଣ କରିବେ ବୋଲି ପ୍ରତିଶ୍ରୁତି ବଦ୍ଧ ବୋଲି ନିଜର ମତ ରଖିଥିଲେ ।