ବଲାଙ୍ଗିର: ବଲାଙ୍ଗିର ଭୀମ ଭୋଇ ମେଡିକାଲ କଲେଜରେ ପାଠ ପଢ଼ୁଥିବା ଜଣେ ଏମ୍ବିବିଏସ୍ ଛାତ୍ର ହଷ୍ଟେଲ ଛାତରୁ ଖସି ମୃତ୍ୟୁ ହୋଇଥିବା ଅଭିଯୋଗ ହୋଇଛି। ତେବେ ଏହା ଅସାବଧାନତାରୁ ମୃତ୍ୟୁ ନା ଆତ୍ମହତ୍ୟା, ତାହା ସ୍ପଷ୍ଟ ହୋଇପାରି ନାହିଁ। ଛାତ୍ରଙ୍କ ମୃତ୍ୟୁ ପରେ ଶୋକାକୁଳ ପରିବେଶ ସୃଷ୍ଟି ହୋଇଛି।
ଶୁକ୍ରବାର ଦିନ ପ୍ରାୟ ୩ଟା ବେଳେ ମଧ୍ୟାହ୍ନ ଭୋଜନ କରି ଭୀମ ଭୋଇ ମେଡିକାଲ କଲେଜର ଛାତ୍ରମାନେ ବିଶ୍ରାମ ନେଇଥିଲେ। ନୂଆ ହଷ୍ଟେଲରେ ରହୁଥିବା ନିଶାନ୍ତ କୁମାର ନଶୋଇ ଛାତ ଉପରକୁ ଯାଇଥିଲେ। ସେ ତଳେ ପଡ଼ି ଯାଇଥିଲେ ବି ଦେହରେ ଟିକିଏ ବି ଦାଗ କି ରକ୍ତ ବାହାରି ନାହିଁ। ତାଙ୍କ ସାଥୀମାନଙ୍କୁ ଏସଂପର୍କରେ ଅନ୍ୟମାନେ ଜଣାଇବା ପରେ ଗୁରୁତର ଅବସ୍ଥାରେ ହରିୟାଣାର ମୂଳବାସିନ୍ଦା ନିଶାନ୍ତଙ୍କୁ ଉଦ୍ଧାର କରି ଆମ୍ବୁଲାନ୍ସରେ ବଲାଙ୍ଗିର ଭୀମ ଭୋଇ ଡାକ୍ତରଖାନାକୁ ଅଣାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ନିଶାନ୍ତଙ୍କ ମୃତ୍ୟୁକୁ ବନ୍ଧୁମାନେ ସହଜରେ ଗ୍ରହଣ କରିପାରୁ ନାହାନ୍ତି। ସେମାନେ କିଛି କହିବାକୁ ଚାହୁଁ ନଥିବା ବେଳେ ସହରାଞ୍ଚଳ ପୁଲିସକୁ ଖବର ଦିଆଯାଇଛି। ପୁଲିସ ଆବଶ୍ୟକ ଯାଞ୍ଚ ପରେ ମୃତ ନିଶାନ୍ତଙ୍କ ପରିବାର ଲୋକଙ୍କୁ ଯୋଗାଯୋଗ କରାଯାଇଛି। ସମସ୍ତେ ବିଶ୍ରାମ ନେଇଥିବା ବେଳେ ମୃତ ନିଶାନ୍ତ ଛାତ ଉପରକୁ କାହିଁକି ଯାଇଥିଲେ ଓ କେମିତି ତଳେ ପଡ଼ିଲେ ତାହା ଜଣାପଡ଼ି ପାରୁ ନାହିଁ।
ସୂଚନାଯୋଗ୍ୟ ଯେ, କିଛି ମାସ ତଳେ ଭୀମ ଭୋଇ ମେଡିକାଲରେ ପଢ଼ୁଥିବା ଜଣେ ଛାତ୍ରୀ ମଧ୍ୟ ହଷ୍ଟେଲ ପରିସରରେ ଆତ୍ମହତ୍ୟା କରିଥିଲେ। କେଉଁ କାରଣରୁ ସେ ଆତ୍ମହତ୍ୟା କଲେ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇପାରି ନାହିଁ। ଜଣେ ଛାତ୍ରୀଙ୍କ ଆତ୍ମହତ୍ୟା ପରେ ଆଉ ଜଣେ ଛାତ୍ରଙ୍କ ମୃତ୍ୟୁ ହଷ୍ଟେଲ ଅନ୍ତେବାସୀଙ୍କୁ ସ୍ତବ୍ଧ କରିଦେଇଛି। ଶବ ବ୍ୟବଚ୍ଛେଦ ରିପୋର୍ଟ ଆସିବା ପରେ ମୃତ୍ୟୁର କାରଣ ସ୍ପଷ୍ଟ ହେବ ବୋଲି ପୁଲିସ ପକ୍ଷରୁ ସୂଚନା ଦିଆଯାଇଛି।
