କଟକ: ଐତିହାସିକ ବାଲିଯାତ୍ରା ଆଉ ମାତ୍ର ସପ୍ତାହେ ବାକି ରହିଥିବା ବେଳେ ପ୍ଲଟ ଆବଣ୍ଟନକୁ ନେଇ ବିବାଦ ଦିନକୁ ଦିନ ତେଜିବାରେ ଲାଗିଛି । ଶୁକ୍ରବାର ପୁଣି ଥରେ ପ୍ଲଟ ଆବଣ୍ଟନକୁ ଅଧାରୁ ବର୍ଜନ କରିଛନ୍ତି ବ୍ୟବସାୟୀ ସଂଘ । ପ୍ରଶାସନ ଆବଣ୍ଟନ ନିୟମକୁ ବାରମ୍ବାର ବଦଳାଉ ଥିବାରୁ ବ୍ୟବସାୟୀ ସଂଘ ପକ୍ଷରୁ ଏଭଳି ନିଷ୍ପତି ନିଆଯାଇଛି । ଏହ ସହ ପ୍ଲଟ ପାଇଥିବା ବ୍ୟବସାୟୀଙ୍କୁ ପ୍ଲଟ ଫେରାଇ ଦେବାକୁ ସଂଘ ପକ୍ଷରୁ ଧମକ ମିଳିଛି । ଏସବୁ ମଧ୍ୟରେ ବାଲିଯାତ୍ରାରେ ଷ୍ଟଲ ପଡିବା ନେଇ ଏକ ପ୍ରକାର ଅନିଶ୍ଚିତତା ଦେଖାଯାଇଛି ।
ସୂଚନାଯୋଗ୍ୟ, ଚଳିତ ବର୍ଷ ବାଲିଯାତ୍ରାକୁ ଆଉ ୭ ଦିନ ବାକି ରହିଥିବା ବେଳେ ଏବେ ଦୁଇଟି ସମସ୍ୟା ମୁଣ୍ଡ ବିନ୍ଧାର କାରଣ ପାଲିଟିଛି । ପ୍ରଥମଟି ହେଲା ୪ ହଜାର ବର୍ଗଫୁଟରୁ ଅଧିକ ପ୍ଲଟ୍ ନେଉଥିବା ବ୍ୟବସାୟୀଙ୍କୁ ଏଯାଏଁ ଜମି ମିଳିନି ଏବଂ ଦ୍ବିତୀୟଟି ହେଲା ଜିଲ୍ଲାପାଳଙ୍କ ଅନୁମୋଦନ ବିନା କେହି ବ୍ୟବସାୟୀ ୪ ହଜାର ବର୍ଗଫୁଟରୁ ଅଧିକ ପ୍ଲଟ୍ ବୁକିଂ କରିପାରିବେ ନାହିଁ ବୋଲି ନିର୍ଦେଶ ରହିଛି । ଏହାକୁ ନେଇ ପ୍ରଶାସନ ଓ ସଂଘ ମଧ୍ୟରେ ବିବାଦ ଉପୁଜିଛି । ସେହିପରି ଚଳିତ ବର୍ଷ ବାଲିଯାତ୍ରାକୁ ଦୋଳି ଆସିବାକୁ ନେଇ ମଧ୍ୟ ଦ୍ବନ୍ଦ ସୃଷ୍ଟି ହୋଇଛି । ଏଥର ପ୍ରଥମ କରି ଦୋଳି ନିଲାମ ଉଦ୍ୟମ ପ୍ରଶାସନର ଫେଲ ମାରିବା ପରେ ପୁରୁଣା ଦୋଳି ବ୍ୟବସାୟଙ୍କ ସହ ଆଲୋଚନା କରିବା ବ୍ୟତିତ ପ୍ରଶାସନ ନିକଟରେ ଅନ୍ୟ କୌଣସି ବିକଳ୍ପ ନାହିଁ । ଯଦି ଆଲୋଚନା କରାନଯାଏ ତେବେ ଏବର୍ଷ ବିନା ଦୋଳିରେ ବାଲିଯାତ୍ରା ଦେଖିବାକୁ ମିଳିବ ।
