ନୂଆଦିଲ୍ଲୀ: କରୋନାରୁ ରକ୍ଷା ପାଇବା ପାଇଁ ସାରା ଦେଶରେ ଟିକାକରଣ ଏବେବି ଜାରି ରହିଛି । ଆଉ ସ୍ୱାସ୍ଥ୍ୟକର୍ମୀ ମାନଙ୍କୁ କରୋନା ଯୋଦ୍ଧାର ମାନ୍ୟତା ଦେଇଛନ୍ତି ସରକାର । ହେଲେ ଆପଣ ଜାଣି ନିଶ୍ଚୟ ଆଶ୍ଚର୍ଯ୍ୟ ହୋଇଯିବେ ଜଣେ ସ୍ୱାସ୍ଥ୍ୟକର୍ମୀ କରୋନାର ପ୍ରତ୍ୟେକ ଲହରରେ କରୋନା ସଂକ୍ରମଣ ହୋଇଛନ୍ତି । ତାହାସହ କରୋନାରୁ ସୁସ୍ଥ ମଧ୍ୟ ହୋଇଛନ୍ତି । ଯେତେବେଳେ ଏନେଇ ବୈଜ୍ଞାନିକ ମାନେ କିଛି ଜାଣିବାକୁ ପ୍ରୟାସ କଲେ ସେତେବେଳେ ସେମାନେ ଜାଣିଲେ ସ୍ୱାସ୍ଥ୍ୟକର୍ମୀ ଜଣକ ପ୍ରତ୍ୟେକ ଲହରରେ ସଂକ୍ରମିତ ହୋଇଛନ୍ତି । ଅର୍ଥାତ୍ ୨୦୨୦ରେ ସ୍ୱାସ୍ଥ୍ୟକର୍ମୀ ଜଣକ ଆଲଫା ଭାରିଆଣ୍ଟରେ ସଂକ୍ରମିତ ହୋଇଥିଲେ ।
ପରେ ୨୦୨୧ରେ ଡେଲଟା ଓ ୨୦୨୨ରେ ଓମିକ୍ରନ ଦ୍ୱାରା ମଧ୍ୟ ଆକ୍ରନ୍ତ ହୋଇଥିଲେ । ଏନେଇ ବୈଜ୍ଞାନିକ ମାନେ ତଥ୍ୟ ପାଇବା ପରେ ଆଇସିଏମଆର ଓ ଏନଆଇଭି ମିଳିତ ଭାବେ ଏହାକୁ ନେଇ ଅଧ୍ୟୟନ କରିଥିଲେ । ପରେ ଜଣାପଡ଼ିଥିଲା ସ୍ୱାସ୍ଥ୍ୟକର୍ମୀ ଜଣକ ବାରମ୍ବାର ସଂକ୍ରମଣ ହେବା ପରେ ବି ଟିକା ନେଇଥିବା କାରଣରୁ ତାଙ୍କୁ ଡାକ୍ତରଖାନାରେ ଭର୍ତ୍ତି ହେବାକୁ ପଡ଼ିନଥିଲା । ସ୍ୱାସ୍ଥ୍ୟକର୍ମୀ ଜଣକ ଟିକା ନେବା କାରଣରୁ ଘରେ ଚିକିତ୍ସାରେ ରହି ସୁସ୍ଥ ହୋଇଥିଲେ ।
ଏହି ଘଟଣାକୁ ନେଇ ଏନଆଇଭିର ବୈଜ୍ଞାନିକ ଡକ୍ଟର ପ୍ରୟାଗ ଯାଦବ ନିଜର ପ୍ରତିକ୍ରିୟା ରଖିଛନ୍ତି । ସେ କହିଛନ୍ତି ଏହି ଲକ୍ଷଣ ଆମେ ଜଣେ ୩୮ ବର୍ଷିୟ ବ୍ୟକ୍ତିଙ୍କ ନିକଟରୁ ପାଇଛୁ । ଯାହାଙ୍କ ଠାରେ ବାରମ୍ବାର କରୋନା ସଂକ୍ରମଣ ହୋଇଛି । କରୋନାର ଭାରିଆଣ୍ଟ ଆଲଫା, ଡେଲଟା, ଓମିକ୍ରନ୍ ଲହରରେ ସେ ଆକ୍ରାନ୍ତ ହୋଇଥିଲେ । ତାଙ୍କର ଆଣ୍ଟିବଡି ହ୍ରାସ ଯୋଗୁ ଏହା ଘଟିଥିବା ବେଳେ ଟିକାକରଣ ଯୋଗୁ ଏପରି ସଂକ୍ରମଣ ରୋକାଯାଇପାରିବ ବୋଲି ସେ କହିଛନ୍ତି ।
Comments are closed.