bjd gruha runa banner

ପ୍ରସାରଣ ସେବା ପୋର୍ଟାଲ ଉନ୍ମୋଚନ କଲେ କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରୀ

ପ୍ରସାରଣ କ୍ଷେତ୍ରରେ ‘ବ୍ୟବସାୟିକ ସୁଗମତା’ ପାଇଁ ପୋର୍ଟାଲ ଏକ ଗୁରୁତ୍ବପୂର୍ଣ୍ଣ ପଦକ୍ଷେପ

BSKY banner  750×100

ପୋର୍ଟାଲରେ ୯୦୦ରୁ ଅଧିକ ସାଟେଲାଇଟ୍‌ ଟିଭି ଚ୍ୟାନେଲ, ୭୦ରୁ ଅଧିକ ଟେଲିପୋର୍ଟ ପରିଚାଳକ, ୧୭୫୦ରୁ ଅଧିକ ବହୁମୁଖି-ସେବା ପରିଚାଳକ, ୩୫୦ରୁ ଅଧିକ ଗୋଷ୍ଠୀ ବେତାର କେନ୍ଦ୍ର (ସିଆରଏସ), ୩୮୦ରୁ ଅଧିକ ଘରୋଇ ଏଫଏମ ଚ୍ୟାନେଲ ଏବଂ ଅନ୍ୟ ସବୁ ପ୍ରକାରର (୩୬୦ ଡିଗ୍ରୀ) ସମାଧାନ ସୁବିଧା ପ୍ରଦାନ କରାଯିବ

