ନୂଆଦିଲ୍ଲୀ: ଭାରତୀୟ ଦଳର ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନୀଙ୍କ ଅବସରକୁ ନେଇ ସବୁବେଳେ ଚର୍ଚ୍ଚା ଲାଗି ରହିଥାଏ। ଧୋନୀ ଅବସର ନେବେ ନା ଆଉ କିଛିଦିନ ଖେଳିବେ, ଏହା ଜାଣିବା ଲାଗି କ୍ରିକେଟପ୍ରେମୀ ତଥା ଧୋନୀଙ୍କ ପ୍ରଶଂସକଙ୍କ ମଧ୍ୟରେ ସବୁବେଳେ ଉତ୍କଣ୍ଠା ଦେଖିବାକୁ ମିଳିଥାଏ। ତେବେ ଗୁରୁବାର ବିସିସିଆଇ(ବୋର୍ଡ ଅଫ୍ କ୍ରିକେଟ ଫର କଂଟ୍ରୋଲ ଇନ୍ ଇଣ୍ଡିଆ) ପକ୍ଷରୁ ପ୍ରକାଶିତ ବାର୍ଷିକ ଚୁକ୍ତି ତାଲିକାରୁ ଧୋନୀଙ୍କୁ ବାଦ୍ ଦିଆଯିବା ପରେ ତାଙ୍କ ଯୁଗ ଶେଷ ହୋଇଯାଇଥିବା ଚର୍ଚ୍ଚା ହେଉଛି।
ଗୁରୁବାର ବିସିସିଆଇ ଭାରତୀୟ ଖେଳାଳିମାନଙ୍କ ବାର୍ଷିକ ଚୁକ୍ତି ତାଲିକା ଜାରି କରିଛି। ୨୦୧୯ ଅକ୍ଟୋବରରୁ ୨୦୨୦ ସେପ୍ଟେମ୍ବର ପର୍ଯ୍ୟନ୍ତ ଥିବା ଏହି ଚୁକ୍ତି ତାଲିକାରେ ଧୋନୀଙ୍କ ନାମ ନାହିଁ। ଧୋନୀ ଅବସର ନେବା ବିଷୟରେ ଘୋଷଣା କରି ନ ଥିଲେ ହେଁ, ଗତବର୍ଷ ତାଙ୍କୁ ‘ଏ’ ଗ୍ରେଡ୍ କଣ୍ଟ୍ରାକ୍ଟ ମିଳିଥିବାବେଳେ ଏଥର ବାଦ୍ ଦିଆଯାଇଥିବାରୁ ସେ କ୍ରିକେଟରୁ ସନ୍ନ୍ୟାସ ନେବା ଲାଗି ଯୋଜନା କରୁଥିବା କଥାକୁ ନେଇ ପୁଣି ଚର୍ଚ୍ଚା ଜୋର ଧରିଛି।
ସୂଚନା ଅନୁସାରେ, ନୂଆ କଣ୍ଟ୍ରାକ୍ଟ ତାଲିକା ଅନୁଯାୟୀ ବର୍ତ୍ତମାନର ଅଧିନାୟକ ବିରାଟ କୋହଲି, ଓପନର ରୋହିତ ଶର୍ମା ଏବଂ ଦ୍ରୁତ ବୋଲର ଯଶପ୍ରୀତ ବୁମ୍ରା ଗେଡ୍ ‘ଏ’ ପ୍ଲସ ତାଲିକାରେ ରହିଛନ୍ତି। ସେହିପରି ଗ୍ରେଡ୍ ‘ଏ’ରେ ଆର. ଅଶ୍ଵିନୀ, ରବୀନ୍ଦ୍ର ଜାଡେଜା, ଭୁବନେଶ୍ଵର କୁମାର, ଚେତେଶ୍ଵର ପୂଜାରା, ଆଜିଙ୍କ୍ୟ ରାହାଣେ, କେ. ଏଲ. ରାହୁଲ, ଶିଖର ଧାୱନ, ମହମ୍ମଦ ସାମୀ, ଈଶାନ୍ତ ଶର୍ମା, କୁଲଦୀପ ଯାଦବ ଏବଂ ଋଷଭ ପନ୍ତ ରହିଛନ୍ତି। ଏହାବ୍ୟତୀତ ଗ୍ରେଡ୍ ‘ବି’ରେ ରିଦ୍ଧିମାନ ଶାହା, ଉମେଶ ଯାଦବ, ୟୁଜଭେନ୍ଦ୍ର ଚହଲ, ହାର୍ଦ୍ଦିକ ପାଣ୍ଡ୍ୟା ଏବଂ ମୟଙ୍କ ଅଗ୍ରୱାଲ ପ୍ରମୁଖ ରହିଛନ୍ତି।
୨୦୦୪ ଡିସେମ୍ବର ୨୩ରେ ବାଂଲାଦେଶ ବିପକ୍ଷରେ ଧୋନୀ ପ୍ରଥମେ ଅନ୍ତର୍ଜାତୀୟ କ୍ରିକେଟରେ ପଦାର୍ପଣ କରିଥିଲେ। ୨୦୧୯ ବିଶ୍ଵକପ୍ ସେମିଫାଇନାଲରେ ନ୍ୟୁଜିଲାଣ୍ଡ ବିପକ୍ଷ ମ୍ୟାଚ ତାଙ୍କର ଶେଷ ମ୍ୟାଚ୍ ଥିଲା। ନିଜର ଦୃଢ଼ ଏବଂ ଅଭିଜ୍ଞ ନେତୃତ୍ଵ ବଳରେ ସେ ୨୦୧୧ରେ ଭାରତକୁ ବିଶ୍ଵକପ ଦେଇଥିଲେ। ଧୋନୀ ଅନ୍ତର୍ଜାତୀୟ କ୍ୟାରିୟରରେ ୯୦ଟି ଟେଷ୍ଟ ମ୍ୟାଚ, ୩୫୦ ଦିନିକିଆ ଏବଂ ୯୮ଟି ଟି-୨୦ ମ୍ୟାଚ୍ ଖେଳିଥିଲେ।
