ବେଲଗାଁ : ସଇଁନ୍ତଲା ଥାନା ଅନ୍ତର୍ଗତ ଝିକିଡୁଙ୍ଗରି ଗ୍ରାମରେ ରାତିରେ ଘର ବାହାରେ ତଳେ ଶୋଇଥିବା ବେଳେ ବୁଲା ଗାଈ-ବଳଦ ମାଡି ଦେବାରୁ ଜଣେ ନାବାଳିକାର ମୃତ୍ୟୁ ହେବା ସହ ଅନ୍ୟ ତିନି ଜଣ ଆହତ ହୋଇଛନ୍ତି। ଏକ ଶୋକାକୁଳ ପରିବେଶରେ ଶନିବାର ନାବାଳିକାଙ୍କ ଅନ୍ତିମ ସଂସ୍କାର କରାଯାଇଛି।
ସୂଚନାଯୋଗ୍ୟ ଯେ, ଗ୍ରାମର ଶାନ୍ତି ବେନିଆ ପ୍ରାୟ ପାଂଚ ବର୍ଷ ହେଲା ସ୍ୱାମୀ ସହ ବିଚ୍ଛେଦ ହୋଇ ଏଠାରେ ନିଜ ମା ଏବଂ ପାଂଚ ସନ୍ତାନ ସହ ମଜୁରି କରି ପେଟପାଟଣା କରୁଛନ୍ତି। ଗତ ୨୮ ତାରିଖରେ ସବୁଦିନ ପରି ସମସ୍ତେ ପ୍ରବଳ ଗରମ ନେଇ ଘର ବାହାରେ ତଳେ ପଟି ପକାଇ ଶୋଇଥିଲେ। ବିଲମ୍ବିତ ରାତିରେ ବୁଲା ଗାଈ-ବଳଦ ହଠାତ୍ ମାଡି ଆସି ତଳେ ଶୋଇଥିବା ୬ ଜଣଙ୍କ ଉପରେ ଧାଇଁ ଯାଇଥିଲେ। ଫଳରେ ଶାନ୍ତି, ତାଙ୍କ ମା ଲଲିତା (୬୦), ପୁଅ ଛୋଟୁ (୧୧) ତଥା ଝିଅ ବିଦୁସ୍ମିତା (୭) ଗୁରୁତର ଆହତ ହୋଇଥିଲେ। ବିଦୁସ୍ମିତାଙ୍କ ଅବସ୍ଥା ଆହୁରି ଖରାପ ହେବାରୁ ଗରିବ ପରିବାର ଗତକାଲି କୁଆଡୁ ପଇସା ଯୋଗାଡ କରି କଣ୍ଟାବାଞ୍ଜି ନେଇଥିଲେ। ତେବେ ସେଠାରେ ବିଦୁସ୍ମିତାର ମୃତ୍ୟୁ ଘଟିଥିଲା। ଘଟଣା ଖବର ପାଇ ଝିକିଡୁଙ୍ଗରି ସରପଂଚ କଣ୍ଟାବାଞ୍ଜିର ସମାଜସେବୀ ଆଶିଷ ଖୈତାନଙ୍କୁ ଯୋଗାଯୋଗ ସହ ମୃତଦେହ ଆଣିବା ବ୍ୟବସ୍ଥା କରିଥିଲେ। ଆଜି ଗ୍ରାମରେ ଶୋକାକୁଳ ପରିବେଶରେ ବିଦୁସ୍ମିତାର ଅନ୍ତିମ ସଂସ୍କାର କରାଯାଇଥିଲା। ସରପଂଚ ଶ୍ରୀ ଜୈନ ପରିବାର ଲୋକଙ୍କୁ ସମବେଦନା ଜଣାଇବା ସହ ସରକାରି ସହାୟତା ଯୋଗାଇଦେବା ପାଇଁ ଉଦ୍ୟମ କରିବେ ବୋଲି ଆଶ୍ୱାସନା ଦେଇଛନ୍ତି।
Comments are closed.