ବୌଦ୍ଧ : ଚଳିତବର୍ଷ ଗ୍ରୀଷ୍ମପ୍ରବାହ ର୍ପୂବରୁ ଜଙ୍ଗଲନିଆଁ ବନ ବିଭାଗର ଚିନ୍ତା ବଢାଇଦେଲାଣି। ଗୋଟିଏ ମୁଣ୍ଡରୁ ନିଆଁ ଲିଭାଇଲେ ଆର ମୁଣ୍ଡରୁ ଜଙ୍ଗଲ ହୁ ହୁ ହୋଇ ଜଳିବାରେ ଲାଗିଛି। ଅନେକ ସ୍ଥାନରେ ବନ ସୁରକ୍ଷା ସମିତିମାନେ ଜଙ୍ଗଲ ନିଆଁ ଲିଭାଇବାକୁ ଉଦ୍ୟମ କରୁଛନ୍ତି ହେଲେ ପ୍ରତିଦିନ କେଉଁଠି ନା କେଉଁଠି ଜଙ୍ଗଲରେ ନିଆଁ ଲାଗିରହିଛି। ବୌଦ୍ଧଜିଲା ହରଭଙ୍ଗା ବ୍ଲକ ମାଧପୁର ରେଞ୍ଜ ଅନ୍ତର୍ଗତ ହାତୀଧରା ଓ ମୁଣ୍ଡେସର ଜଙ୍ଗଲରେ ଅନେକ ସ୍ଥାନରେ ହୁହୁ ହୋଇ ଜଙ୍ଗଲ ଜଳୁଥିବାବେଳେ ନିଆଁକୁ ଆୟତ୍ତ କରିବାରେ ବନ ବିଭାଗ ବିଫଳ ହୋଇଛି। ଗ୍ରାମବାସୀଙ୍କ ସୂଚନା ଅନୁଯାୟୀ ଗତ କିଛିବର୍ଷ ହେଲା ବନ ବିଭାଗର ଅପାରଗତା ଓ ଲୋକମାନଙ୍କ ମଧ୍ୟରେ ସଚେତନତାର ଅଭାବରୁ ଜଙ୍ଗଲରେ ଏଭଳି ନିଆଁ ଲାଗିବା ଘଟଣା ଦେଖିବାକୁ ମିଳୁଅଛି। ବୌଦ୍ଧ ମାନଚିତ୍ରରେ ହାତୀଧରା ଜଙ୍ଗଲର ଅନେକ ଗୁରୁତ୍ୱ ରହିଛି। ପଦ୍ମତୋଳା ଜଙ୍ଗଲକୁ ସଂଯୋଗ କରୁଥିବା ଏହି ଜଙ୍ଗଲରେ ରାଜାଙ୍କ ସମୟରେ ପ୍ରଜାମାନେ ବେଠି ଖଟି ଏହି ଜଙ୍ଗଲରେ ଶାଗୁଆନ ଗଛ ଲଗାଇଥିବାର କୁହାଯାଏ। ବର୍ତମାନ ଜିଲାର ବଡ ଜଙ୍ଗଲ କହିଲେ ହାତୀଧରା,ମୁଣ୍ଡେଶ୍ୱର ଓ ପଦ୍ମତୋଳା ଜଙ୍ଗଲକୁ ବୁଝାଯାଏ। ହାତୀଧରା ଜଙ୍ଗଲ ମଧ୍ୟରେ ରହିଛି ଘଞ୍ଚ ଜଙ୍ଗଲ ଅଞ୍ଚଳ ଦାନିଗାଡୁ,କେରେଡିଗୁଜୁ,ବାଘଦଳି। ଏହି ଯାଗାମାନଙ୍କରେ ବର୍ଷ ତମାମ ପାଣି ରହିଥାଏ। ତେଣୁ ହାତୀ,ବାରହା.ସମ୍ବର,ହରିଣ,କୁଟୁରା ଆଦି ବନ୍ୟପ୍ରାଣୀ ଏହି ଅଞ୍ଚଳରେ ଦେଖାଯାଆନ୍ତି। କିନ୍ତୁ ବର୍ତମାନ ଜଙ୍ଗଲରେ ବାରମ୍ବାର ନିଆଁ ଲାଗୁଥିବା ଯୋଗୁଁ ବନ୍ୟଜନ୍ତୁ ଏବେ ଗ୍ରାମମୁହାଁ ହେଉଥିବା ନେଇ ସବୁ ସମୟରେ ଗ୍ରାମବାସୀମାନେ ଭୟରେ କାଳାତିପାତ କରୁଛନ୍ତି। ଜଙ୍ଗଲ ନିଆଁ ଯୋଗୁଁ ବହୁ ମୂଲ୍ୟବାନ ଗଛ ଓ ଔଷଧୀୟ ବୃକ୍ଷ ପୋଡି ନଷ୍ଟ ହୋଇଯାଉଥିବାରୁ ସାଧାରଣରେ ଉଦବେଗ ପ୍ରକାଶ ପାଉଅଛି। ଚଳିତବର୍ଷ ବନ ବିଭାଗର ଅବହେଳା ଯୋଗୁଁ ପୂର୍ବ ପ୍ରସ୍ତୁତି ନଥିବାରୁ ଜଙ୍ଗଲ ଗୁଡିକରେ ଲାଗୁଥିବା ନିଆଁ ସହଜରେ ଅନ୍ୟ ଅଞ୍ଚଳକୁ ବ୍ୟାପୀ ଯାଉଥିବା ଅଭିଯୋଗ ହେଉଅଛି। ତେବେ ଜଙ୍ଗଲ ନିଆଁକୁ ଆୟତ୍ତ କରିବା କେବଳଯେ ବନ ବିଭାଗର ଦାୟିତ୍ୱ ବୋଲି ନଭାବି ଗ୍ରାମବାସୀ ,ବନ ସୁରକ୍ଷା ସମିତି ସମସ୍ତେ ମିଳିମିଶି ଉଦ୍ୟମ କଲେ ଆମ ଜିଲାର ଜଙ୍ଗଲ ସଂପଦ ରକ୍ଷା କରାଯାଇପାରିବ ବୋଲି ସାଧାରଣରେ ମତପ୍ରକାଶ ପାଉଅଛି।
Popular Categories
Previous article
Next article