ବଲାଙ୍ଗିର : ମୋର ବୟସକୁ ଦେଖନ୍ତୁ। ତା’ ପରେ ଭତ୍ତା ଦିଅନ୍ତୁ। ଯଦି ମୁଁ ଯୋଗ୍ୟ ନୁହେଁ, ତାର କାରଣ ଜଣାଇଦେଲେ ଆମେ ଉପକୃତ ହୁଅନ୍ତୁ। କିନ୍ତୁ ଆବେଦନର ଦୀର୍ଘ ଦୁଇ ବର୍ଷ ହେଲା ଭତ୍ତା ପାଇଁ ଧାଇଁ ଆସୁଥିଲେ ହେଁ କିଛି ସୁଫଳ ମିଳୁନି। ଆମ ଠାରୁ ଯେଉଁମାନେ ବହୁତ ସାନ, ମାତ୍ର ୪୫/୫୦ ବର୍ଷର ସେମାନଙ୍କୁ ଭତ୍ତା ସହଜରେ ମିଳିଯାଉଛି। ଆମ ବେଳକୁ କାହିଁକି ଏଭଳି ଅବହେଲା କରାଯାଉଛି ବୋଲି ବଲାଙ୍ଗିର ଜିଲାପାଳଙ୍କ ଅଭିଯୋଗ ପ୍ରକୋଷ୍ଠକୁ ଆସି ଅଭିଯୋଗ କରିଛନ୍ତି ବରିଷ୍ଠ ନାଗରିକ। ଜିଲାର ଲୋଇସିଂହା ବ୍ଲକ ଅନ୍ତର୍ଗତ ବାନିପାଲି ଗାଁର ମଧୁ ମଙ୍ଗଳ ପଧାନ। ବୟସ ୭୬ ଉପରେ। ମଧୁବାବୁ ପେନସନ ଯୋଜନା ପାଇଁ ଦୀର୍ଘ ଦୁଇ ବର୍ଷ ହେଲା ଆବେଦନ କରିଥିଲେ ହେଁ ତାଙ୍କୁ ବିଭାଗୀୟ ବାବୁ ଭୁଆଁ ବୁଲେଇ ଆସୁଛନ୍ତି ବୋଲି ଅଭିଯୋଗ କରିଛନ୍ତି। ତାଙ୍କ ନାଁ ଏସସିସି ଲିଷ୍ଟରେ ଆବାସ ଯୋଜନା ପାଇଁ ଥିଲେ ହେଁ ସେଥିରୁ ତାଙ୍କ ଅଜଣାତରେ ନାଁ କାଟି ଦିଆଯାଇଛି। ଶାସନ ବ୍ୟବସ୍ଥାରେ ଯଦି କୌଣସି ବ୍ୟକ୍ତି ଯୋଗ୍ୟ ଥାଇ ତାଙ୍କୁ ଅଯୋଗ୍ୟ ଘୋଷିତ କଲେ ସ୍ପଷ୍ଟ ଭାବେ କାରଣ ଜଣାଇ ଦିଆଯିବା କଥା। ହେଲେ ତାହା ମଧ୍ୟ କରାଯାଇ ନାହିଁ। ବଲାଙ୍ଗିର ଜିଲାର ଗ୍ରାମାଞ୍ଚଳରେ ଏଭଳି ଭାବେ ଲୋକଙ୍କୁ ଶାସନ କରାଯାଉଛି ବୋଲି କ୍ଷୋଭ ପ୍ରକାଶ କରିଥିଲେ। ତାଙ୍କୁ ତୁରନ୍ତ ୫ ଶହ ଟଙ୍କା ଭତ୍ତା ସହ ଆବାସ ଯୋଜନାରେ ସାମିଲ କରିବାକୁ ଦାବି କରିଛନ୍ତି। ସେହିପରି ପୁଇଁନ୍ତଲା ବ୍ଲକ ଅନ୍ତର୍ଗତ ବିଲେଇସର୍ଡା ଗାଁରୁ ଅସହାୟ ବୃଦ୍ଧ ମହିଳାମାନେ ଶେଷରେ ଜିଲାପାଳଙ୍କ ଦ୍ୱାରସ୍ଥ ହୋଇଛନ୍ତି। ଗାଁର ପୁନ ବିଶ୍ୱାଳ, ରାଧିକା ବାଗ, ବିବି ଗଡତ୍ୟା, ବିଶାଖା ବିଶ୍ୱାଳ ଭତ୍ତା ପାଇଁ ଗୁହାରୀ କରିଛନ୍ତି। ସେମାନେ ଖୁବ ଅସହାୟ,ଗରିବ ପରିବାରର ହୋଇଥିବା ବେଳେ ସେମାନେ ବୃଦ୍ଧା ସମୟରେ ବେଶ ଅସହାୟ ହୋଇଯାଇଥିବା କହିଛନ୍ତି। ଗାଁର ଉଷା ଜୁଏଡଙ୍କ ଘର ନଥିବା ବେଳେ ବେଶ ହନ୍ତସନ୍ତ ହେଉଛନ୍ତି। ଏତେ ଦିନ ଧରି ଭତ୍ତା, ଘର ପାଇଁ ଅବେଦନ ପତ୍ର ଦେଇଥିଲେ ହେଁ କେହି କିଛି ଶୁଣୁନାହାନ୍ତି। ସେମାନଙ୍କୁ ତୁରନ୍ତ ସରକାରୀ ସହୟତା ଯୋଗାଇ ଦେବାକୁ ଦାବି କରିଛନ୍ତି।
Comments are closed.