ସମାଜ ଡିଜିଟାଲ ଡେସ୍କ: ଜାତୀୟ ଯୋଗ୍ୟତା ପ୍ରବେଶିକା ପରୀକ୍ଷା (ନିଟ୍) ପ୍ରଶ୍ନପତ୍ର ପ୍ରଘଟର ମୁଖ୍ୟ ଷଡଯନ୍ତ୍ରକାରୀଙ୍କୁ ବାନ୍ଧିଛି କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ)। ଝାଡ଼ଖଣ୍ଡର ହଜାରିବାଗ ଅଞ୍ଚଳରୁ ସିବିଆଇ ଏହି ମୁଖ୍ୟ ଷଡ଼ଯନ୍ତ୍ରକାରୀ ବା କିଙ୍ଗପିନ୍ ଅମନ ସିଂହଙ୍କୁ ଗିରଫ କରିଛି। ନିଟ୍ ୟୁପି ପରୀକ୍ଷାରେ ହୋଇଥିବା ଅନିୟମିତତାରେ ଅମନଙ୍କ ସମ୍ପୃକ୍ତି ରହିଥିବା ସିବିଆଇ ଏହାର ତଦନ୍ତରୁ ଜାଣିବାକୁ ପାଇଛି।
ସୂଚନାଯୋଗ୍ୟ, ନିଟ୍ ଫଳାଫଳ ଜୁନ ୪ ତାରିଖରେ ପ୍ରକାଶ ପାଇଥିଲା। ଗ୍ରେସ ମାର୍କକୁ ନେଇ ବିବାଦ ଉପୁଜିବା ପରେ ଏହାକୁ ନେଇ ସୁପ୍ରିମକୋର୍ଟରେ ମାମଲା ରୁଜୁ ହୋଇଥିଲା। ଫଳରେ ଗ୍ରେସ ମାର୍କ ପାଇଥିବା ୧୫୬୩ ଛାତ୍ରଛାତ୍ରୀଙ୍କର ସାନି ପରୀକ୍ଷା କରାଇବାକୁ ସୁପ୍ରିମକୋର୍ଟ ନିର୍ଦେଶ ଦେଇଥିଲେ। ଏହା ମଧ୍ୟରେ ପ୍ରଶ୍ନପତ୍ର ପ୍ରଘଟ କଥା ସାମ୍ନାକୁ ଆସିଥିଲା। ସିବିଆଇ ଏହାର ତଦନ୍ତ କରୁଥିବା ବେଳେ ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି। ନିଟ୍ ପ୍ରଶ୍ନପତ୍ର ପ୍ରଘଟ ମାମଲାରେ ବିହାରର ଆଜେଡି ନେତା ତେଜସ୍ଵୀ ଯାଦବଙ୍କ ଘନିଷ୍ଠ ତଥା ତାଙ୍କ ବ୍ୟକ୍ତିଗତ ସଚିବଙ୍କ ସମ୍ପୃକ୍ତି ରହିଥିବା ନେଇ ମଧ୍ୟ ପୂର୍ବରୁ ଅଭିଯୋଗ ହୋଇଥିଲା।
