ଧାରୱାଡ଼୍: ବିମୁଦ୍ରାୟନ ଏବଂ ଜି.ଏସ୍.ଟି. ଡିଜିଟିକରଣକୁ ପ୍ରୋତ୍ସାହିତ କରିଛି ଓ ଏହା ଦେଶକୁ ମୁକ୍ତ ଏବଂ ସ୍ୱଚ୍ଛ ଅର୍ଥନୀତି ଆଡ଼କୁ ଆଗେଇ ନେବ ବୋଲି ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି। ଶନିବାର ଧାରୱାଡ଼୍ଠାରେ ଜାତୀୟ ଟିକସ କ୍ଷେତ୍ର ଆଇନଜୀବୀ ଦିବସ ଅବସରରେ ଆୟୋଜିତ ଏକ ସମାବେଶରେ ଉଦବୋଧନ ଦେଇ ଅର୍ଥମନ୍ତ୍ରୀ କର ଏକ ବୋଝ ନୁହେଁ, ବରଂ ରାଷ୍ଟ୍ର ନିର୍ମାଣ, ଗରିବ ଜନସାଧାରଣଙ୍କ ମୌଳିକ ଆବଶ୍ୟକତା ପୂରଣ ଏବଂ ଜଳବାୟୁ ପରିବର୍ତ୍ତନର ମୁକାବିଲା ଦିଗରେ ଏକ ଅବଦାନ ବୋଲି କରଦାତାମାନଙ୍କ ମଧ୍ୟରେ ସଚେତନତା ସୃଷ୍ଟି କରିବାପାଇଁ ପରାମର୍ଶ ଦେଇଛନ୍ତି।
ସେ କହିଛନ୍ତି, ଅର୍ଥନୀତିର ଡିଜିଟିକରଣ ଦ୍ୱାରା ଗୋଟିଏ ପଟେ ବେଆଇନ ଅର୍ଥ କାରବାରର ମୂଳ ଚେର ପର୍ଯ୍ୟନ୍ତ ପହଞ୍ଚିବା ସମ୍ଭବ ହୋଇପାରୁଛି ଏବଂ ଅନ୍ୟପକ୍ଷରେ ଦୋହରା ଟିକସରୁ କରଦାତା ମୁକ୍ତି ପାଇପାରୁଛନ୍ତି। ଆୟ ଓ ସମ୍ପତ୍ତିର ସଚ୍ଚୋଟଭାବେ ଘୋଷଣା କରି ଆମ ଦେଶର ଆର୍ଥିକ ସ୍ୱାଧୀନତାକୁ ନିଜ ନିଜର ଅବଦାନ ଦେବାପାଇଁ ସେ କରଦାତାମାନଙ୍କୁ ଆହ୍ୱାନ କରିଛନ୍ତି।
