ପଦ୍ମପୁର ପାଇଁ ବିଜେପିର ଷ୍ଟାର ପ୍ରଚାରକ ତାଲିକା ପ୍ରକାଶ

ଭୁବନେଶ୍ୱର: ପଦ୍ମପୁର ଉପନିର୍ବାଚନ ପାଇଁ ବିଜେପି ପକ୍ଷରୁ ଷ୍ଟାର ପ୍ରଚାରକ ତାଲିକା ପ୍ରକାଶ ପାଇଛି । ତାଲିକାରେ ବିଜେପିର କିଛି ବରିଷ୍ଠ ନେତାଙ୍କ ନାଁ ରହିଥିବା ବେଳେ କିଛି କେନ୍ଦ୍ରମନ୍ତ୍ରୀଙ୍କ ନାଁ ମଧ୍ୟ ପ୍ରକାଶ ପାଇଛି । ସବୁଠାରୁ ବଡ଼ କଥା ହେଉଛି, ନୂଆକରି ରାଜନୀତିକୁ ଓହ୍ଲାଇଥିବା ଧାମନଗରର ନବାଗତ ବିଧାୟକ ସୂର୍ଯ୍ୟବଂଶୀ ସୁରଜଙ୍କ ନାଁ ତାଲିକାରେ ରହିଛି । ସେହିପରି ତାଲିକାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଅଶ୍ୱିନୀ ବୈଷ୍ଣବ, ଅର୍ଜୁନ ମୁଣ୍ଡା ଓ ବିଶେଶ୍ୱର ଟୁଡ଼ୁଙ୍କ ନାଁ ରହିଛି । ଏଥର ବିଜେପିର ଷ୍ଟାର କ୍ୟାମ୍ପେନ ତାଲିକାରେ ରାଷ୍ଟ୍ରୀୟ ଅଧ୍ୟକ୍ଷ ବୈଜୟନ୍ତ ପଣ୍ଡାଙ୍କ ନାଁ ରହିଥିବା ବେଳେ, କ୍ଷେତ୍ର ପ୍ରଭାରୀ ସୁନୀଲ ବଂଶଲଙ୍କ ନାଁ ମଧ୍ୟ ପ୍ରକାଶ ପାଇଛି । ଧାମନଗର ଉପନିର୍ବାଚନରେ ବିଜେପି ବାଜିମାତ୍‌ କରିବା ପରେ ପଦ୍ମପୁର ଆସନ ହାତେଇବାକୁ ଏଥର କଡ଼ା କସରତ କରିଛି ଦଳ । ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କ ନାଁ ମଧ୍ୟ ପଦ୍ମପୁର ଷ୍ଟାର ପ୍ରଚାରକ ତାଲିକାରେ ପ୍ରକାଶ ପାଇଛି । ସେହିପରି ପ୍ରଭାରୀ ଡି. ପୁରନ୍ଦେଶ୍ୱରୀ ମଧ୍ୟ ପଦ୍ମପୁର ପାଇଁ ମୈଦାନକୁ ଓହ୍ଲାଇବେ ବୋଲି ତାଲିକାରୁ ଜଣାପଡ଼ିଛି ।

Comments are closed.