ବେଗୁନିଆ: ଖୋର୍ଦ୍ଧା ଜିଲ୍ଲା ବେଗୁନିଆ ପଞ୍ଚାୟତ ସମିତି ତରଫରୁ ଆଜି ବେଗୁନିଆ ପଞ୍ଚାୟତ ସମିତିର ପ୍ରଥମ ସାଧାରଣ ଅଧିବେଶନ ବ୍ଲକ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଯାଇଛି। ଆଜି ଅନୁଷ୍ଠିତ ପ୍ରଥମ ବୈଠକରେ ବିଡିଓ ଲଷ୍ମୀଧର ସାହୁ ପ୍ରଥମେ ସମସ୍ତ ନବନିର୍ବାଚିତ ଜିଲ୍ଲା ପରିଷଦ ସଭ୍ୟ, ସରପଞ୍ଚ ଏବଂ ସମିତି ସଭ୍ୟମାନଙ୍କୁ ସ୍ୱାଗତ ଜଣାଇଥିଲେ। କେନ୍ଦ୍ର ସରକାର ଏବଂ ରାଜ୍ୟ ସରକାର ଲୋକମାନଙ୍କ ହିତରେ ପ୍ରଣୟନ କରୁଥିବା ଯୋଜନା ଗୁଡିକ ଠିକ ଭାବେ କାର୍ଯ୍ୟକାରୀ କରିବା କ୍ଷେତ୍ରରେ ସେ ସମସ୍ତ ଜନ ପ୍ରତିନିଧିମାନଙ୍କର ସାହାଯ୍ୟ ଏବଂ ସହଯୋଗ ଲୋଡିଥିଲେ।
ସମସ୍ତଙ୍କ ସହଯୋଗରେ ବେଗୁନିଆ ବ୍ଲକ ମହାତ୍ମା ଗାନ୍ଧୀ ଜାତୀୟ ନିଶ୍ଚିତ କର୍ମ ନିଯୁକ୍ତି ଯୋଜନା ଏବଂ ଜୀବିକା ମିଶନରେ ଖୋର୍ଦ୍ଧା ଜିଲ୍ଲାରେ ଆଜି ପ୍ରଥମ ହୋଇପାରିଛି ବୋଲି କହିଥିଲେ। ବିଡିଓ ଶ୍ରୀ ସାହୁ ନବନିର୍ବାଚିତ ଅଧ୍ୟକ୍ଷ, ଜିଲ୍ଲାପରିଷଦ ସଭ୍ୟ, ସରପଞ୍ଚ ଏବଂ ସମିତି ସଭ୍ୟମାନଙ୍କୁ ସମ୍ବର୍ଦ୍ଧିତ କରିଥିଲେ। ପରେ ଜିପିଓ ଦେବାଶିଷ ସାହୁ ପୂର୍ବ ବର୍ଷରେ ହୋଇଥିବା ଶେଷ ବୈଠକର ବିବରଣୀ ପଠନ କରିଥିଲେ। ବ୍ଲକରେ ଶିକ୍ଷା, ସ୍ୱାସ୍ଥ୍ୟ, କୃଷି,ପ୍ରାଣୀ ଚିକିତ୍ସା, ମୃତ୍ତିକା ସରଂକ୍ଷଣ, ଉଦ୍ୟାନ ବିଭାଗ, ସାଧାରଣ ବଣ୍ଟନ ବ୍ୟବସ୍ଥା, ପାନୀୟ ଜଳ ଯୋଗାଣ, ଶିଶୁ ବିକାଶ ଏବଂ ମିଶନ ଶକ୍ତି ଯୋଜନା ଉପରେ ବିଭାଗୀୟ କର୍ମଚାରୀମାନେ ଆଲୋଚନା କରିଥିବା ବେଳେ ପ୍ରତିନିଧିମାନେ ସେହି ସବୁ ଯୋଜନା ଉପରେ ରହିଥିବା ସମସ୍ୟା ଉପରେ ଆଲୋଚନା କରିଥିଲେ।
ଏହି ବୈଠକକୁ ବିଭିନ୍ନ ବିଭାଗ ସହିତ ଲାଇନ ଡିପାର୍ଟମେଣ୍ଟର ଅଧିକାରୀମାନଙ୍କୁ ଡ଼କା ଯାଇଥିବା ବେଳେ ବହୁ ଅଧିକାରୀ ବିଭିନ୍ନ ଆଳ ଦେଖାଇ ଅଧିବେଶନକୁ ନ ଆସି ତଳିଆ କର୍ମଚାରୀଙ୍କୁ ପଠାଇ ଦେଇଥିଲେ। ଫଳରେ ବେଗୁନିଆ ସରପଞ୍ଚ ସତ୍ୟନାରାୟଣ ପ୍ରଧାନ ସମ୍ପୃକ୍ତ ବିଭାଗର ଅଧିକାରୀମାନେ ନ ଆସିଲେ ସମସ୍ୟାର ସମାଧାନ କଣ ଏଇ ତଳିଆ କର୍ମଚାରୀ ମାନେ କରିବେ ବୋଲି ପ୍ରଶ୍ନ କରିଥିଲେ। ତେଣୁ ପରବର୍ତ୍ତୀ ବୈଠକରେ ଯେପରି ସମସ୍ତ ଅଧିକାରୀମାନେ ଉପସ୍ଥିତ ରହିବେ ସେଥିପ୍ରତି ବିଡିଓ ଆବଶ୍ୟକ ପଦକ୍ଷେପ ନେବେ ବୋଲି ସେ ଅନୁରୋଧ କରିଥିଲେ। ନବ ନିର୍ବାଚିତ ପ୍ରତିନିଧିମାନେ ପଞ୍ଚାୟତରେ ଥିବା ବିଭିନ୍ନ ସମସ୍ୟା ସମ୍ପର୍କରେ ବ୍ଲକ ପ୍ରଶାସନର ଦୃଷ୍ଟି ଆକର୍ଷଣ କରିଥିବା ବେଳେ ବିଡିଓ ଶ୍ରୀ ସାହୁ ସମସ୍ତଙ୍କ ସହଯୋଗରେ ଗଠନାତ୍ମକ ଚିନ୍ତାଧାରା ନେଇ କାର୍ଯ୍ୟ କରିବା ପାଇ ସମସ୍ତଙ୍କୁ ଅନୁରୋଧ କରିଥିଲେ।