ନୂଆଦିଲ୍ଲୀ :  କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରୀ  ଅନୁରାଗ ସିଂହ ଠାକୁର ସୋମବାର ନୂଆଦିଲ୍ଲୀରେ ପ୍ରସାରଣ ସେବା ପୋର୍ଟାଲର ଉନ୍ମୋଚନ କରିଛନ୍ତି । ଏଥି ସହିତ ପ୍ରସାରଣ କ୍ଷେତ୍ରରେ ‘ବ୍ୟବସାୟିକ ସୁଗମତା’ ପାଇଁ ଏକ ନୂତନ ଅଧ୍ୟାୟ ଆରମ୍ଭ ହୋଇଛି । ପ୍ରସାରଣ ସେବା ପୋର୍ଟାଲ ଏକ ଅନଲାଇନ ପୋର୍ଟାଲ, ଯାହା ଅଧୀନରେ ପ୍ରସାରକମାନଙ୍କ ଦ୍ବାରା ବିଭିନ୍ନ ପ୍ରକାର ଲାଇସେନ୍ସ, ଅନୁମତି, ପଞ୍ଜୀକରଣ ଆଦି ପାଇଁ ଆବେଦନକୁ ଯଥାଶୀଘ୍ର ଦାଖଲ କରାଯାଇ ପାରିବ। ଏସବୁ ଆବେଦନର ଯାଞ୍ଚ ପ୍ରକ୍ରିୟା ମଧ୍ୟ ଯଥାଶୀଘ୍ର ସମ୍ପୂର୍ଣ୍ଣ କରାଯାଇପାରିବ।
ଏହି ଅବସରରେ ଶ୍ରୀ ଠାକୁର କହିଥିଲେ ଯେ ସରକାର ବ୍ୟବସ୍ଥାଗତ ପାରଦର୍ଶିତା ଆଣିବା ଏବଂ ଏହାକୁ ଆହୁରି ଉତ୍ତରଦାୟୀ କରିବା ଲାଗି ପ୍ରଯୁକ୍ତିର ଉପଯୋଗ କରିଛନ୍ତି। ପ୍ରସାରଣ ସେବା ପୋର୍ଟାଲରେ ଆବେଦନ କଲେ ଚୂଡ଼ାନ୍ତ ନିଷ୍ଣତ୍ତି ଗ୍ରହଣ କରିବାରେ ଲାଗୁଥିବା ସମୟ ହ୍ରାସ ପାଇବ ଏବଂ ଆବେଦନକାରୀମାନଙ୍କୁ ଆବେଦନର ପ୍ରଗତି ସମ୍ପର୍କରେ ସୂଚନା ମିଳିପାରିବ। ଏହି ପୋର୍ଟାଲ ଆବେଦନକାରୀମାନଙ୍କର ବାରମ୍ବାର ଉପସ୍ଥିତି ଆବଶ୍ୟକତାକୁ ମଧ୍ୟ କମାଇବ, ଯାହାକି ପୂର୍ବରୁ ଜରୁରୀ ଥିଲା। ଏହି ପୋର୍ଟାଲ ମନ୍ତ୍ରଣାଳୟର କ୍ଷମତା ବୃଦ୍ଧିରେ ମଧ୍ୟ ସହାୟକ ହେବ। ବ୍ୟବସାୟିକ ସୁଗମତା ବା ଇଜ୍‌ ଅଫ୍‌ ଡୁଇଂ ବିଜନେସ କ୍ଷେତ୍ରରେ ଏହା ଏକ ମହତ୍ବପୂର୍ଣ୍ଣ ପଦକ୍ଷେପ ସାବ୍ୟସ୍ତ ହୋଇପାରିବ ।
ସବୁ ପ୍ରକାରର (୩୬୦ ଡିଗ୍ରୀ) ଡିଜିଟାଲ ସମାଧାନ, ଅଂଶୀଦାରମାନଙ୍କୁ ଅନୁମତି ଆଣିବା, ପଞ୍ଜୀକରଣ ପାଇଁ ଆବେଦନ କରିବା, ଆବେଦନ ଉପରେ ଦୃଷ୍ଟି ରଖିବା, ଶୁଳ୍କ ଗଣନା କରିବା ଏବଂ ପରିଶୋଧ କରିବାର ସୁବିଧା ଏହି ପୋର୍ଟାଲରୁ ମିଳିପାରିବ ବୋଲି ଶ୍ରୀ ଠାକୁର କହିଛନ୍ତି। ଘରୋଇ ସାଟେଲାଇଟ୍‌ ଟିଭି ଚ୍ୟାନେଲ, ଟେଲିପୋର୍ଟ ପରିଚାଳକ, ଏମଏସଓ, ଗୋଷ୍ଠୀ ଏବଂ ଘରୋଇ ରେଡିଓ ଚ୍ୟାନେଲ ସହ ଜଡ଼ିତ ସବୁ ଅଂଶୀଦାରମାନଙ୍କୁ ଡିଜିଟାଲ ଇଣ୍ଡିଆର ବ୍ୟାପକ ପ୍ରୟାସ ଅଧୀନରେ ଏହି ପୋର୍ଟାଲ ସେବା ପ୍ରଦାନ କରିବ ।
ଶ୍ରୀ ଠାକୁର କହିଛନ୍ତି ଯେ, ‘‘ଏହି ପୋର୍ଟାଲ ପ୍ରଧାନମନ୍ତ୍ରୀ  ନରେନ୍ଦ୍ର ମୋଦୀଙ୍କ ‘ସର୍ବନିମ୍ନ ସରକାର, ସର୍ବାଧିକ ପ୍ରଶାସନ’ ମନ୍ତ୍ରକୁ ସାକାର କରିବା ଦିଗରେ ଏକ ଗୁରୁତ୍ବପୂର୍ଣ୍ଣ ପଦକ୍ଷେପ ସାବ୍ୟସ୍ତ ହେବ। କାରଣ ସରଳ ତଥା ବ୍ୟବହାରକାରୀଙ୍କ ପାଇଁ ଅନୁକୂଳ ହୋଇଥିବାରୁ ଏହି ୱେବ ପୋର୍ଟାଲ ଆରମ୍ଭରୁ ଶେଷ ପର୍ୟ୍ୟନ୍ତ (ଏଣ୍ଡ ଟୁ ଏଣ୍ଡ) ସବୁ ସମାଧାନ ମାତ୍ର ଗୋଟିଏ କ୍ଲିକ୍‌ରେ ପ୍ରଦାନ କରିବ । ପୋର୍ଟାଲ ଦ୍ବାରା ୯୦୦ରୁ ଅଧିକ ସାଟେଲାଇଟ୍‌ ଟିଭି ଚ୍ୟାନେଲ, ୭୦ରୁ ଅଧିକ ଟେଲିପୋର୍ଟ ପରିଚାକ, ୧୭୫୦ରୁ ଅଧିକ ବହୁ ସେବା ପରିଚାଳକ, ୩୫୦ରୁ ଅଧିକ ଗୋଷ୍ଠୀ ବେତାର କେନ୍ଦ୍ର (ସିଆରଏସ), ୩୮୦ରୁ ଅଧିକ ଘରୋଇ ଏଫଏମ ଚ୍ୟାନେଲ ଲାଭାନ୍ବିତ ହୋଇପାରିବେ । ବ୍ୟବସାୟିକ ସୁଗମତା ପାଇଁ ଉପଯୁକ୍ତ ପରିବେଶ ସୃଷ୍ଟି କରିବା ସହିତ ସମ୍ପୂର୍ଣ୍ଣ ପ୍ରସାରଣ କ୍ଷେତ୍ରକୁ ସଶକ୍ତ କରିବା ଦିଗରେ ଏହି ପୋର୍ଟାଲ ବିଶେଷ ସହାୟକ ହୋଇପାରିବ ।’’
ପୋର୍ଟାଲର ପରୀକ୍ଷଣକୁ ଶେଷ ଉପଯୋଗକାରୀଙ୍କ ଠାରୁ ସକାରାତ୍ମକ ପ୍ରତିକ୍ରିୟା ମିଳିଛି । ଯଥାଶୀଘ୍ର ପୋର୍ଟାଲକୁ ଜାତୀୟ ସିଙ୍ଗଲ ୱିଣ୍ଡୋ ବ୍ୟବସ୍ଥା ସହିତ ଯୋଡ଼ି ଦିଆଯିବ ବୋଲି କେନ୍ଦ୍ର ମନ୍ତ୍ରୀ ଶ୍ରୀ ଠାକୁର କହିଛନ୍ତି।  ଉଦ୍ୟୋଗ ଜଗତ ଅନ୍ୟ କୌଣସି ସଂସ୍କାର ଆବଶ୍ୟକ କରୁଥିଲେ, ମନ୍ତ୍ରଣାଳୟ ସେସବୁ ସଂସ୍କାରକୁ ସାମିଲ କରିବା ପାଇଁ ମଧ୍ୟ ପ୍ରସ୍ତୁତ ରହିଛି ବୋଲି କେନ୍ଦ୍ର ମନ୍ତ୍ରୀ କହିଛନ୍ତି।
ସୂଚନା ଏବଂ ପ୍ରସାରଣ ମନ୍ତ୍ରଣାଳୟର ସଚିବ ଶ୍ରୀ ଅପୂର୍ବ ଚନ୍ଦ୍ର କହିଥିଲେ ଯେ ନୂଆ ପୋର୍ଟାଲରେ ପୂର୍ବ ସଂସ୍କରଣ ତୁଳନାରେ ଅନେକ ସୁଧାର ଅଣାଯାଇଛି ଏବଂ ସେଥିରେ ଗୋଟିଏ ମାସର ପରୀକ୍ଷଣ ଅବଧି ସମୟରେ ଅଂଶୀଦାରମାନଙ୍କ ଠାରୁ ପ୍ରାପ୍ତ ପରାମର୍ଶକୁ ମଧ୍ୟ ସାମିଲ କରାଯାଇଛି।

