ବିଶ୍ବର ଅନ୍ୟ ବିକଶିତ ରାଷ୍ଟ୍ର ତୁଳନାରେ ଚୀନ୍ ମଧ୍ୟ ତାଳ ଦେଇ ଯାଉଛି। ହେଲେ ସେଠିକାର ଗାଁଗହଳିରେ ଲୋକେ ଏବେ ବି ପୁରୁଣା ପରମ୍ପରାକୁ ପ୍ରାଧାନ୍ୟ ଦେଉଛନ୍ତି। ଚୀନ୍ ପଶ୍ଚିମାଞ୍ଚଳରେ ଥିବା କେତୋଟି ଗାଁଗଣ୍ଡାରେ ବିବାହର ମାସକ ପୂର୍ବରୁ ଭାବୀ ବଧୂକୁ କାନ୍ଦିବା ପାଇଁ ପରିବାର ଲୋକେ କହନ୍ତି। କନିଆ ସହ ତା’ ଘର ଲୋକ ମଧ୍ୟ କାନ୍ଦନ୍ତି।
ସ୍ଥାନୀୟ ଲୋକଙ୍କ କହିବାନୁସାରେ, ଏହା ସେଠିକା ପରମ୍ପରା। କନିଆ କାନ୍ଦିବା ବର ପାଇଁ ଶୁଭ ସାବ୍ୟସ୍ତ ହୁଏ। ଆଜିକାଲିର ପାଠପଢ଼ୁଆ ଝିଅମାନେ ଏସବୁ ପୁରୁଣା ନିୟମ ମାନିବାକୁ ରାଜି ହେଉନାହାନ୍ତି। ଯେଉଁ କେତେଜଣ ଝିଅ କାନ୍ଦୁନାହାନ୍ତି, ସେମାନଙ୍କୁ ମାଡ଼ ମାରି କାନ୍ଦିବାକୁ ବାଧ୍ୟ କରାଯାଏ।
ଆଉ କେତେଜଣ ପ୍ରତିଦିନ ଘଣ୍ଟାଏ ଲେଖାଁ କାନ୍ଦିବାର ଅଭ୍ୟାସ ବି କରନ୍ତି। ଏମିତିକି କେତୋଟି ଝିଅଙ୍କୁ ପରିବାରଲୋକ ଦିନଦିନ ଉପାସରେ ରଖିବା ପରେ ସେମାନେ କାନ୍ଦନ୍ତି। ଭାରି ବିଚିତ୍ର ଏଇ ପରମ୍ପରା, ବିବାହ ପରେ ଝିଅ ବିଦାବେଳେ କନିଆ ଯେମିତି କଇଁ କଇଁ ହୋଇ କାନ୍ଦିବ, ତା ଘରଲୋକ ଝିଅ ହାତକୁ ଜୋର୍ରେ ଚିମୁଟି ଦିଅନ୍ତି। ଚୀନ୍ ଗାଁଗହଳିରେ କନିଆ ବିବାହବେଳେ ନ କାନ୍ଦିଲେ ଘରଲୋକ ସାହିପଡ଼ିଶାଙ୍କ ଆଗେ ଅପମାନିତ ହୁଅନ୍ତି।
