ଭୁବନେଶ୍ୱର: ବିଜେବି କଲେଜ ଛାତ୍ରୀ ରୁଚିକା ମହାନ୍ତି ମୃତ୍ୟୁ ଘଟଣା ଏବେ ପୁଣି କଡ଼ ଲେଉଟାଇଛି । ମାମଲାକୁ ନେଇ ଆରମ୍ଭ ହୋଇଛି ତନାଘନା । ଭୁବନେଶ୍ୱର ଡିସିପିଙ୍କୁ ଉଚ୍ଚ ଶିକ୍ଷା ପ୍ରମୁଖ ସଚିବ ରିପୋର୍ଟ ମାଗିଛନ୍ତି । ଆଜି ସୁଦ୍ଧା ତଦନ୍ତର ଅଗ୍ରଗତି ଜଣାଇବାକୁ ସଚିବ ରିପୋର୍ଟ ମାଗିଥିବା ଜଣାପଡ଼ିଛି ।
ସୂଚନା ଥାଉ କି, ରୁଚିକା ମହାନ୍ତିଙ୍କ ଆତ୍ମହତ୍ୟା ପ୍ରସଙ୍ଗରେ ପୂର୍ବରୁ ଡିସିପି ପ୍ରତୀକ ସିଂ ଗଣମାଧ୍ୟମକୁ ପ୍ରତିକ୍ରିୟା ଦେଇଥିଲେ । ରୁଚିକାଙ୍କ ଆତ୍ମହତ୍ୟା ରାଗିଂ ପାଇଁ ହୋଇନାହିଁ ବୋଲି କହିଥିଲେ ଡିସିପି । ତାହା ସହ ଏହି ମାମଲାରେ ୧୯୮ ଜଣଙ୍କୁ ପୁଲିସ ପଚରାଉଚରା କରିଥିବା ଡିସିପି କହିଥିଲେ ।
ରୁଚିକାର ସମ୍ପର୍କୀୟ, ସାଙ୍ଗ ଓ ହଷ୍ଟେଲ ଷ୍ଟାଫଙ୍କୁ ପଚରାଉଚୁରା କରିଥିଲା ପୁଲିସ । ରୁଚିକା ରୁମରୁ ଯେଉଁ ମୋବାଇଲ୍ ମିଳିଥିଲା, ତାକୁ ଏବେ ଖୋଲିବାକୁ ଚେଷ୍ଟା କରିଥିଲା । ରୁଚିକାଙ୍କ ମୋବାଇଲରୁ ସମସ୍ତ ତଥ୍ୟ ସଂଗ୍ରହ କରାଯାଇଥିଲା । ତାଙ୍କ ଡାଟା ଯେପରି ଡିଲିଟ ନହୋଇ ଫୋନ ଖୋଲିବ ସେ ଦିଗରେ ଚେଷ୍ଟା କରୁଥିବା କହିଥିଲା ପୁଲିସ । ସେଥିପାଇଁ ମୋବାଇଲ ଫୋନକୁ ସିଙ୍ଗାପୁର ପଠାଯାଇଥିଲା । ହେଲେ ଏଯାଏଁ ଏମିତି କିଛି ତଥ୍ୟ ମିଳିନି ଯାହା କଲେଜରେ ତାଙ୍କୁ ରାଗିଂ ହୋଇଛି ବୋଲି ଦର୍ଶାଯାଇପାରିବ ବୋଲି କହିଥିଲେ ଡିସିପି । ରୁଚିକାଙ୍କର କଲେଜ ହଷ୍ଟେଲରେ ରାଗିଂ ହୋଇଥିବା ନେଇ ପୁଲିସକୁ କୌଣସି ସୁରାକ୍ ମିଳିନି ।
