ନୂଆଦିଲ୍ଲୀ: ଭାରତରେ କରୋନା ଆକ୍ରାନ୍ତ ସଂଖ୍ୟା ଦିନକୁ ଦିନ ବଢ଼ିବାରେ ଲାଗିଛି। ସାରା ଦେଶରେ ଲକ୍ଡାଉନ ସତ୍ବେ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଥିବାରୁ ସମୂହ ସଂକ୍ରମଣ ଆଶଙ୍କା ବଢ଼ିବାରେ ଲାଗିଛି। ତେବେ କେତେକ ହଟସ୍ପଟ୍ ଅଞ୍ଚଳରେ ସମୂହ ସଂକ୍ରମଣ ଆରମ୍ଭ ହୋଇଥିବା ଏମ୍ସର ବିଶେଷଜ୍ଞ ଡାକ୍ତରଙ୍କ ପକ୍ଷରୁ କୁହାଯାଇଛି। ମଙ୍ଗଳବାର ସୁଦ୍ଧା ଦେଶରେ ୪୪୨୧ କରୋନା ଆକ୍ରାନ୍ତ ଚିହ୍ନଟ ହୋଇଥିବାବେଳେ ଏବେ ୩୯୮୧ଜଣ ଚିକିତ୍ସାଧୀନ ଅଛନ୍ତି। ୩୨୫ ଜଣ ସୁସ୍ଥ ହୋଇ ଘରକୁ ଫେରିଥିବାବେଳେ ୧୧୪ ଜଣଙ୍କ ମୃତ୍ୟୁ ଘଟିଥିବା ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି।
ଇଣ୍ଡିଆ କୋଭିଡ-୧୯ ଟ୍ରାକର ତଥ୍ୟ ଅନୁସାରେ ଦେଶରେ ବର୍ତ୍ତମାନ ସୁଦ୍ଧା ୪୮୨୨ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ସେଥିରୁ ୪୩୦୭ ଜଣ ଚିକିତ୍ସାଧୀନ ଥିବାବେଳେ ୧୩୩ ଜଣଙ୍କ ମୃତ୍ୟୁ ହୋଇଛି। ଏହି ୱେବସାଇଟ୍ ତଥ୍ୟ ଅନୁସାରେ ମହାରାଷ୍ଟ୍ରରେ ସର୍ବାଧିକ ୮୬୮ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ଏହା ପଛକୁ ରହିଛି ତାମିଲନାଡୁ (୬୨୧), ଦିଲ୍ଲୀ(୫୨୫), ତେଲେଙ୍ଗାନା (୩୬୪), କେରଳ(୩୪୭), ରାଜସ୍ଥାନ(୩୨୫), ଉତ୍ତରପ୍ରଦେଶ(୩୦୫), ଆନ୍ଧ୍ରପ୍ରଦେଶ(୩୦୩) ଏବଂ ମଧ୍ୟପ୍ରଦେଶ(୨୫୬)। ସେହିପରି ଗୁଜରାଟରେ ୧୬୫, କର୍ଣ୍ଣାଟକରେ ୧୬୩, ହରିୟାଣାରେ ୧୧୦, ଜାମ୍ମୁ-କାଶ୍ମୀରରେ ୧୦୯ ଆକ୍ରାନ୍ତ ଚିହ୍ନଟ ହୋଇଛି।
Comments are closed.