ଯେ ପର୍ଯ୍ୟନ୍ତ କରୋନା ଟିକା ବାହାରିନାହିଁ, ସେ ପର୍ଯ୍ୟନ୍ତ ଅଫିସ ଯିବାକୁ ଡ଼ରୁଛନ୍ତି ୮୩% ଭାରତୀୟ ଚାକିରିଜୀବୀ । ବିଭିନ୍ନ ଘରୋଇ ଓ ସରକାରୀ ସଂସ୍ଥାରେ କାର୍ଯ୍ୟ କରୁଥିବା ଲୋକଙ୍କୁ ନେଇ ଆଇଟି କମ୍ପାନୀ ଆଟଲାସିଆନ ଦ୍ବାରା କରାଯାଇଥିବା ସର୍ଭେରୁ ଏହା ସୂଚନା ମିଳିଛି । ତେବେ ଅଫିସ ଯିବାକୁ ଡ଼ର ଲାଗୁଥିଲେ ହେଁ ୭୮% କର୍ମଚାରୀ ଘରେ ବସିବସି କାମ କରି ବିରକ୍ତ ହୋଇ ଯାଇଥିବା ମତ ଦେଇଛନ୍ତି ।
ଗତ ଅକ୍ଟୋବର ମାସରେ କରାଯାଇଥିବା ଏହି ସର୍ଭେକ୍ଷଣରେ ଭାରତର ବିଭିନ୍ନ ସହରର ଲୋକଙ୍କୁ ସାମିଲ କରାଯାଇଛି । ଲୋକମାନେ ଅଫିସକୁ କାମ କରିବାକୁ ଯାଉଛନ୍ତି, ମାତ୍ର ଏଥିରେ ସେମାନଙ୍କର ଭୟ ରହିଛି । ୮୬% କର୍ମଚାରୀ ଭାବୁଛନ୍ତି ଯେ ଅଫିସରୁ ସେମାନଙ୍କୁ କରୋନା ସଂକ୍ରମଣ ହୋଇପାରେ । ଏହି କର୍ମଚାରୀମାନେ ଏବେ ଜଟିଳ ସ୍ଥିତିରେ ଗତି କରୁଛନ୍ତି ବୋଲି ଆଟଲାସିଆନ୍ ସ୍ଥିତ ସାଇଟ୍ ଲିଡ୍ ତଥା ଇଞ୍ଜିନିୟରିଂ (ବେଙ୍ଗାଲୁରୁ)ର ଦୀନେଶ ଅଜମେରା କହିଛନ୍ତି ।
ଭାରତର ଟାୟାର ୧, ଟାୟାର ୨ ଓ ଟାୟାର ୩ ସହରର ପ୍ରାୟ ୧୪୦୦ ଲୋକଙ୍କୁ ନେଇ ଏହି ସର୍ବେକ୍ଷଣ କରାଯାଇଛି ଏବଂ ଏଥିରେ ଲୋକମାନେ ସେମାନଙ୍କର ଅଭିଜ୍ଞତା ପ୍ରକାଶ କରିଛନ୍ତି । ଏପରିକି ଏହି ଲୋକମାନେ କରୋନା ପରିଚାଳନାରେ ସରକାର ଓ ନିଜେ କାମ କରୁଥିବା କମ୍ପାନୀଗୁଡ଼ିକର ପଦକ୍ଷେପକୁ ଭଲ ବୋଲି କହିଛନ୍ତି ।
