ବ୍ରହ୍ମପୁର: ମାହାଙ୍ଗାରେ ବିଜେପି ନେତା କୁଳମଣି ବରାଳ ଏବଂ ତାଙ୍କ ସହଯୋଗୀଙ୍କୁ ହତ୍ୟାକୁ ନେଇ ବିବାଦ ଉଗ୍ର ହେବାରେ ଲାଗିଛି । ମଙ୍ଗଳବାର ବିଜେପି ତରଫରୁ ଥାନାଗୁଡ଼ିକ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି । ଏହି କ୍ରମରେ ଅପରାହ୍ନରେ ବଡ଼ ବଜାର ଥାନା ସମ୍ମୁଖରେ ବ୍ରହ୍ମପୁର ନିର୍ବାଚନ ମଣ୍ଡଳୀ ଯୁବମୋର୍ଚ୍ଚା ତରଫରୁ ବିକ୍ଷୋଭ ପ୍ରଦର୍ଶନ ସହ ମନ୍ତ୍ରୀ ପ୍ରତାପ ଜେନାଙ୍କ କୁଶପୁତଳିକା ଦାହ କରାଯାଇଥିଲା।
ବିଜେପି ଅଭିଯୋଗ କରିଛି ଯେ, ରାଜନୈତିକ ଉଦ୍ଦେଶ୍ୟ ରଖି କୁଳମଣି ଏବଂ ତାଙ୍କ ସହଯୋଗୀଙ୍କୁ ହତ୍ୟା କରାଯାଇଛି । ଏଥିରେ ମନ୍ତ୍ରୀ ପ୍ରତାପ ଜେନାଙ୍କ ସଂପୃକ୍ତି ରହିଛି। ଶାସକ ଦଳର ମନ୍ତ୍ରୀ ଓ ନେତାମାନେ ଅନେକ ଦଶନ୍ଧି ହେଲା ଓଡିଶା ରାଜକୋଷକୁ ଲୁଟିଥିବା ବେଳେ ଯେଉଁମାନେ ଏହାର ପର୍ଦ୍ଦାଫାସ କରୁଛନ୍ତି, ସେମାନଙ୍କୁ ହତ୍ୟା କରାଯାଉଛି । ଦୁର୍ନୀତିକୁ ଘୋଡ଼ାଇବା ପାଇଁ ମୁଖ୍ୟମନ୍ତ୍ରୀଙ୍କ ପ୍ରରୋଚନାରେ ଅନ୍ୟ ଦଳର କର୍ମୀଙ୍କୁ ହତ୍ୟା କରାଯାଉଛି । ଏଣୁ ଏହାର ସିବିଆଇ ତଦନ୍ତ ସହ ମନ୍ତ୍ରୀ ପ୍ରତାପ ତୁରନ୍ତ ଇସ୍ତଫା ଦିଅନ୍ତୁ ବୋଲି ଦଳ ଦାବି କରିଛି।
ଏହି ଅବସରରେ ବିଜେପି ପକ୍ଷରୁ ଏକ ସ୍ମାରକପତ୍ର ଥାନା ଅଧିକାରୀଙ୍କୁ ପ୍ରଦାନ କରାଯାଇଥିଲା । ଏଥିରେ ବିଜେପି ନେତା କାହ୍ନୁ ଚରଣ ପତି, ପ୍ରଭାତ କିରଣ ଷଡଙ୍ଗୀ, କିରଣ ସାହୁ, ମଧୁସୂଦନ ସାହୁ, ଟିକିନା ମହାନ୍ତି, ସୁନିଲ କୁମାର ସାହୁ, ଶରତ କୁମାର ନାୟକ, ଭାବଗ୍ରାହୀ ପାଳ, ନମିତା ପଣ୍ଡା, ରାକେଶ ସାବତ, ବିକାଶ ପାଣିଗ୍ରାହୀ, ଶିବ ଶଙ୍କର ଶତପଥୀଙ୍କ ସମେତ ବହୁ କର୍ମୀ ଭାଗନେଇଥିଲେ।
Comments are closed.