ହ୍ବିଲ୍‌ ଚେୟାରରେ ବସି ବିଜେପି ପ୍ରାର୍ଥିନୀଙ୍କ ଗାଁକୁ ଗାଁ ଅଭିଯାନ

ପାଟଣା: କେନ୍ଦୁଝର ଜିଲ୍ଲା ୨୨ ନଂ ଜୋନ ପାଟଣା ବ୍ଲକ ଅନ୍ତର୍ଗତ ତୁରୁମୁଙ୍ଗା ପଞ୍ଚାୟତରେ ଶୁକ୍ରବାର ବିଜେପି ଜିଲ୍ଲା ପରିଷଦ ପ୍ରାର୍ଥିନୀ ଦଶମତି ଚାତାର ହ୍ବିଲ୍‌ ଚେୟାରରେ ବସି ଗାଁକୁ ଗାଁ ଅଭିଯାନ କରି ସାଧାରଣ ଜନତାଙ୍କୁ ଭେଟିଛନ୍ତି। ତୁରୁମୁଙ୍ଗା ପଞ୍ଚାୟତର ତୁରୁମୁଙ୍ଗା, ହାତୀବାରି, ତ୍ରିବିନ୍ଧା, କଇଣ୍ଡା, ଝାରବେଡା, ଡୁମୁରିଗୋଡା ଆଦି ଗ୍ରାମରେ ବିଜେପି ପ୍ରାର୍ଥିନୀ ଦଶମତିଙ୍କ ସହ ବିଜେପିରେ ପୂର୍ବତନ ଜିଲ୍ଲା ସଭାପତି ରାଧାକାନ୍ତ ମହାନ୍ତ, ଦଳୀୟ ନେତା ହରିହର ମହାନ୍ତ, ବ୍ରଜ ମୋହନ ସାହୁ, ପାଲୁ ସିଂହ ଓ ମିତ୍ରଭାନୁ ମହାନ୍ତଙ୍କ ସହ ବହୁ ମହିଳା ସମର୍ଥକ ଗାଁ କୁ ଗାଁ ବୁଲିଥିଲେ। ଜଣେ ଉଚ୍ଚ ଶିକ୍ଷିତା ଓ ସମାଜ ସେବିକା ଭାବେ ସ୍ଵତନ୍ତ୍ର ପରିଚୟ ସୃଷ୍ଟି କରିଥିବା ବିଜେପି ପ୍ରାର୍ଥୀନୀ ପଦ୍ମ ଫୁଲ ଚିହ୍ନରେ ମୋହର ମାରି ଜିତାଇବାକୁ ନିବେଦନ କରିଥିଲେ।

ସୂଚନାଯୋଗ୍ୟ ଯେ, ଘରକୁ ଘର ଅଭିଯାନ ସମୟରେ ଦଶମତି ପଡ଼ିଯାଇ ଗୋଟିଏ ଗୋଡ଼ ଭାଙ୍ଗିଥିବା କାରଣରୁ ହ୍ବିଲ୍‌ ଚେୟାରରେ ବସି ପ୍ରଚାରକୁ ଆଗେଇ ନେଉଛନ୍ତି।