ଭଦ୍ରକ: ଭଦ୍ରକ ଜିଲ୍ଲା ଧାମନଗର ବ୍ଲକ ମଙ୍ଗଳପୁର ପେଟ୍ରୋଲ ପମ୍ପ ନିକଟରେ ଅଘଟଣ। ବନ ବିଭାଗକୁ ଚକମା ଦେଇ ଖସିଯାଉଥିବାବେଳେ ରାସ୍ତାକଡ଼କୁ ଓଲଟି ପଡ଼ିଲା ଚୋରା କାଠ ବୋଝେଇ ପିକ୍ଅପ୍ ଭ୍ୟାନ୍ । ସୋମବାର ରାତିରେ ବନ ବିଭାଗର ଏକ ଟିମ୍ ସହିଦନଗରର ବାରୁଅ ଅଞ୍ଚଳ ପରିଦର୍ଶନ କରି ଧାମନଗରକୁ ଫେରୁଥିଲେ। ଏତିକିବେଳେ ଏକ ଚୋରା କାଠ ବୋଝେଇ ପିକଅପ୍ ଭ୍ୟାନ୍ ଦ୍ରୁତ ଗତିରେ ଭଦ୍ରକ ଆଡୁ ଧାମନଗରକୁ ଆସୁଥିଲା। ବନ ବିଭାଗ ମଙ୍ଗଳପୁର ପେଟ୍ରୋଲ ପମ୍ପ ନିକଟରେ ଉକ୍ତ ଗାଡିକୁ ଅଟକାଇବାକୁ ଚେଷ୍ଟା କରିଥିଲା। ହେଲେ ପିକଅପ୍ ଭ୍ୟାନଟି ବନ ବିଭାଗକୁ ଚକମା ଦେଇ ଖସିଯାଇଥିଲା। ବନ ବିଭାଗ କର୍ମଚାରୀମାନେ ଗାଡିଟିକୁ ଧରିବାକୁ ଉଦ୍ୟମ କରିଥିଲେ। ଗାଡିଟି ଦ୍ରୁତ ଗତିରେ ଧାମନଗର ଆଡକୁ ଯିବା ସମୟରେ ଭାରସାମ୍ୟ ହରାଇ ଓଲଟି ପଡିଥିଲା। ଦୁର୍ଘଟଣା ପରେ ଗାଡ଼ିର ଡ୍ରାଇଭର ଏବଂ ହେଲପରଙ୍କ ସମେତ ୩ ଜଣ ଫେରାର ହୋଇଯାଇଥିଲେ। ବନ ବିଭାଗ ଚୋର କାଠକୁ ଜବତ କରି ଘଟଣାର ତଦନ୍ତ କରୁଛି।
