ରେଙ୍ଗାଲିକ୍ୟାମ୍ପ: ବରଗଡ଼ ଜିଲ୍ଲା ଅତାବିରା ବ୍ଲକ କୁଲିତା ଟୁକୁରା ପଞ୍ଚାୟତ ର ଗାନ୍ଧିଟିକ୍ରା ଗ୍ରାମରେ ନିୟମିତ ପାନୀୟ ଜଳ ଯୋଗାଣ କରାଯାଉନାହିଁ। ଡ୍ରେନ ପାଣି ନିଷ୍କାସନ ଠିକ ଭାବରେ ହେଉନାହିଁ। ଯାହାଫଳରେ ଗ୍ରାମବାସୀ ଅନେକ ଅସୁବିଧାର ସମ୍ମୁଖୀନ ହେଉଛନ୍ତି । ଏହା ପ୍ରତିବାଦରେ ଗ୍ରାମବାସୀମାନେ ବୁଧବାର ପଞ୍ଚାୟତ କାର୍ଯ୍ୟାଳୟ ଫାଟକରେ ତାଲା ପକାଇ ଦେଇଥିଲେ। ଫୂର୍ବାହ୍ନ ୧୦ଟା ୩୦ରୁ ଅପରାହ୍ନ ୧ଟା ୩୦ ପର୍ଯ୍ୟନ୍ତ ୩ ଘଣ୍ଟା ଧରି ତାଲା କରାଯିବାରୁ ପଞ୍ଚାୟତ କାର୍ଯ୍ୟାଳୟ ବାହାରେ ଓ ଭିତରେ ଥିବା ହିତାଧିକାରୀଙ୍କ ମଧ୍ୟରେ ଉତ୍ତେଜନା ଦେଖାଯାଇଥିଲା। ସୂଚନା ପାଇ ଘଟଣା ସ୍ଥଳକୁ ଗୋଡ଼ଭଗା ଫାଣ୍ଡି ଅଧିକାରୀ ଓ ଅତାବିରା ଗୋଷ୍ଠୀ ଉନ୍ନୟନ ଅଧିକାରୀ ପହଞ୍ଚିଥିଲେ। ପଞ୍ଚାୟତକୁ ମାଗଣା ଚାଉଳ ନେବାକୁ ଆସିଥିବା ହିତାଧିକାରୀମାନେ ଭିତରେ ଦୀର୍ଘ ୩ ଘଣ୍ଟା ରହି ହଟହଟା ହୋଇଥିବାରୁ ପୁଲିସ ନିକଟରେ ଲିଖିତ ଅଭିଯୋଗ କରିଥିଲେ।
ଅନ୍ୟପଟେ ଡ୍ରେନ ପାଣି ନିଷ୍କାସନ ହେଉ ନ ଥିବାରୁ ଦୁର୍ଗନ୍ଧରେ ଗ୍ରାମବାସୀ ଅତିଷ୍ଠ ହେଉଛନ୍ତି। ତେଣୁ ବାଧ୍ୟ ହୋଇ ସେମାନେ ପଞ୍ଚାୟତ କାର୍ଯ୍ୟାଳୟରେ ତାଳା ପକାଇଥିବା ଗ୍ରାମବାସୀ କହିଥିଲେ। ପାନୀୟ ଜଳ ସମସ୍ୟା ଦେଖାଯାଉଥିବାରୁ ଏ ବିଷୟରେ ଦିନକୁ ଦିନ ଅଞ୍ଚଳରେ ଜନ ଅସନ୍ତୋଷ ବଢ଼ିଚାଲିଛି। ଏ ବିଷୟ ରେ ପଞ୍ଚାୟତ ଜିଆରଏସ ରବୀନ୍ଦ୍ର କଲତାଙ୍କୁ ପଚରାଯିବାରୁ ଡ୍ରେନ ସଫେଇ କରାଯିବ ଏବଂ ଅଭିଯୋଗ କରିଥିବା ସମସ୍ୟାଗୁଡିକର ସମାଧାନ କରାଯିବ ବୋଲି କରିଥିଲେ । ଏ ବିଷୟ ରେ ଗୋଡ଼ଭଗା ଫାଣ୍ଡି ଅଧିକାରୀ ଗଣେଶ ବାରିକ କହିଛନ୍ତି, ଅଭିଯୋଗ ଉପରେ ତଦନ୍ତ କରାଯାଉଛି। ତେବେ ପ୍ରଶାସନ ଓ ପୁଲିସ ଗ୍ରାମବାସୀଙ୍କ ସହ ଆଲୋଚନା କରିଥିଲେ। ପଞ୍ଚାୟତ ଭିଏଲଡବ୍ଲ୍ୟୁ, ଜିଆରଏସ, ବ୍ଲକ ଜିପି ଓ ଫାଣ୍ଡି ଅଧିକାରୀ ପ୍ରମୁଖ ଗ୍ରାମବାସୀଙ୍କ ସହ ଆଲୋଚନା କଲା ପରେ ଫାଟକରୁ ଖୋଲାଯାଇଥିଲା।
