ବଡ଼ସାହି : ପଞ୍ଚାୟତିରାଜ ଦିବସ ପାଳନ ଖର୍ଚ୍ଚ ପାଇଁ ଆସିଥିବା ଅନୁଦାନ ରାଶି ଅନିୟମିତତା ହୋଇଛି ବୋଲି ବ୍ଲକ କଂଗ୍ରେସ ପକ୍ଷରୁ ଅଭିଯୋଗ କରାଯାଇଛି। ବରିଷ୍ଠ କଂଗ୍ରେସ ନେତା ପ୍ରକାଶ କର ମହାପାତ୍ର ବିଭାଗୀୟ ଚିଠିର ନକଲ ଗଣମାଧ୍ୟମ ପ୍ରତିନିଧିଙ୍କୁ ପ୍ରଦାନ କରି କାର୍ଯ୍ୟକ୍ରମର ଭିଜିଲାନ୍ସ ତଦନ୍ତ ଦାବି କରିଛନ୍ତି। ଦିବସ ପାଳନ ପାଇଁ ବିଭାଗ ପକ୍ଷରୁ ପ୍ରତି ବ୍ଳକକୁ ୮୦ହଜାର ଟଙ୍କା ଆସିଥିବା ବେଳେ ପଞ୍ଚାୟତ ମାନଙ୍କ ପାଇଁ ୫ହଜାର ୫୦୦ଟଙ୍କା ଖର୍ଚ୍ଚ କରିବାକୁ ଚିଠିରେ ଉଲ୍ଲେଖ ରହିଛି। ସରକାରଙ୍କର ଯୋଜନା ଲୋକଙ୍କ ନିକଟରେ ପହଞ୍ଚାଇବା ପାଇଁ ସଭା ସ୍ଥଳରେ ସିଧାସଳଖ ପ୍ରସାରଣ ଦେଖିବା ପାଇଁ ବ୍ୟବସ୍ଥା ସହିତ ଉପସ୍ଥିତ ଲୋକଙ୍କ ପାଇଁ ଭୋଜନ ବ୍ୟବସ୍ଥା କରାଯିବା କଥା। ମାତ୍ର ବଡ଼ସାହି ବ୍ଳକରେ ଏହାର ବ୍ୟତିକ୍ରମ ହୋଇଥିବା ସେ କହିଛନ୍ତି। ମିଶନଶକ୍ତି ବୈଠକକୁ ଆସିଥିବା ମହିଳାଙ୍କୁ ନେଇ କାର୍ଯ୍ୟକ୍ରମ ହୋଇଥିବା ବେଳେ କାର୍ଯ୍ୟକ୍ରମର ଉଦେଶ୍ୟ ସାଧିତ ହୋଇନାହିଁ ବୋଲି ସେ କହିଛନ୍ତି। ବିଭିନ୍ନ ଯୋଜନାରେ ଅନିୟମିତତା ହେଉଥିବା ବେଳେ ଏବେ ଦିବସ ପାଳନର ଅର୍ଥ ସଠିକ୍ ବିନିଯୋଗ ନହେବା ଦୁର୍ଭାଗ୍ୟଜନକ। ଏହାର ଭିଜିଲାନ୍ସ ତଦନ୍ତ ହେଲେ ଷଡ଼ଯନ୍ତ୍ରକାରୀଙ୍କ ମୁଖା ଖୋଲିଯିବ ବୋଲି ସେ କହିଛନ୍ତି।
