ବୌଦ୍ଧ/କଣ୍ଟାମାଳ: ବୌଦ୍ଧ ଜିଲା କଣ୍ଟାମାଳ ବ୍ଳକ କାର୍ଯ୍ୟାଳୟ ସଭାଗୃହ ଠାରେ ଗୋଷ୍ଠୀ ଉନ୍ନୟନ ଅଧିକାରୀ ଜୟ ମହନ୍ତଙ୍କ ଅଧ୍ୟକ୍ଷତାରେ ବାଲ୍ୟ ବିବାହ ନିରୋଧ ପାଇଁ ଜାତି ମୁଖିଆମାନଙ୍କ ଏକ ଦିନିକିଆ କର୍ମଶାଳା ଅନୁଷ୍ଠିତ ହୋଇଯାଇଛି । ଏହି କର୍ମଶାଳାରେ ପ୍ରାୟ ୧୦ଟି ଜାତି ସମାଜର ମୁଖିଆ ଓ ସମନ୍ୱିତ ଶିଶୁ ବିକାଶ ବିଭାଗର ସୁପରଭାଇଜର ମାନେ ଯୋଗଦେଇଥିଲେ ।
କାର୍ଯ୍ୟକ୍ରମରେ ବାଲ୍ୟ ବିବାହ ନିରୋଧ, ସମସ୍ତ କିଶୋର କିଶୋରୀ ମାନଙ୍କ ଶିକ୍ଷା ଓ ଦକ୍ଷତା ବୃଦ୍ଧି ତାଲିମ ଉପରେ ଗୁରୁତ୍ୱ ପ୍ରଦାନ କରାଯାଇଥିଲା । ସିଡିପିଓ ଜ୍ୟୋତ୍ସ୍ନାରାଣୀ ପାଢ଼ୀ ବାଲ୍ୟ ବିବାହ ଯୋଗୁଁ କିଶୋର କିଶୋରୀମାନଙ୍କ ସ୍ୱାସ୍ଥ୍ୟ ଉପରେ ପଡୁଥିବା ପ୍ରଭାବ ଉପରେ ଆଲୋକପାତ କରିଥିଲେ । ଜିଲା ବାଲ୍ୟ ବିବାହ ନିରୋଧ କାର୍ଯ୍ୟକ୍ରମର ପରାମର୍ଶଦାତ୍ରୀ ପ୍ରବିଜ୍ଞା ଦାଶ ଜିଲା ଓ କଣ୍ଟାମାଳ ବ୍ଲକରେ ବାଲ୍ୟ ବିବାହ ସ୍ଥିତି, ଏହାର କାରଣ ଓ ଆଇନଗତ ପ୍ରାବଧାନ ଉପରେ କର୍ମଶାଳାରେ ଅଂଶଗ୍ରହଣକାରୀ ମାନଙ୍କୁ ଅବଗତ କରାଇଥିଲେ ।
ଏହି କର୍ମଶାଳାରେ ଜାତି ସମାଜର ମୁଖିଆମାନେ ବିବାହ ବେଳେ ବୟସ ପ୍ରମାଣପତ୍ର ପାଇଁ ଆଧାରକାର୍ଡ ପରିବର୍ତ୍ତେ ଅଙ୍ଗନବାଡିର ରେଜିଷ୍ଟ୍ରର ଓ ବିଦ୍ୟାଳୟ ପ୍ରବେଶ ରେଜିଷ୍ଟ୍ରର ଅନୁସାରେ ବୟସ ସ୍ଥିର କରିବାକୁ ନିଷ୍ପତ୍ତି ନେଲେ ଓ ସମସ୍ତ ମୁଖିଆମାନେ ନିଜ ନିଜର ବିବାହ ରେଜିଷ୍ଟ୍ରର ପ୍ରଚଳନ କରିବାକୁ ନିଷ୍ପତ୍ତି ନେଇଥିଲେ । ଶେଷରେ ସୁପରଭାଇଜର ରଶ୍ମିରାଣୀ ଦିଗାଲ ଧନ୍ୟବାଦ ପ୍ରଦାନ କରିଥିଲେ ।
Comments are closed.