ଏହି କାର୍ଯ୍ୟକ୍ରମରେ ଉପସ୍ଥିତ ପ୍ରସାରକମାନେ ପୋର୍ଟାଲ ଉନ୍ମୋଚନକୁ ସ୍ବାଗତ କରିଥିଲେ ଏବଂ କହିଥିଲେ ଯେ ଆବେଦନ ପାଇଁ ଲାଗୁଥିବା ସମୟ ହ୍ରାସ କରିବାରେ ଏହା ସହାୟକ ହୋଇପାରିବ । ଆବେଦନ ପ୍ରକ୍ରିୟା ପାଇଁ ଆବଶ୍ୟକ ପ୍ରୟାସକୁ ଏହା ସହଜ କରିବ ।
ସୂଚନାଯୋଗ୍ୟ ଯେ ଦେଶରେ ବ୍ୟବସାୟିକ ସୁଗମତାରେ ସୁଧାର ଆଣିବା ପାଇଁ ଭାରତ ସରକାର ପ୍ରାଥମିକତା ଦେଇ ଆସୁଛନ୍ତି । ପ୍ରସାରଣ ସେବା ପୋର୍ଟାଲ ବ୍ୟବସାୟିକ ସୁଗମତା ଆଣିବା ତଥା ପ୍ରସାରଣ କ୍ଷେତ୍ରକୁ ସଶକ୍ତ କରିବା ପ୍ରତି ସରକାରଙ୍କ ପ୍ରତିବଦ୍ଧତାର ଏକ ଉଦାହରଣ।

Comments are closed.