ସମାଜ ପୋର୍ଟାଲ ଡେସ୍କ: ଆଗକୁ ବହୁ ପର୍ବପର୍ବାଣୀ ଆସୁଥିବାରୁ କରୋନା ଭୂତାଣୁର ମୁକାବିଲା ପାଇଁ ଗୃହ ମଧ୍ୟରେ ଆବଦ୍ଧ ହୋଇ ରହିବାର କଟକଣାକୁ କଡ଼ାକଡ଼ି ଭାବେ ଲାଗୁ କରିବା ପାଇଁ ସ୍ୱରାଷ୍ଟ୍ର ମନ୍ତ୍ରଣାଳୟ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳଗୁଡ଼ିକୁ ନିର୍ଦ୍ଦେଶ ଦେଇଛି। କୌଣସି ପ୍ରକାରର ସାମାଜିକ, ଧାର୍ମିକ କିମ୍ବା ଅନ୍ୟାନ୍ୟ ସମାବେଶକୁ ଅନୁମତି ନ ଦେବା ପାଇଁ କୁହାଯାଇଛି। ମନ୍ତ୍ରଣାଳୟ କହିଛି, ଏ ଦିଗରେ ସମସ୍ତ ପ୍ରକାରର ଆଗୁଆ ସତର୍କତା ମୂଳକ ପଦକ୍ଷେପ ଗ୍ରହଣ କରିବା ତଥା ଆଇନ୍ ଶୃଙ୍ଖଳା ରକ୍ଷା କରିବା ଓ ଶାନ୍ତିଶୃଙ୍ଖଳା ରକ୍ଷା କରିବା ଦିଗରେ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳଗୁଡ଼ିକୁ କୁହାଯାଇଛି। କୌଣସି ପ୍ରକାରର ଆପତ୍ତିଜନକ ଲେଖା କିମ୍ବା ମିଥ୍ୟା ଖବରର ପ୍ରଚାରକୁ ରୋକିବା ଲାଗି ସାମାଜିକ ଗଣମାଧ୍ୟମ ଉପରେ କଡ଼ା ନଜର ରଖିବା ପାଇଁ ମଧ୍ୟ ମନ୍ତ୍ରଣାଳୟ ନିର୍ଦ୍ଦେଶ ଦେଇଛି।
ମନ୍ତ୍ରଣାଳୟ ପୁଣି କହିଛି, ସର୍ବସାଧାରଣ, ସାମାଜିକ ଓ ଧାର୍ମିକ ସଂଗଠନ ଏବଂ ଅନ୍ୟ କର୍ତ୍ତୃପକ୍ଷମାନଙ୍କୁ ଅବଗତ କରିବା ଲାଗି ଏ ସମ୍ବନ୍ଧୀୟ ନିର୍ଦ୍ଦେଶାବଳୀଗୁଡ଼ିକର ବ୍ୟାପକ ରୂପେ ପ୍ରଚାର ହେବା ଆବଶ୍ୟକ। ଗୃହ ମଧ୍ୟରେ ଆବଦ୍ଧ ହୋଇ ରହିବା କଟକଣାର ଲଙ୍ଘନ କ୍ଷେତ୍ରରେ ଦୁର୍ବିପାକ ପରିଚାଳନା ଆଇନ୍ ଓ ଭାରତୀୟ ପିଙ୍ଗଳ ଆଇନ୍ର ବିଭିନ୍ନ ଧାରା ଅଧୀନରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାକୁ ମଧ୍ୟ ମନ୍ତ୍ରଣାଳୟ କହିଛି।
