ଭବାନୀପାଟଣା: ଓଡ଼ିଶା ସରକାର ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବସ୍ତି ବାସିନ୍ଦାଙ୍କୁ ଭୂ-ପ୍ରମାଣପତ୍ର ପ୍ରଦାନ କାର୍ଯ୍ୟକ୍ରମ ‘ଜାଗା ମିଶନ’ର ସମୀକ୍ଷା କରି ଉପଯୁକ୍ତ ପରାମର୍ଶ ଦେବା ନିମନ୍ତେ ସରକାରଙ୍କ ଗୃହ ଓ ନଗର ଉନ୍ନୟନ ବିଭାଗ ତରଫରୁ ଜାଗା ମିଶନ ପରାମର୍ଶଦାତା ହରିଶଙ୍କର ରାଉତ କଳାହାଣ୍ଡି ଜିଲା ପରିଦର୍ଶନ କରିଛନ୍ତି। କଳାହାଣ୍ଡିର ଭବାନୀପାଟଣା ପୌରପାଳିକା, କେସିଙ୍ଗା, ଜୁନାଗଡ ଏବଂ ଧର୍ମଗଡ ବିଜ୍ଞାପିତ ଅଞ୍ଚଳ ପରିଷଦ ଆଦିର ବିଭିନ୍ନ ବସ୍ତିଗୁଡିକୁ ବୁଲି ପରିଦର୍ଶନ କରିଛନ୍ତି। ଜାଗା ମିଶନ ମାଧ୍ୟମରେ ବିଭିନ୍ନ ବସ୍ତିମାନଙ୍କରେ ଦିଆଯାଇଥିବା ଭୂମି ଯୋଗ୍ୟତା ପତ୍ର ମାଧ୍ୟମରେ କେତେ ଜଣ ହିତାଧିକାରୀ ପଟ୍ଟା ପାଇଛନ୍ତି ଏବଂ ଅବଶିଷ୍ଟ ପ୍ରମାଣପତ୍ର କେଉଁ କାରଣରୁ ଦିଆଯାଇ ପାରିନାହିଁ ତଥା ସହରାଞ୍ଚଳର ବସ୍ତିକୁ କିପରି ପୁନଃ ଉଦ୍ଧାର କରି ଅନ୍ୟ ସ୍ଥାନକୁ ସ୍ଥାନାନ୍ତରିତ କରାଯାଇପାରିବ ସେ ବିଷୟରେ ନଗର ପାଳିକା, ସିଏମଏମ ଏବଂ ଏସଡିଏ ସହିତ ଆଲୋଚନା କରିଥିଲେ। ସେ ଗତ ବୁଧବାର ଦିନ ଭବାନୀପାଟଣା ପୌରପାଳିକାର ବିଭିନ୍ନ ବସ୍ତିଗୁଡ଼ିକ ପରିଦର୍ଶନ କରିଥିଲେ। ତାଙ୍କ ସହିତ ଭବାନୀପାଟଣା ପୌରପରିଷଦର ନଗପାଳିକା ସଂଯୁକ୍ତା ବେହେରା ଉପସ୍ଥିତ ରହି ବସ୍ତି ବାସିନ୍ଦାଙ୍କ ପଟ୍ଟା ପାଇବା ବିଷୟରେ ଉପୁଜୁଥିବା ସମସ୍ୟାକୁ ପରାମର୍ଶଦାତାଙ୍କ ସମ୍ମୁଖରେ ଉପସ୍ଥାପନ କରି ମୁଖ୍ୟମନ୍ତ୍ରୀ କାର୍ଯ୍ୟାଳୟରେ ଏ ବିଷୟରେ ଜଣାଇ ସମାଧାନ ପାଇଁ ନିବେଦନ କରିଥିଲେ। ଏହା ସହିତ ପରାମର୍ଶଦାତା ହରିଶଙ୍କର ରାଉତ ଗୁରୁବାର କେସିଙ୍ଗା ଓ ଶୁକ୍ରବାର ଜୁନାଗଡ ଏବଂ ଧର୍ମଗଡ ବିଜ୍ଞାପିତ ଅଞ୍ଚଳଗୁଡିକ ପରିଦର୍ଶନ କରିଛନ୍ତି।
Comments are closed.