ନୂଆଦିଲ୍ଲୀ : ସାରା ବିଶ୍ବରେ ପ୍ରଥମ ସିଏନଜି ମୋଟରସାଇକେଲ ଆଣିଥିଲା ବଜାଜ । ବଜାଜ ସିଏନଜି ମୋଟରସାଇକେଲ ବଜାଜ ଫ୍ରିଡମ ୧୨୫ ଆଣିଥିଲା । ଏବେ ଏହି ମୋଟରସାଇକେଲକୁ ପ୍ରାୟ ୮ ମାସ ବିତିଯାଇଛି । ବର୍ତ୍ତମାନ ସୁଦ୍ଧା କମ୍ପାନୀ ଏହାର ୫୦ ହଜାରରୁ ଅଧିକ ୟୁନିଟ୍ ବିକ୍ରି କରିସାରିଛି । ଏବେ କମ୍ପାନୀ ନିଜ ପଲସରର ସିଏନଜି ମଡେଲ ବଜାରକୁ ଆଣିବାକୁ ପ୍ରସ୍ତୁତ ହେଉଛି ।
କମ୍ପାନୀ ଆଗାମୀ ବର୍ଷକ ମଧ୍ୟରେ ପଲସରର ସିଏନଜି ମଡେଲ ଆଣିବାକୁ ପ୍ରସ୍ତୁତ ହେଉଛି । କେବଳ ୧୫୦ ସିସି ମଡେଲର ସିଏନଜି ଭର୍ସନ ଆସିବ । କମ୍ପାନୀ ପାଓ୍ବର କମ୍ ନକରି ଅଧିକ ମାଇଲେଜ୍ ଆଣିବାକୁ ଚାହୁଁଥିବାରୁ ୧୫୦ ସିସି ମଡେଲର ସିଏନଜି ଭର୍ସନ ବଜାରକୁ ଆସିବ । ବଜାଜ ରିୟଲ ଟାଇମ୍ ଫିଡବ୍ୟାକ୍ ପାଇଁ ଲଗାତର ବଜାର ସହିତ ଯୋଡି ହୋଇରହିଥାଏ ଏବଂ ନିଜ ରିସର୍ଚ୍ଚ ଟିମର ତଥ୍ୟ ଉପରେ ଗୁରୁତ୍ବ ଦେଇଥାଏ । ଗ୍ରାହକଙ୍କ ମତାମତକୁ ଗୁରୁତ୍ବ ଦେଇ ଏହାକୁ ସୁଧାରିବା ପାଇଁ ଚେଷ୍ଟା କରିଥାଏ । ଏହା ଫଳରେ କମ୍ପାନୀର ଉତ୍ପାଦ ଗ୍ରାହକଙ୍କୁ ପସନ୍ଦ ଆସିଥାଏ ।
ବଜାଜ ଫ୍ରିଡମରେ ୧୨୫ ସିସି ସିଙ୍ଗଲ ସିଲିଣ୍ଡର ଇଞ୍ଜିନ୍ ରହିଛି ଯାହା ପେଟ୍ରୋଲ ଓ ସିଏନଜି ଉଭରେ ଚାଲିଥାଏ । ଇଞ୍ଜିନ ୯.୫ ପିଏସ୍ ଓ ୯.୭ ଏନଏମର ପିକ୍ ଟର୍କ ଉତ୍ପନ କରିଥାଏ । ଏହି ମୋଟରସାଇକେଲରେ ସିଏନଜି ସିଲିଣ୍ଡର ସିଟ ତଳେ ଫିଟ୍ କରାଯାଇଛି । ଏଥିରେ ୨ କେଜିର ସିଏନଜି ସିଲିଣ୍ଡର ଓ ୨ ଲିଟରର ପେଟ୍ରୋଲ ଟ୍ୟାଙ୍କ ଦିଆଯାଇଛି । ଏହି ମୋଟରସାଇକେଲରେ ୧୧ ସେଫ୍ଟି ଟେଷ୍ଟ କରାଯାଇଛି । କମ୍ପାନୀ ଏହାକୁ ୭ଟି ରଙ୍ଗର ବିକଳ୍ପ ସହିତ ବଜାରକୁ ଆଣିଛି ।
