ମହାରାଷ୍ଟ୍ରରେ ଏପ୍ରିଲ ୩୦ ଯାଏଁ ବଢିଲା ଲକଡାଉନ୍, ବିଜେପି କାଉନସିଲରଙ୍କ ସମେତ ୧୧ ଗିରଫ

ମୁମ୍ବାଇ : ମହାରାଷ୍ଟ୍ରରେ ଲକଡାଉନର ଅବଧିକୁ ୩୦ ଏପ୍ରିଲ ପର୍ଯ୍ୟନ୍ତ ବୃଦ୍ଧି କରାଯାଇଛି। ମୁଖ୍ୟମନ୍ତ୍ରୀ ଉଦ୍ଧବ ଠାକରେ ଶନିବାର ଏହି ନିଷ୍ପତ୍ତି ନେଇଛନ୍ତି। ପୂର୍ବରୁ ପଞ୍ଜାବ, ଓଡିଶା ଏବଂ ରାଜସ୍ଥାନରେ ମଧ୍ୟ ଏହି ନିଷ୍ପତ୍ତି ନିଆଯାଇ ସାରିଛି। ଏହି ନିଷ୍ପତ୍ତି ନେବାରେ ମହାରାଷ୍ଟ୍ର ହେଉଛି ଚତୁର୍ଥ ରାଜ୍ୟ।

ଏହି ସମୟରେ ମହାରାଷ୍ଟ୍ରର ରାୟଗଡ ଜିଲ୍ଲାର ପାନଭେଲରେ ଗୋଟିଏ ସ୍ଥାନରେ ଏକାଠି ହୋଇଥିବା ବିଜେପି କାଉନସିଲରଙ୍କ ସମେତ ୧୧ ଜଣଙ୍କୁ ଅଟକ ରଖାଯାଇଛି। ପୁଲିସ ସୂଚନାନୁସାରେ ଏହି ଘଟଣା ଶୁକ୍ରବାର ରାତିରେ ଘଟିଛି। ପୋଲିସ କହିଛି ଯେ, ପାନଭେଲ ମ୍ୟୁନିସିପାଲ କର୍ପୋରେସନର ବିଜେପି କାଉନସିଲର ଅଜୟ ବାହିରାଙ୍କ ବଙ୍ଗଳାର ଛାତ ଉପରେ ଜନ୍ମଦିନ ପାଳନ କରାଯାଉଥିଲା। ପୁଲିସ ପହଞ୍ଚି ସମସ୍ତଙ୍କୁ ଅଟକ ରଖିଛି।

ଗତ ୨୪ ଘଣ୍ଟା ମଧ୍ୟରେ ମୁମ୍ବାଇରେ ୨୧୦ ଜଣ ସଂକ୍ରମିତ ହୋଇଥିବା ଜଣାପଡିଛି। ମହାରାଷ୍ଟ୍ରରେ କରୋନା  ସଂକ୍ରମିତ ରୋଗୀଙ୍କ ସଂଖ୍ୟା ୧୫୭୪କୁ ବୃଦ୍ଧି ପାଇଛି।