ପୁଣି ଦାଦନ ଦୁଃଖ: ଟଙ୍କା ପାଇଁ ନାବାଳିକା ଝିଅକୁ ବନ୍ଧକ ରଖିଛି ଦାଦନ ସର୍ଦ୍ଦାର

ବଲାଙ୍ଗୀର: ପୁଣି ଦାଦନ ଦହନର ଦୟନୀୟ କାହାଣୀ। ଟଙ୍କା ପାଇଁ ଦାଦନ ଖଟିବାକୁ ଯାଇ ଶ୍ରମିକଙ୍କ ଜୀବନ ଯାଇଥିବାବେଳେ ଟଙ୍କା ପାଇଁ ବନ୍ଧା ପଡିଛି ସମ୍ପୃକ୍ତ ଶ୍ରମିକଙ୍କ ନାବାଳିକା ଝିଅ। ବଲାଙ୍ଗୀର ବେଲପଡା ଥାନା ସୁଲେକେଲା ଗାଁରୁ ଏଭଳି ଅଭିଯୋଗ ଆସିଛି। ଦୁଇ ମାସ ତଳେ ସୁଲେକେଲା ଗାଁର କାହ୍ନୁ ମଲ୍ଲିକ ନିଜ ପରିବାରର ୪ ସଦସ୍ୟଙ୍କୁ ନେଇ ଆନ୍ଧ୍ର ସାତନଗଡ ଅଞ୍ଚଳକୁ ଦାଦନ ଖଟିବାକୁ ଯାଇଥିଲେ । ସେଠାରେ ସର୍ଦ୍ଦାରଙ୍କ ଅତ୍ୟଧିକ କାମ ଯୋଗୁଁ କାହ୍ନୁ ଅସୁସ୍ଥ ହୋଇପଡିଥିଲେ। ତାପରେ ବି ଦାଦନ ସର୍ଦ୍ଦାର ବାରମ୍ବାର ଶ୍ରମିକ ପରିବାରକୁ ନିର୍ଯ୍ୟାତନା ଦେଉଥିବା ଅଭିଯୋଗ କରିଥିଲେ। ଏହାକୁ ପତ୍ନୀ ପ୍ରତିବାଦ କରିବାରୁ ରୋଗୀଣା ସ୍ବାମୀଙ୍କ ସହ ସ୍ତ୍ରୀ ଏବଂ  ଝିଅକୁ ଗାଁକୁ ପଠାଇଦେଇଥିଲେ। ଗାଁରେ ପହଞ୍ଚିବାର କିଛି ଦିନ ପରେ କାହ୍ନୁ ପ୍ରାଣ ହରାଇଛନ୍ତି। ତେବେ ୧୧ ବର୍ଷର ନାବାଳିକା ଝିଅକୁ ସର୍ଦ୍ଦାର ଅଟକ ରଖିଛି। ଏ ନେଇ ପରିବାର ଲୋକ ଯେତେ ଗୁହାରି କଲେ ବି ଝିଅକୁ ଛାଡୁନଥିବା ଅଭିଯୋଗ ହୋଇଛି। ପରିବାର ଲୋକ ବାଧ୍ୟ ହୋଇ ନିଜର ଜମି ବନ୍ଧକ ରଖି ୫୦ ହଜାର ଟଙ୍କା ଦାଦନ ସର୍ଦ୍ଦାରକୁ ପଠାଇଥିବା କହିଛନ୍ତି। ତଥାପି ଝିଅକୁ ଛାଡୁନଥିବା ସେମାନେ ଅଭିଯୋଗ କରିଛନ୍ତି। ଫଳରେ ପ୍ରାଣ ହରାଇଥିବା କାହ୍ନୁ ମଲ୍ଲିକଙ୍କ ମୃତଦେହକୁ ଧରି ଆନ୍ଦୋଳନରେ ବସିଛନ୍ତି ପରିବାର ଲୋକ । ଏ ସମ୍ପର୍କରେ ଖବର ପ୍ରସାରଣ ପରେ ପୁଲିସକୁ ଧରି ବେଲପଡା ତହସିଲଦାର ଗାଁକୁ ଯାଇଥିଲେ। ରେଡକ୍ରସ୍ ପାଣ୍ଠିରୁ ୧୦ ହଜାର ଟଙ୍କା ଦେବା ସହ ବନ୍ଧକ ଝିଅକୁ ଉଦ୍ଧାର ପାଇଁ ଉଦ୍ୟମ କରାଯାଉଥିବା କହିଛନ୍ତି ତହସିଲଦାର।