ସମାଜ ପୋର୍ଟାଲ ଡେସ୍କ: ଚୀନ ସରକାର ପାଇଁ କାର୍ଯ୍ୟ କରୁଥିବା ହ୍ୟାକର୍ସମାନେ କରୋନା ଟୀକା ପାଇଁ ଆମେରିକା ପକ୍ଷରୁ ଚାଲିଥିବା ଗବେଷଣା ତଥ୍ୟ ଚୋରି କରିବାକୁ ଚେଷ୍ଟା କରୁଛନ୍ତି। ଏ ନେଇ ଟ୍ରମ୍ପ ସରକାର ସତର୍କ କରାଇ ଦେଇଛନ୍ତି। ଆମେରିକାର ସର୍ବୋଚ୍ଚ ତଦନ୍ତକାରୀ ସଂସ୍ଥା ଫେଡେରାଲ ବ୍ୟୁରୋ ଅଫ୍ ଇନଭେଷ୍ଟିଗେସନ୍ (ଏଫବିଆଇ) ଏବଂ ସାଇବର ସୁରକ୍ଷା ବିଶେଷଜ୍ଞମାନେ କହିଛନ୍ତି ଯେ ଆମେରିକାରେ ରହୁଥିବା ଚୀନର ଛାତ୍ରଛାତ୍ରୀ ଏବଂ ଗବେଷକମାନେ ଏଭଳି ତଥ୍ୟ ଚୋରି କରିବା ପାଇଁ ପ୍ରୟାସ କରୁଛନ୍ତି। ସେମାନେ ଆମେରିକାର ସ୍ୱାସ୍ଥ୍ୟ ସେବା ତଥ୍ୟ ସହ ଗବେଷଣାମୂଳକ ବୌଦ୍ଧିକ ତଥ୍ୟ ପାଇବା ପାଇଁ ଚେଷ୍ଟା ଚଳାଇଛନ୍ତି। ଆମେରିକାର ଜଣେ ଅଧିକାରୀଙ୍କ କହିବା ଅନୁଯାୟୀ, ସେମାନେ ଏହି ତଥ୍ୟ ପାଇବାରେ ସଫଳ ହେଲେଣି କି ନାହିଁ ତାହା ଏ ଯାଏଁ ଜଣାପଡିନାହିଁ।
ଏଭଳି ସମ୍ବାଦ ନ୍ୟୁୟର୍କ ଟାଇମ୍ସରେ ପ୍ରକାଶ ପାଇବା ପରେ, ଚୀନର ବୈଦେଶିକ ମନ୍ତ୍ରାଳୟ ମୁଖପାତ୍ର ଜାଓ ଲିଜିଆନ୍ କହିଛନ୍ତି ଯେ ତାଙ୍କ ସରକାର ହ୍ୟାକର୍ସମାନଙ୍କ ଏଭଳି ଆକ୍ରମଣକୁ ନିନ୍ଦା କରିଛନ୍ତି। ସେ କହିଛନ୍ତି ଯେ ଚୀନ କରୋନା ଟୀକା ବାହାର କରିବା କ୍ଷେତ୍ରରେ ଗବେଷଣା ଜାରି ରଖିଛି ଏବଂ ଏ କ୍ଷେତ୍ରରେ ବିଶ୍ୱକୁ ନୂଆ ଦିଗଦର୍ଶନ ଦେବାକୁ ଚେଷ୍ଟା ଅବ୍ୟାହତ ରଖିଛି। ତେବେ କୌଣସି ପ୍ରମାଣ ନ ଥାଇ ହ୍ୟାକର୍ସମାନେ ଚୀନ ସହ ଜଡିତ ବୋଲି ଅପବାଦ ସୃଷ୍ଟି କରିବା ଠିକ ନୁହେଁ ବୋଲି ସେହି ମୁଖପାତ୍ର କହିଛନ୍ତି।
