ନୂଆଦିଲ୍ଳୀ : ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଅମିତ ଶାହା ’ସ୍ୱାଇନ-ଫ୍ଲୁ’ରେ ଆକ୍ରାନ୍ତ ହୋଇ ପଡିଛନ୍ତି। ତାଙ୍କୁ ଚିକିତ୍ସା ପାଇଁ ବୁଧବାର ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥାନ(ଏମ୍ସ)ରେ ଭର୍ତ୍ତି କରାଯାଇଛି। ଏମ୍ସର ବରିଷ୍ଠ ଚିକିତ୍ସକ ଡାକ୍ତର ରଣଦୀପ ଗୁଲେରିଆଙ୍କ ତତ୍ୱାବଧାନରେ ତାଙ୍କର ଚିକିତ୍ସା କରାଯାଉଛି। ସ୍ୱୟଂ ଅମିତ ଶାହା ମଧ୍ୟ ’ସ୍ୱାଇନ-ଫ୍ଲୁ’ରେ ଆକ୍ରାନ୍ତ ହୋଇଥିବା ସମ୍ପର୍କରେ ଟୁଇଟ ମାଧ୍ୟମରେ ସୂଚନା ଦେଇଛନ୍ତି।
ସେ ଟୁଇଟରେ ଲେଖିଛନ୍ତି ’ମୋତେ ’ସ୍ୱାଇନ-ଫ୍ଲୁ’ ହୋଇଛି, ଯାହାର ଚିକିତ୍ସା କରାଯାଉଛି। ଇଶ୍ବରଙ୍କ କୃପା ଏବଂ ଆପଣ ସମସ୍ତଙ୍କ ଭଲପାଇବା ଓ ଶୁଭକାମନା ଯୋଗୁଁ ଶୀଘ୍ର ସୁସ୍ଥ ହୋଇଯିବି।’
ବୁଧବାର ସାମାଜିକ ଗଣମାଧ୍ୟମରେ ଶ୍ରୀ ଶାହା ଏଚ-୧ଏନ-୧(ସ୍ୱାଇନ-ଫ୍ଲୁ)ରେ ଆକ୍ରାନ୍ତ ହୋଇଥିବା ନେଇ ସୂଚନା ଦେଇଥିଲେ। ପିଟିଆଇ ସୂତ୍ରରୁ ଜଣାପଡିଛି ଯେ, ଛାତିରେ ଯନ୍ତ୍ରଣା ଏବଂ ଶ୍ବାସ କ୍ରିୟାରେ କଷ୍ଟ ଅନୁଭବ କରିବାରୁ ଶ୍ରୀ ଶାହାଙ୍କୁ ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥାନ(ଏମ୍ସ)ରେ ଭର୍ତ୍ତି କରାଯାଇଥିଲା। ରାତି ୯ଟାରେ ତାଙ୍କୁ ଏମ୍ସରେ ଭର୍ତ୍ତି କରାଯାଇଥିଲା। ତାଙ୍କୁ ପୁରୁଣା ପ୍ରାଇଭେଟ ୱାର୍ଡରେ ଚିକିତ୍ସା କରାଯାଉଛି। ଡାକ୍ତର ରଣଦୀପ ଗୁଲେରିଆଙ୍କ ନେତୃତ୍ବରେ ଗଠିତ ଡାକ୍ତରୀ ଦଳ ତାଙ୍କର ଚିକିତ୍ସା କରୁଛନ୍ତି।
ତେବେ ଆସନ୍ତା ୧୮ତାରିଖରେ ଶ୍ରୀ ଶାହାଙ୍କ ଓଡିଶା ଗସ୍ତକୁ ସ୍ଥଗିତ ରଖାଯାଇଛି ବୋଲି ବିଜେପି ରାଜ୍ୟ ଉପ ସଭାପତି ସମୀର ମହାନ୍ତି କହିଛନ୍ତି।
