ଏବେ ଶ୍ରଦ୍ଧା ହତ୍ୟାକାଣ୍ଡର ସବୁ ସତ ଓଗାଳିବ ଅଫତାବ; ନାର୍କୋ ଟେଷ୍ଟ ଅନୁମତି ଦେଲେ କୋର୍ଟ

ନୂଆଦିଲ୍ଲୀ: ଶ୍ରଦ୍ଧା ୱାକର ହତ୍ୟାକାଣ୍ଡ ମାମଲାରେ ଜେଲରେ ବନ୍ଦୀ ଥିବା ପ୍ରେମିକ ଅଫତାବ ପୁନାୱାଲା ଦେବ ମିଛଧରା ପରୀକ୍ଷା। ଅଭିଯୁକ୍ତ ଅଫତାବର ନାର୍କୋ ଟେଷ୍ଟ କରାଇବାକୁ ବୁଧବାର ଅନୁମତି ଦେଇଛନ୍ତି ସାକେତ ଅଦାଲତ। ଅଫତାବ ପୁଲିସକୁ ଦେଇଥିବା ତଥ୍ୟ କେତେ ସତ ଏବଂ କେତେ ମିଛ ଏହାର ଯାଞ୍ଚ ପାଇଁ ଦିଲ୍ଲୀ ପୁଲିସ ଅଫତାବର ନାର୍କୋ ଟେଷ୍ଟ କରାଇବା ପାଇଁ ଅନୁମତି ମାଗିଥିବା ବେଳେ କୋର୍ଟ ଆଜି ଏହି ଅନୁମତି ଦେଇଛନ୍ତି। ପଚରାଉଚରା ବେଳେ ଅଫତାବ ପୁଲିସକୁ ମିଛ ସୂଚନା ଦେଉଛି ଓ ତଦନ୍ତକୁ ବାଟବଣା କରିବାକୁ ଚେଷ୍ଟା କରୁଥିବାରୁ ପୁଲିସ ଏହି ପରୀକ୍ଷା କରାଇବାକୁ ଅନୁମତି ମାଗିଥିଲା।

ମୃତ ଶ୍ରଦ୍ଧାଙ୍କ ଫୋନକୁ କେଉଁଠାରେ ଲୁଚାଇ ରଖିଛ ବୋଲି ପୁଲିସ ଅଫତାବକୁ ପଚାରିଥିବା ବେଳେ ସେ ବାରମ୍ବାର ନିଜର ବୟାନ ବଦଳାଇଥିଲା। ଥରେ ମହାରାଷ୍ଟ୍ରରେ ଫୋନ ଫିଙ୍ଗିବା କଥା କହିବା ସହ ଆଉ ଥରେ ଦିଲ୍ଲୀରେ ହିଁ ଫୋନ ଭାଙ୍ଗି ଫିଙ୍ଗି ଦେଇଥିବା ଅଫତାବ କହିଥିଲା। ଏହି କାରଣରୁ ଅଫତାବ ଏବେ ବି ଅନେକ କଥା ଲୁଚାଉଥିବା ଭାବି ପୁଲିସ ନାର୍କୋ ଟେଷ୍ଟ କରିବାକୁ ଅନୁମତି ମାଗିଥିଲା।