ତିଗିରିଆ : ମହାନଦୀ କୂଳବର୍ତ୍ତୀ ଅଞ୍ଚଳରେ ଦିନକୁ ଦିନ ବାରହାଙ୍କ ଉପଦ୍ରବ ବଢ଼ିଚାଲିଛି । ପଲ ପଲ ବାରହା ବିଭିନ୍ନ କ୍ଷେତବାଡ଼ିରେ ପଶି କ୍ଷତି ଘଟାଉଥିବାରୁ ଚାଷୀ ଅତିଷ୍ଠ ହେଲେଣି । ବିଶେଷ କରି ବନ୍ଧବାଡ଼ ତଳେ ତିଗିରିଆ ବ୍ଲକର ହାଟମାଳ, ବାଙ୍କୀ ଉତ୍ତର କୁଳାଟର ବାଉଁଶପୁଟ ଏବଂ ବନ୍ଦାଳ ପଞ୍ଚାୟତର ବିଭିନ୍ନ ଗ୍ରାମରେ ଚାଷୀ କ୍ଷତିଗ୍ରସ୍ତ ହେଉଛନ୍ତି । ଚାଷୀଙ୍କ ଠାରୁ ମିଳିଥିବା ସୂଚନା ମୁତାବକ ଗତ ପ୍ରାୟ ୧ ମାସ ହେଲା ବହୁ ସଂଖ୍ୟାରେ ବାରହା ଚାଷୀଙ୍କ ବିଲ ବାଡ଼ିରେ ଲାଗିଥିବା ପାଳୁଅ, କନ୍ଦମୂଳ ଏବଂ ସାରୁ ଆଦି ତାଡ଼ି ଖାଇଯାଉଛନ୍ତି । ଦଳଦଳ ହୋଇ ବାରହା ଧାନ କ୍ଷେତରେ ପଶି ଧାନଗଛକୁ ଦଳି ଚକଟି ଗଡ଼ିବା ଯୋଗୁଁ ଧାନଗଛ ସବୁ ମାଟିରେ ଲୋଟି ପଡ଼ୁଛି। ଏହାଛଡ଼ା ବାର୍ହାମାନେ କ୍ଷେତଗୁଡ଼ିକର ହିଡ଼କୁ ତାଡ଼ି ଦେଉଥିବାରୁ ଚାଷୀ ଧାନଗଛ ପାଇଁ ବନ୍ଧାଇ ରଖିଥିବା ଜଳ ବୋହିଯାଉଥିବା ହାଟମାଳ ଗ୍ରାମର ବହୁ ଚାଷୀ ଅଭିଯୋଗ କରିଛନ୍ତି । ଅପରପକ୍ଷେ ବାରହା ଆକ୍ରମଣରେ ଗତ ବର୍ଷ ହାଟମାଳ ପଞ୍ଚାୟତରେ ୩ଜଣଙ୍କ ଅବସ୍ଥା ଗୁରୁତର ହୋଇଥିଲା। ଏଣୁ ଚାଷୀ ପୁରୁଣା କଥାକୁ ମନେପକାଇ ବାରହାଙ୍କୁ ଦେଖି ଭୟଭୀତ ହେଉଛନ୍ତି । ବାରମ୍ବାର ଏନେଇ ଚାଷୀ ଅଭିଯୋଗ କରୁଥିଲେ ମଧ୍ୟ ବନବିଭାଗ ପକ୍ଷରୁ ବାରହା ଉପଦ୍ରବ ରୋକିବାରେ କୌଣସି ପଦକ୍ଷେପ ନିଆଯାଉନଥିବା ଚାଷୀ କହିଛନ୍ତି । ମହାନଦୀକୂଳ ବନ୍ଧବାଡ଼ର ଉଭୟ ପଟରେ ଗତ ୨/୩ ବର୍ଷ ମଧ୍ୟରେ ବିଭିନ୍ନ ସ୍ଥାନରେ ବନୀକରଣ କରାଯିବା ସହିତ ଘଞ୍ଚ ବଣବୁଦା ସୃଷ୍ଟି ହୋଇଛି । ଏଣୁ ବାରହା ସହିତ ଅନ୍ୟ କେତେକ ଛୋଟ ଜଙ୍ଗଲୀଜନ୍ତୁ ରହୁଥିବା ଜଣାପଡ଼ିଛି। ବନ୍ୟଜନ୍ତୁଙ୍କ ସୁରକ୍ଷା ସହିତ କ୍ଷେତବାଡ଼ିର ସୁରକ୍ଷା ପାଇଁ ବନବିଭାଗ ପକ୍ଷରୁ ନଦୀକୂଳ ଅଞ୍ଚଳରେ କର୍ମଚାରୀ ନିୟୋଜନ କରାଯାଇ ଏଦିଗରେ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି ହୋଇଛି।
Popular Categories
Previous article
Next article