ଭୋପାଳ: ମଧ୍ୟପ୍ରଦେଶର ଗୁନା ଜିଲା ଆରୋନା ଥାନା ଅଞ୍ଚଳରେ ଶନିବାର କୃଷ୍ଣସାର ମୃଗ ଶିକାରୀଙ୍କ ଗୁଳିରେ ୩ଜଣ ପୁଲିସ କର୍ମଚାରୀ ପ୍ରାଣ ହରାଇଛନ୍ତି। ଏ ସଂପର୍କରେ ଗଣମାଧ୍ୟମକୁ ସୂଚନା ଦେଇ ମଧ୍ୟପ୍ରଦେଶ ଗୃହମନ୍ତ୍ରୀ ନରୋତ୍ତମ ମିଶ୍ର କହିଛନ୍ତି ଭୋପାଳଠାରୁ ୧୬୦ କିମି ଦୂର ଆରୋନଠାରେ ଥିବା ଜଙ୍ଗଲରେ କେତେକ ଶିକାରୀ ୪ଟି ବିରଳ ପ୍ରଜାତି ମୃଗ ଶିକାର କରିଥିବା ଖବର ପାଇ ସ୍ଥାନୀୟ ଥାନାର କର୍ମଚାରୀ ଘଟଣାସ୍ଥଳକୁ ଯାଇ ଶିକାରୀଙ୍କୁ ଧରିବାକୁ ଚେଷ୍ଟା କରିଥିଲେ। ତେବେ ପୁଲିସ ଉପରକୁ ଶିକାରୀମାନେ ଗୁଳିଚାଳନା କରିବାରୁ ଘଟଣାସ୍ଥଳରେ ସହକାରୀ ଆରକ୍ଷୀ ନିରୀକ୍ଷକ ରାଜକୁମାର ଯାଦବ, ଦୁଇ କନଷ୍ଟେବଳ ନିଲେଶ ଭାର୍ଗବ ଓ ସନ୍ତରାମ ମୀନା ପ୍ରାଣ ହରାଇଥିଲେ।
ଏହା ଏକ ଦୁର୍ଭାଗ୍ୟଜନକ ଘଟଣା। ଗୁଳି ଚଳାଇଥିବା ଶିକାରୀଙ୍କୁ ଗିରଫ କରିବାକୁ ଉଦ୍ୟମ ଜାରି ରହିଥିବା ଗୃହମନ୍ତ୍ରୀ କହିଛନ୍ତି। ଦୋଷୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ଚେତାବନୀ ଦେଇଛନ୍ତି। ଅନ୍ୟପକ୍ଷରେ ଏହି ଘଟଣାରେ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାମ ସିଂହ ଚୌହ୍ବାନ ଦୁଃଖପ୍ରକାଶ କରିବା ସହ ପ୍ରତି ମୃତ ପୁଲିସ କର୍ମଚାରୀଙ୍କ ପରିବାରକୁ ୧କୋଟି ଟଙ୍କା ଲେଖାଏଁ ସହାୟତା ପ୍ରଦାନ କରିବାକୁ ଘୋଷଣା କରିଛନ୍ତି। ଏଥିସହ ମୃତକଙ୍କ ପରିବାରର ଜଣଙ୍କୁ ସରକାରୀ ଚାକିରି ପ୍ରଦାନ କରାଯିବ। ଘଟଣା ସଂପର୍କରେ ଜାଣିବା ପରେ ମଧ୍ୟ ବିଳମ୍ବରେ ଘଟଣାସ୍ଥଳରେ ପହଞ୍ଚିଥିବା ଯୋଗୁଁ ଗ୍ବାଲିୟର୍ ଆଇଜି ଅନୀଲ ଶର୍ମାଙ୍କୁ ନିଲମ୍ବିତ କରାଯାଇଥିବା ଜଣାପଡ଼ିଛି।
