ଢେଙ୍କାନାଳ : ନିର୍ମାଣାଧିନ କୋଠାର ଛାତ ପଡିବାବେଳେ ଛାତ ଭୁଶୁଡି ଅନେକ ଜଣ ଆହତ ହୋଇଛନ୍ତି । ଜାତୀୟ ରାଜପଥ ୫୫ ମହିଷାପାଟ ନିକଟରେ ଏକ ୫ ମହଲା କୋଠାର ଛାତ ଭୁଶୁଡିବା ଫଳରେ ଅନେକ ଶ୍ରମିକ ଫସିରହିଥିବା ସୂଚନା ମିଳିଛି ।
ଢେଙ୍କାନାଳ ମହିଷାପାଟଠାରେ ହୋଟେଲ ପାଇଁ ଗୋଟିଏ ପାଞ୍ଚ ମହଲା କୋଠାର ନିର୍ମାଣ କାର୍ଯ୍ୟ ଚାଲିଥିଲା । ତୃତୀୟ ମହଲାର ଛାତ ପଡୁଥିବାବେଳେ ଗୋଟିଏ ପିଲର ଭାଙ୍ଗିଯିବାରୁ ଛାତଟି ଭୁଷୁଡି ପଡିଥିଲା । ସେଠାରେ କାର୍ଯ୍ୟରତ ଶ୍ରମିକ ଚାପି ହୋଇଯାଇଛନ୍ତି । ଫଶିଥିବା ଶ୍ରମିକଙ୍କ ସଂଖ୍ୟା ୧୦ ବୋଲି ଅନୁମାନ କରାଯାଉଛି । ଗୁରୁତର ଭାବେ ଉଦ୍ଧାର ହୋଇଥିବା ଶ୍ରମିକଙ୍କ ମଧ୍ୟରେ ସଦର ଥାନା ଅନ୍ତର୍ଗତ ଖୁଣ୍ଟୁଝରି ଗ୍ରାମର କୈଳାଶ ଚନ୍ଦ୍ର ରାଉତ (୪୫) ଙ୍କ ଦୁଇ ହାତ ଛିଣ୍ଡି ପଡିଥିବା ଜଣାଯାଇଛି । ତାଙ୍କୁ ଗୁରୁତର ଭାବେ କଟକ ସ୍ଥାନାନ୍ତର କରାଯାଇଛି । ସେହି ଖୁଣ୍ଟୁଝରି ଗ୍ରାମର ଆଉ ଜଣେ ଟୁନା ରାଉତ (୪୦)ଙ୍କୁ ଢେଙ୍କାନାଳ ମୁଖ୍ୟ ଚିକିତ୍ସାଳୟରେ ଚିକିତ୍ସା କରାଯାଉଛି । ଖବର ପାଇ ଢେଙ୍କାନାଳ ଓଡ୍ରାଫ ସମେତ ଗଁଦିଆ, ଓଡାପଡାରୁ ଅଗ୍ନିଶମ ବାହିନୀ, ପୁଲିସ, ଜେସିବି, ବୁଲଡୋଜର ଆଦି ସହାୟତାରେ ଉଦ୍ଧାର କାର୍ଯ୍ୟ ଯୁଦ୍ଧକାଳୀନ ଭିତ୍ତିରେ ଚାଲୁ ରହିଛି । ଘଟଣାସ୍ଥଳରେ ଢେଙ୍କାନାଳ ଜିଲାପାଳ ସୋମେଶ କୁମାର ଉପାଧ୍ୟାୟ, ଏସ୍ପି ଅଭିନବ ସୋନକର ଓ ଉପଜିଲାପାଳ ସମେତ ଜିଲାସ୍ତରୀୟ ଅଧିକାରୀମାନେ ଉପସ୍ଥିତ ରହି ଉଦ୍ଧାର କାର୍ଯ୍ୟ ତଦାରଖ କରୁଛନ୍ତି । ଉଦ୍ଧାର କାର୍ଯ୍ୟ ସରିଲେ କେତେ ଶ୍ରମିକ ମୃତାହତ ତାହା ଜଣାପଡିବ ବୋଲି ପ୍ରଶାସନ ପକ୍ଷରୁ କୁହାଯାଇଛି ।
Comments are closed.