ହାଇଦରାବାଦ : ଚଳିତବର୍ଷ ତେଲଙ୍ଗାନାରେ ବିଧାନସଭା ହେବାକୁ ଯାଉଥିବାବେଳେ ଭୋଟରଙ୍କୁ ଆକୃଷ୍ଟ କରିବା ନିମନ୍ତେ କଂଗ୍ରେସ ବିଭିନ୍ନ ପ୍ରକାର ପ୍ରତିଶ୍ରୁତି ଦେଇଛି। ରବିବାର ବରିଷ୍ଠ କଂଗ୍ରେସ ନେତ୍ରୀ ସୋନିଆ ଗାନ୍ଧୀ ହାଇଦରାବାଦର ଟୁକୁଗୁଡାରେ ନିର୍ବାଚନ ଶୋଭାଯାତ୍ରାକୁ ସମ୍ବୋଧନ କରି କହିଛନ୍ତି ଯେ ଦଳ ରାଜ୍ୟରେ କ୍ଷମତାକୁ ଆସିଲେ ପ୍ରତି ମହିଳାଙ୍କୁ ମାସିକ ୨୫୦୦ ଟଙ୍କାର ଆର୍ଥିକ ସହାୟତା ପ୍ରଦାନ କରାଯିବ। ଏହା ସହିତ ୫୦୦ଟଙ୍କାରେ ରନ୍ଧନ ଗ୍ୟାସ ସିଲିଣ୍ଡର, ସରକାରୀ ବସ୍ରେ ମହିଳାଙ୍କୁ ମାଗଣା ଯାତ୍ରା ସୁବିଧା ପ୍ରଦାନ କରାଯିବ। କଂଗ୍ରେସର ପୂର୍ବତନ ସଭାନେତ୍ରୀ ସୋନିଆ କହିଛନ୍ତି ଯେ ତେଲଙ୍ଗାନାରେ ଦଳ ସରକାର ଗଠନ କରିବା ତାଙ୍କର ଏକ ସ୍ବପ୍ନ। କାରଣ କଂଗ୍ରେସ ସରକାର ତେଲଙ୍ଗାନାର ପ୍ରତି ବର୍ଗର ବିକାଶ କରିପାରିବ। ଏହା ପୂର୍ବରୁ ସୋନିଆ କଂଗ୍ରେସର ଦୁଇଦିନିଆ କାର୍ଯ୍ୟକାରିଣୀ କମିଟି (ସିଡବ୍ଲ୍ୟୁସି) ବୈଠକରେ ଯୋଗ ଦେଇ ଦଳର ଆଭିମୁଖ୍ୟ ସମ୍ପର୍କରେ କହିଥିଲେ। ଦଳ ମଧ୍ୟରେ ଥିବା ମତଭେଦକୁ ଭୁଲି ଏକଜୁଟ୍ ହୋଇ କାମ କରିବାକୁ ସେ ଆହ୍ବାନ ଦେଇଥିଲେ। ବୈଠକରେ ଦଳର ସଭାପତି ମଲ୍ଲିକାର୍ଜୁନ ଖଡଗେ କହିଥିଲେ ଯେ ନେତାମାନେ ସେମାନଙ୍କ ବ୍ୟକ୍ତିଗତ ସ୍ବାର୍ଥକୁ ତ୍ୟାଗ ପୂର୍ବକ ଏକଜୁଟ୍ ହୋଇ କାର୍ଯ୍ୟ କରିବା ଦରକାର। ଗଣମାଧ୍ୟମକୁ ମନ୍ତବ୍ୟ ଦେବା ସମୟରେ ସଂଯମତା ଆଚରଣ କରିବାକୁ ସେ ପରାମର୍ଶ ଦେଇଛନ୍ତି। ଗଣମାଧ୍ୟମକୁ ମନ୍ତବ୍ୟ ଦେବା ସମୟରେ ଦଳର ସ୍ବାର୍ଥକୁ ଯେପରି କ୍ଷତି ନ ପହଞ୍ଚିବ ସେଥିପ୍ରତି ସତର୍କ ରହିବାକୁ କୁହାଯାଇଛି। ନବଗଠିତ ସିଡବ୍ଲ୍ୟୁସିର ପ୍ରଥମ ବୈଠକରେ ୧୪ଟି ପ୍ରସ୍ତାବ ଗୃହୀତ ହୋଇଛି।
Popular Categories
Previous article
Next article