ବୌଦ୍ଧ : ବୌଦ୍ଧ ଜିଲାରେ ଗତ ଶନିବାର ଠାରୁ ଲକ୍ଷ୍ମୀବସ ଚଳାଚଳର ସମୟ ନିର୍ଘଣ୍ଟକୁ ନେଇ ଜିଲା ଘରୋଇ ବସ ମାଲିକ ସଂଘ ପକ୍ଷରୁ ପ୍ରତିବାଦ କରିବା ସହ ଗରୋଇ ବସ ଚକାବନ୍ଦ ଆନ୍ଦୋଳନ କରିଥିଲେ । ବସ ଗୁଡିକୁ ଆରଟିଓ ଅଫିସ ଆଗରେ ଠିଆ କରିଥିଲେ । ଫଳରେ ଶନିବାର ଠାରୁ ପୁରା ଜିଲାରେ ଯାତ୍ରୀ ସେବା ବ୍ୟାହତ ହୋଇପଡିଥିଲା । ଶନିବାର ଦିନ ଜିଲାପ୍ରଶାସନ ଓ ଘରୋଇ ବସ ମାଲିକ ସଂଘ ଆଲୋଚନା ବିଫଳ ହେବା ପରେ ନିଜ ଜିଦରେ ଅଟଳ ରହିଥିଲେ ବସ ମାଲିକ ସଂଘ । ପୁର୍ବରୁ ଲକ୍ଷ୍ମୀବସ ଗୁଡିକ ବ୍ଳକ କାର୍ଯ୍ୟାଳୟ ଠାରୁ ପଞ୍ଚାୟତ ଗୁଡିକୁ ଯିବା ଆସିବା କରୁଥିଲା କିନ୍ତୁ ଗତ ଶୁକ୍ରବାର ଠାରୁ ପଞ୍ଚାୟତଗୁଡିକରୁ ବ୍ଳକକୁ ଚଳାଚଳ କରିଥିଲା । ଏପରି ଚଳାଚଳକୁ ବୌଦ୍ଧ ଜିଜିଲା ଘରୋଇ ବସ ମାଲିକ ସଂଘ ପକ୍ଷରୁ ବିରୋଧ କରାଯାଇ ଆନ୍ଦୋଳନ ଆରମ୍ଭ କରିଥିଲା । ରବିବାର ଅପରାହ୍ନରେ ପୁଣି ଜିଲ୍ଲାପାଳଙ୍କ କାର୍ଯ୍ୟାଳୟ ପରିସରରେ ଏକ ବୈଠକ ହୋଇଥିଲା ।
ବୈଠକରେ ଜିଲାପାଳ ଜେ.ସୋନାଲ, ଏସପି ରାଜ ପ୍ରସାଦ, ଆରଟିଓ ଓ ଏମଭିଆଇ ଓ ବୌଦ୍ଧ ଘରୋଇ ବସ ମାଲିକ ସଂଘ ସଭାପତି ପ୍ରଶନ୍ନ କୁମାର ସାହୁ, ସମ୍ପାଦକ ଚିତ୍ତରଂଜନ ରାଜ ଓ ଭବାନୀପାଟଣା, ବଲାଙ୍ଗିର, ନୁଆପଡା, ସୋନପୁର, ବରଗଡ, ସମ୍ବଲପୁର, ଝାରସୁଗୁଡା, ଖଡିଆଳ, ରାଜଗାଙ୍ଗପୁର, କୋରାପୁଟ, ମାଲକାନାଗିରି, ଉମରକୋଟ, ଫୁଲବାଣୀ, ବାଲିଗୁଡା ଓ ଉଦୟଗିରି ବସ ମାଲିକ ସଂଘର କର୍ମକର୍ତ୍ତା ବୈଠକରେ ଯୋଗ ଦେଇଥିଲେ।
ବୈଠକରେ ପୁର୍ବପରି ଲକ୍ଷ୍ମୀବସ ଗୁଡିକ ଚଳାଚଳ କରିବାକୁ ପ୍ରଶାସନ ପକ୍ଷରୁ କହିବାରୁ ଆନ୍ଦୋଳନରୁ ବସ ମାଲିକ ସଂଘ ଓହରିଥିଲା । ଘରୋଇ ବସ ଆନ୍ଦୋଳନ ଯୋଗୁଁ ଜିଲାରେ ଦୁଇ ଦିନ ଧରି ଯାତ୍ରୀ ସେବା ପୁରା ବ୍ୟାହତ ହୋଇପଡିଥିଲା ।
