ବଲାଙ୍ଗିରରେ ୩ଶହ ଛୁଇଁଲା କରୋନା ସଂକ୍ରମିତଙ୍କ ସଂଖ୍ୟା

ବଲାଙ୍ଗିର: ବଲାଙ୍ଗିରରେ କରୋନା ସଂକ୍ରମଣ ଧିରେ ଧିରେ ବଢିବାରେ ଲାଗିଛି। ସହରର ପ୍ରାୟ ସମସ୍ତ ପଡାକୁ ଏହି ରୋଗ ବ୍ୟାପିଛି। ପ୍ରତିଦିନ କିଛି ନା କିଛି ପଜିଟିଭ ରୋଗୀଙ୍କ ସଂଖ୍ୟା ବଢୁଥିବା ବେଳେ ସହରର ମୁଖ୍ୟପଡାମାନଙ୍କରେ ଚିହ୍ନଟ ହେବା ଘଟଣା ଏବେ ସମସ୍ତଙ୍କୁ ଚିନ୍ତାରେ ପକାଇଛି। ଗୁରୁବାର ମାତ୍ର ଜଣେ ରୋଗୀ ଜିଲାର ଚିହ୍ନଟ ହୋଇଥିବା ବେଳେ ଶୁକ୍ରବାର ୬ ଜଣ ପଜିଟିଭ ଚିହ୍ନଟ ହୋଇଛନ୍ତି। ଏଥିସହ ବଲାଙ୍ଗିର ଜିଲାରେ ସଂକ୍ରମିତଙ୍କ ସଂଖ୍ୟା ୩୦୪ରେ ପହଞ୍ଚିଛି।

ସୂଚନା ଅନୁସାରେ ଶୁକ୍ରବାର ଚିହ୍ନଟ ହୋଇଥିବା ରୋଗୀଙ୍କ ମଧ୍ୟରେ ବଲାଙ୍ଗିର ସହରର ମାଲପଡା, ବରପାଲିପଡା, ଗାନ୍ଧିନଗରପଡା ଓ ବେହେରାପାଲିରୁ ଜଣେ ଲେଖାଏଁ କରୋନା ରୋଗୀ ଚିହ୍ନଟ ହୋଇଛନ୍ତି। ସେହିପରି ଲୋଇସିଂହା ବ୍ଲକ ବନଛୋରପାଲିରୁ ଜଣେ ରୋଗୀ କରୋନା ପଜିଟିଭ ଚିହ୍ନଟ ହୋଇ କୋଭିଡ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ସମସ୍ତ ରୋଗୀ ସ୍ଥାନୀୟ ସଂକ୍ରମିତ ବୋଲି ପ୍ରଶାସନ ସୂଚନା ଦେଇଛି।

ଅନ୍ୟପକ୍ଷରେ ଭୁବନେଶ୍ୱର ଆପୋଲୋ ଡାକ୍ତରଖାନାରେ ଭର୍ତ୍ତି ହୋଇଥିବା ତୁରେକେଲା ବ୍ଲକ ଟିକ୍ରାପଡାର ସାଲେମୁଡଗା ଗାଁର ଜଣେ ରୋଗୀ କରୋନା ପଜିଟିଭ ଚିହ୍ନଟ ହୋଇଥିବା ଜଣାପଡିଛି। ଶୁକ୍ରବାର ୬ ଜଣ ରୋଗୀ ଚିହ୍ନଟ ହୋଇଥିବା ବେଳେ ବଲାଙ୍ଗିର ଜିଲାରେ ରୋଗୀଙ୍କ ସଖ୍ୟା ୩୦୪ରେ ପହଞ୍ଚିଛି। ୨୫୬ ରୋଗୀ ଆରୋଗ୍ୟ ଲାଭ କରିଥିବା ବେଳେ ୩୭ ଜଣ ସଂକ୍ରମିତ ରୋଗୀ କୋଭିଡ ଡାକ୍ତରଖାନା ମାନଙ୍କରେ ଚିକିତ୍ସିତ ହେଉଛନ୍ତି।