କନ୍ଧମାଳ: କନ୍ଧମାଳ ଜିଲା ତୁମୁଡିବନ୍ଧ ଥାନା ଅନ୍ତର୍ଗତ ସିର୍ଲା ଜଙ୍ଗଲରେ ମାଓବାଦୀ ଓ ସୁରକ୍ଷାକର୍ମୀଙ୍କ ମଧ୍ୟରେ ଗୁଳି ବିନିମୟ ଘଟିଛି। ଏଥିରେ ସୁରକ୍ଷାକର୍ମୀଙ୍କ ଗୁଳି ମାଡ଼ରେ ଜଣେ ମାଓବାଦୀ ମୃତ୍ୟୁ ହୋଇଥିବା ଜଣାପଡିଛି। ମୃତ ମାଓବାଦୀ ଜଣଙ୍କ ବଂଶଧାରା-ଘୁମୁସର-ନାଗାବଳୀ ଡିଭିଜନର ବୋଲି ସୂଚନା ମିଳିଛି। ଏହା ସହ ଘଟଣ ସ୍ଥଳରୁ ବିପୁଳ ପରିମାଣର ମାଓ ସାମଗ୍ରୀ ମଧ୍ୟ ଜବତ ହୋଇଛି। କନ୍ଧମାଳ ଏସପିଙ୍କ ନେତୃତ୍ବରେ ଜୋରଦାର ସର୍ଚ୍ଚ ଅପରେସନ ଜାରି ରହିଛି।
ଏଥି ସହ ଗତ ରବିବାର ଗୁଳିବିନିମୟ ବେଳେ ନିହତ ୪ ମାଓବାଦୀଙ୍କ ମଧ୍ୟରୁ ୩ ଜଣଙ୍କ ପରିଚୟ ମିଳିଛି। ସେମାନେ ହେଲେ ମାଓ ସଂଗଠନ ବିଜିଏନ ଡିଭିଜନର ରାଜ୍ୟ କମିଟି ସଦସ୍ୟ ସୁକ୍ର, ଆଞ୍ଚଳିକ କମିଟି ସଦସ୍ୟ ଇତେଶ ଓ ରିନା। ଅନ୍ୟ ଜଣେ ମହିଳା ମାଓବାଦୀ ନାମ ବର୍ତ୍ତମାନ ସୁଦ୍ଧା ଚିହ୍ନଟ ହୋଇନଥିବା ପୁଲିସ ପକ୍ଷରୁ ସୂଚନା ଦିଆଯାଇଛି।
