ୱାଶିଂଟନ : ଦୁବାଇର ସୁଉଚ୍ଚ ଅଟ୍ଟାଳିକା ବୁର୍ଜ ଖଲିଫା ଭଳି ଏକ ବୃହତ୍କାୟ ଗ୍ରହାଣୁ ସେପ୍ଟେମ୍ବର ୧୪ରେ ପୃଥିବୀର ଅତି ନିକଟରେ ଅତିକ୍ରମ କରିବ ବୋଲି ଆମେରିକୀୟ ମହାକାଶ ଗବେଷଣା କେନ୍ଦ୍ର (ନାସା) ପକ୍ଷରୁ ସତର୍କ କରାଯାଇଛି।
୨୦୦୦ କ୍ୟୁଡବ୍ଲ୍ୟୁ୭ ନାମକ ଏହି ଗ୍ରହାଣୁ ୨୯୦ ମିଟର ଲମ୍ବ, ୬୫୦ ମିଟର ଚଉଡା ଓ ୮୨୮ ମିଟର ଉଚ୍ଚ। ନାସାର ଏକ ସଂସ୍ଥା ପୃଥିବୀ ନିକଟସ୍ଥ ବସ୍ତୁ ସମ୍ବନ୍ଧୀୟ ସର୍ବେକ୍ଷଣ (ସିଏନଇଓଏସ)ର ଆକଳନ ଅନୁସାରେ ଗ୍ରହାଣୁଟି ଘଣ୍ଟାପ୍ରତି ୨୩,୧୦୦ କିଲୋମିଟର ବେଗରେ ପୃଥିବୀ ଠାରୁ ୩.୩ ମିଲିୟନ ମାଇଲରୁ ୫.୩ ମିଲିୟନ କିଲୋମିଟର ଦୂରତାରେ ଅତିକ୍ରମ କରିବ। ଉଲ୍ଲେଖ ଯେ କୌଣସି ଗ୍ରହାଣୁ ବା ଅନ୍ୟ କୌଣସି ମହାକାଶୀୟ ବସ୍ତୁ ପୃଥିବୀଠାରୁ ୧.୩ ମହାକାଶୀୟ ୟୁନିଟ ଭିତରେ ଅତିକ୍ରମ କଲେ ତାହାକୁ ପୃଥିବୀର ନିକଟତମ ବସ୍ତୁ ବୋଲି କୁହାଯାଏ। ଏହି ଦୃଷ୍ଟିକୋଣରୁ ଗ୍ରହାଣୁ ୨୦୦୦କ୍ୟୁଡବ୍ଲ୍ୟୁ୭ ମଧ୍ୟରେ ୦.୦୩୫୬୪ ମହାକାଶୀୟ ୟୁନିଟ ଦୂରତା ରହିବ ବୋଲି ଆକଳନ କରାଯାଇଛି। ପୃଥବୀ ଭଳି ଏହି ଗ୍ରହାଣୁ ମଧ୍ୟ ସୂର୍ଯ୍ୟ ଚତୁଃପାର୍ଶ୍ବରେ ପରିକ୍ରମା କରିଥାଏ। ୨୦୦୦ ସେପ୍ଟେମ୍ବର ୧ରେ ମଧ୍ୟ ଏହା ପୃଥିବୀ ପାର୍ଶ୍ବ ଦେଇ ଅତିକ୍ରମ କରିଥିଲା। ସେପ୍ଟମ୍ବର ୧୪ରେ ପୃଥିବୀର ନିକଟତମ ହେବା ପରେ ଏହା ୨୦୩୮ ଅକ୍ଟୋବର ୧୯ ସୁଦ୍ଧା ଏହି ଗ୍ରହଠାରୁ ଦୂର ହେବ ବୋଲି କୁହାଯାଇଛି।
