ଋଣ ବାଣ୍ଟି ମହାଶକ୍ତି ହେବା ଲକ୍ଷ୍ୟରେ ଚୀନ

ୱାଶିଂଟନ : ବିଶ୍ୱର ମହାଶକ୍ତି ହେବା ପାଇଁ ଚୀନ ଏକ ନୂଆ ଋଣନୀତି ଆପଣାଇଛି । ଏହି ଋଣ ନୀତିରେ ବିଭିନ୍ନ ଦେଶକୁ ଋଣ ଓ ଆର୍ଥିକ ସାହଯ୍ୟ ଦେଇ ଚୀନ ନିଜ ପଟକୁ ଆଣିବାରେ ଲାଗିଛି । ଆମେରିକା ଗୁଇନ୍ଦା ବିଭାଗର ଜଣେ ବରିଷ୍ଠ ଅଧିକାରୀ ଏହି ସୂଚନା ଦେଇଛନ୍ତି । ସେ କହିଛନ୍ତି ଯେ ଚୀନ ବିଭିନ୍ନ ଦେଶକୁ ଋଣ ଦେବା ନୀତି ଆପଣାଇଛି । ଏଭଳି କରି ଋଣ ନେଇଥିବା ଦେଶଗୁଡ଼ିକ ଉପରେ ଚୀନ ନିଜର ପ୍ରଭାବ ବିସ୍ତାର କରୁଛି । ଆମେରିକାର ଜାତୀୟ ଗୁଇନ୍ଦା ବିଭାଗ ନିର୍ଦେଶକ ଡାନିଏଲ ଆର କେଟସ୍‌ ଏକ ବୈଠକରେ ସିନେଟର ସଦସ୍ୟଙ୍କୁ ଅବଗତ କରାଇଛନ୍ତି ଯେ ବିଶ୍ୱରେ ନିଜ ପ୍ରଭାବ ବିସ୍ତାର କରିବାକୁ ଚୀନ ନିଜ ସେନାକୁ ମଜଭୁତ କରୁଛି । ଏହାସହ ଋଣ ପ୍ରଦାନର ନୂଆ ଋଣକୌଶଳ ଆପଣାଇଛି । ଏଭଳି କରି ଚୀନ ମହାଶକ୍ତି ହେବା ଲକ୍ଷ୍ୟରେ ରହିଛି । ଚୀନ ନିଜ ସେନାର ଆଧୁନିକୀକରଣ ପାଇଁ ବହୁ ଅର୍ଥ ଖର୍ଚ୍ଚ କରୁଛି । ଚୀନର ଏହି ପଦକ୍ଷେପକୁ ସକରାତ୍ମକ ଦୃଷ୍ଟି କୋଣରେ ଦେଖାଯାଉଛି ଓ ଆତ୍ମରକ୍ଷା ପାଇଁ ସେ ଏଭଳି କରୁଥିବା ଯୁକ୍ତି ବାଢୁଛି । ଏହାବାଦ ଚୀନ ନିଜଠାରୁ ଦୁର୍ବଳ ଦେଶଙ୍କୁ ଋଣ ଦେଇ ସେଠାରେ ନିଜର ପ୍ରଭାବ ବିସ୍ତାର କରୁଛି । ମହାଶକ୍ତି ହେବା ପାଇଁ ରୁଷିଆ ଦିନେ ଏଭଳି ନୀତି ଆପଣାଇଥିଲା । ଏବେ ଚୀନ ରୁଷିଆ ନୀତିର ପଦାଙ୍କ ଅନୁସରଣ କରୁଛି ବୋଲି ବିଶେଷଜ୍ଞମାନେ ମତବ୍ୟକ୍ତ କରିଛନ୍ତି । ବିଶେଷ କରି ଦକ୍ଷିଣ ଏସିଆରେ ନିଜ ଉପସ୍ଥିତିକୁ ଜାହିର କରିବା ସହ ଭାରତକୁ ମାତ ଦେବା ପାଇଁ ଚୀନ ଏହି ଋଣକୌଶଳ ଆପଣାଇଛି ।